ស្ទឹងត្រែង៖ មន្ត្រីជំនាញរដ្ឋបាលព្រៃឈើខេត្ត បានឲ្យដឹង នៅថ្ងៃទី២០ ខែឧសភា ឆ្នាំ២០២០ថា កម្លាំងជំនាញរដ្ឋបាលព្រៃឈើខេត្ត បានសហការជាមួយកម្លាំងកងរាជអាវុធហត្ថខេត្ត ស្ទាក់ចាប់បានរថយន្តដឹកជញ្ជូនឈើអារប្រភេទលេខ១ និងលេខ២ ដោយល្មើសច្បាប់ ដឹកតាមបណ្តោយផ្លូវជាតិលេខ៧ នៅចំណុចគីឡូលេខ៨ សង្កាត់សាមគ្គីមួយគ្រឿងកាលពីថ្ងៃទី១៩ ខែឧសភា ឆ្នាំ២០២០។
ក្រោយពីឃាត់រថយន្តដឹកឈើល្មើសច្បាប់ភ្លាមៗនោះ ត្រូវបានសមត្ថកិច្ចអាវុធហត្ថ នាំយកមកកាន់ទីបញ្ជាការដ្ឋានកងរាជអាវុធហត្ថខេត្ត ដើម្បីធ្វើការត្រួតពិនិត្យ និងវាសវែង។
ជាលទ្ធផលមានប្រភេទឈើអារប្រភេទលេខ១ និងលេខ២ សរុបចំនួន១៤៦ដុំ/សន្លឹកស្មើនឹង៣,០៨៤ម៉ែត្រគូបត្រីគុណ ហើយត្រូវបានដឹកយកមករក្សាទុក នៅខណ្ឌរដ្ឋបាលព្រៃឈើ ខេត្តស្ទឹងត្រែង។
រីឯរថយន្តមួយគ្រឿងប្រភេទប៉ែនខ្នាតធំមាន ពណ៌ត្រេអ៊ី ពាក់ផ្លាកលេខខេមរភូមិន្ទ 01.3-6816 ត្រូវបានរក្សាទុក នៅទីបញ្ជាការដ្ឋានកងរាជអាវុធហត្ថខេត្តស្ទឹងត្រែង ដើម្បីបន្តនីតិវិធីតាមច្បាប់ ។
ជនប្រព្រឹត្តបទល្មើសដឹកជញ្ជូនឈើខុសច្បាប់ គឺជាមន្ត្រីយោធា ក្រោយពេលបានសួរនាំបំពេញបែបបទរួច ពុំបានធ្វើការឃាត់ខ្លួនឡើយ៕
ដោយ៖សុខុម