រដ្ឋាភិបាលអាមេរិច បានជូនដំណឹងដល់សភា ពីការលក់មីស៊ីលក្រោមទឹកដ៏ទំនើប ទៅឲ្យតៃវ៉ាន់ តម្លៃប្រហែល ១៨០លានដុល្លារ។ ការលក់អាវុធនេះ ទំនងជានឹងធ្វើឲ្យភាពតានតឹង រវាងទីក្រុងវ៉ាស៊ីនតោន និងប៉េកាំង កាន់តែកើនខ្លាំងឡើង ខណៈដែលចិនតែងចាត់ទុកតៃវ៉ាន់ ជាផ្នែកមួយរបស់ខ្លួន។
ដូចជាប្រទេសផ្សេងៗទៀតដែរ សហរដ្ឋអាមេរិច មិនមានទំនាក់ទំនងការទូត ជាផ្លូវការជាមួយនឹងតៃវ៉ាន់ឡើយ ប៉ុន្តែអាមេរិចមានច្បាប់ ដែលអាចផ្តល់មធ្យោបាយ គាំទ្រដល់កោះតៃវ៉ាន់ ក្នុងការការពារខ្លួន។ ចិនតែងតែប្រឆាំងនឹងការលក់អាវុធ របស់អាមេរិចដល់កោះតៃវ៉ាន់។
ក្រសួងការបរទេសអាមេរិច បានអនុម័តការលក់មីស៊ីក្រោមទឹក ប្រភេទ 18 MK-48 Mod6 ដ៏ទំនើប និងឧបករណ៍ផ្សេងទៀតដល់តៃវ៉ាន់ ដែលមានតម្លៃប្រមាណ ១៨០លានដុល្លារ។ នេះបើតាមភ្នាក់ងារកិច្ចប្រតិបត្តិការការពារសន្តិសុខអាមេរិច ប្រកាសនៅក្នុងសេចក្តីប្រកាស នៅថ្ងៃពុធ។
ការប្រកាសលក់អាវុធឲ្យតៃវ៉ាន់ កើតឡើងនៅថ្ងៃជាមួយគ្នា នៅពេលដែលមេដឹកនាំតៃវ៉ាន់ អ្នកស្រី Tsai Ing-wen បានស្បថចូលកាន់តំណែងជាប្រធានាធិបតីអាណតិ្តទី ២។ ក្នុងពិធីឡើងកាន់តំណែង អ្នកស្រីថ្លែងថា តៃវ៉ាន់ចង់ជជែកជាមួយនឹងចិន ប៉ុន្តែមិនមែនក្នុងលក្ខខណ្ឌ “ប្រទេសមួយ ប្រព័ន្ធពីរ” ឡើយ។
ចិនបានធ្វើសមយុទ្ធយោធានៅក្បែរកោះតៃវ៉ាន់ ចាប់តាំងពីអ្នកស្រីឈ្នះការបោះឆ្នោតលើកទី ២មក ដោយយោធាចិនបានធ្វើការបង្ហោះយន្តហោះចំបាំង ចូលទៅក្នុងដែនអាកាសរបស់តៃវ៉ាន់ និងបើកនាវាចំបាំងជុំវិញតៃវ៉ាន់។
សូមបញ្ជាក់ថា ចិនចាត់ទុកតៃវ៉ាន់ជាផ្នែកមួយរបស់ខ្លួន និងបានប្រកាសថា នឹងរួបរួមជាមួយតៃវ៉ាន់វិញនៅថ្ងៃណាមួយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
