ព្រំដែន ៖ ប្រជាជនខ្មែរចំនួន១៦នាក់ ត្រូវបានមេខ្យល់នាំយកទៅធ្វើពលករនៅប្រទេសថៃ តាមច្រករបៀងដោយខុសច្បាប់ ហើយ អំឡុងពេលធ្វើដំណើរឆ្លងកាត់ព្រំដែន ទាហានឈុតខ្មៅថៃកំពុងល្បាតនៅតាមព្រំដែន ក៏បានប្រទះឃើញពលរដ្ឋខ្មែរទាំងនោះ ហើយទាហានថៃបានបាញ់ឡើងទៅលើ បំណងមិនអនុញ្ញាតឲ្យប្រជាជនខ្មែរ ឆ្លងដែនខុសច្បាប់ចូលទៅទឹកដីថៃទៀត។
ប្រភពព័ត៌មានពីខេត្តបន្ទាយមានជ័យបញ្ជាក់ថា រូបភាពសកម្មភាពខាងក្រោម គឺមានប្រជាជនខ្មែរចំនួន១៦នាក់ ត្រូវបានមេខ្យល់នាំយកទៅធ្វើពលករនៅប្រទេសថៃ តាមច្រករបៀងដោយខុសច្បាប់។ អំឡុងពេលធ្វើដំណើរឆ្លងកាត់ព្រំដែន បានឃើញទាហានឈុតខ្មៅថៃ កំពុងល្បាតនៅតាមព្រំដែន ខណៈនោះទាហានថៃ បានបាញ់ឡើងទៅលើបំណង មិនអនុញ្ញាតឲ្យប្រជាជនខ្មែរ ឆ្លងដែនខុសច្បាប់ចូលទៅទឹកដីថៃនោះទេ ប្រជាជនខ្មែរមួយក្រុម ដឹកនាំមេខ្យល់បានភ័យរត់ ទាក់ជាមួយបន្លាលួសបង្កឲ្យមានរបួសជើង មិនមែនរបួសដោយសារទាហានឈុតខ្មៅថៃបាញ់នោះទេ។
ប្រភពដដែលបន្ថែមថា ប្រជាជនខ្មែរ១៦នាក់ ត្រូវបានទាហានថៃឃាត់ខ្លួន រួមជាមួយមេខ្យល់ម្នាក់ផង ប្រគល់ជូនសមត្ថកិច្ចកម្ពុជា ដោយឡែកមានជនរងគ្រោះម្នាក់ ដែលរងរបួសជើងនោះ ត្រូវបានទាហានថៃ នាំយកទៅព្យាបាលក្នុងទឹកដីថៃ។ ក្រោយពេលរុំរបួស និងទទួលបានថ្នាំព្យាបាលរួច ថ្ងៃទី២០ ខែឧសភា ឆ្នាំ២០២០ អាជ្ញាធរថៃ បានប្រគល់បុរសរូបនោះ មកឲ្យសមត្ថកិច្ចកម្ពុជាវិញហើយ។
ចំពោះព័ត៌មានដែលសរសេរថា” ទាហានថៃបាញ់ខ្មែរខាងលិច ដើមស្រល់ផ្កាយ ៥ វេលាម៉ោង 5និង30នាទី នៅថ្ងៃទី ១៩ ខែឧសភា ឆ្នាំ ២០២០” ជាព័ត៌មានមិនពិត និងអាចបង្កឲ្យសាធារណជនមានការយល់ច្រឡំ ពិសេសលើទំនាក់ទំនងរវាងកម្ពុជា-ថៃ។
ករណីនេះ អាជ្ញាធរកម្ពុជា បាននិងកំពុងសួរនាំដើម្បីចាត់វិធាន។ សូមសាធារណជន និងអ្នកនិយមប្រើប្រាស់បណ្ដាញសង្គម សូមកុំមានការយល់ច្រឡំ និងសូមអំពាវនាវកុំបន្តផ្សព្វផ្សាយ(Share)នាំឲ្យបំពុលសង្គម និងអាចប្រឈមចំពោះមុខច្បាប់៕
ដោយ៖កូឡាប