ភ្នំពេញ៖ ដូចដែលបងប្អូនបានដឹងរួចហើយ កាលពីពេលកន្លងមកនេះ កម្លាំងសណ្តាប់ធ្នាប់ចរាចរណ៍រាជធានីភ្នំពេញ បានចាត់វិធានការធម៌ក្តៅ ទៅលើរថយន្តណាដែលចតនៅតាមចិញ្ចើមផ្លូវសាធារណៈ ដែលធ្វើឲ្យបាត់បង់សណ្តាប់ធ្នាប់ និងបង្កឲ្យមានការកកស្ទះ តាមរយៈការចាក់សោកង់ ឬ លើកឡើងឡានស្ទួចតែម្តង ដោយគ្មានលើកលែងថាជារថយន្តអ្នកតូច អ្នកធំ ឬ ឡានអាងស្លាកលេខ ខ.ម នោះឡើយ។
ដោយឡែក នៅថ្ងៃទី២១ ខែឧសភា ឆ្នាំ២០២០ កម្លាំងសណ្តាប់ធ្នាប់ចរាចរណ៍ខណ្ឌសែនសុខ ដែលដឹកនាំបញ្ជាដោយលោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌ បានចុះអនុវត្តវិធានការធម៌ក្តៅនេះជាថ្មី ដើម្បីចុះរៀបចំសណ្តាប់ធ្នាប់តាមបណ្តើយផ្លូវភ្នំពេញហាណូយ ស្ថិតក្នុងសង្កាត់ឃ្មួញ ។
នេះបើយោងតាមទំព័រហ្វេសប៊ុក ស្នងការដ្ឋាននគរបាលរាជធានីភ្នំពេញ បានចុះផ្សាយឲ្យដឹងថា៖ “នៅព្រឹកថ្ងៃទី ២១ ខែឧសភា ឆ្នាំ២០២០ លើកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានបញ្ជាកម្លាំងសណ្តាប់ធ្នាប់ចរាចរណ៍ខណ្ឌសែនសុខ ដើម្បីចុះរៀបចំសណ្តាប់ធ្នាប់តាមបណ្តើយផ្លូវភ្នំពេញហាណូយ ស្ថិតក្នុងសង្កាត់ឃ្មួញ ខណ្ឌសែនសុខ និងបានធ្វើការចាក់សោរថយន្តមួយចំនួន ដែលឈប់ចតលើចិញ្ចើមផ្លូវបណ្តាល ឲ្យបាត់បង់សណ្តាប់ធ្នាប់ និងបង្កការកកស្ទះចរាចរណ៍ ពិបាកក្នុងការធ្វើដំណើររបស់ប្រជាពលរដ្ឋ និងធ្វើការផាកពិន័យតាមច្បាប់ “។
តាមរយៈនេះផងដែរ យើងក៏សូមអំពាវនាវដល់បងប្អូនប្រជាពលរដ្ឋទាំងអស់ ជាពិសេសអ្នកមានយានយន្តជំនិះ ត្រូវចូលរួមគោរពតាមបទបញ្ជាណែនាំរបស់សមត្ថកិច្ច និងក៏ដូចគោរពច្បាប់ចរាចរណ៍ទាំងអស់គ្នា ដើម្បីបញ្ជៀសការកកស្ទះ និងគ្រោះថ្នាក់កើតឡើងជាយថាហេតុ៕
ដោយ៖ លឹម ហុង
