ភ្នំពេញ ៖ ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានចេញលិខិតអញ្ជើញ ឧកញ៉ា ស៊ី គង់ទ្រីវ ឲ្យចូលមកទូទាត់បំណុលពន្ធ ដែលជំពាក់រដ្ឋ។
បើតាមលិខិតអញ្ជើញ ដែលបណ្តាញព័ត៌មានទទួលបាននៅថ្ងៃទី២១ ខែឧសភា ឆ្នាំ២០២០នេះ បានបញ្ជាក់ថា ក្រុមហ៊ុនទាំង២នោះរួមមាន៖ ឧកញ៉ា ស៊ី គង់ទ្រីវ នាយកក្រុមហ៊ុន ខេ ធី ប៉ាស៊ីហ្វិច គ្រុប លីមីធីត ។
អគ្គនាយកពន្ធដារ សូមជម្រាបឧកញ៉ា ស៊ី គង់ទ្រីវ ជ្រាបថា ការបង់ពន្ធអាករ គឺជាកាតព្វកិច្ចរបស់អ្នកជាប់ពន្ធ គ្រប់រូប ដើម្បីរួមចំណែកក្នុងថវិកាជាតិ។ កន្លងមក អគ្គនាយកដ្ឋានពន្ធដារ បានអញ្ជើញឧកញ៉ានាយកក្រុមហ៊ុនមក ដើម្បីដោះស្រាយបំណុលពន្ធរបស់ក្រុមហ៊ុន តាមរយៈលិខិតអញ្ជើញ ជូនដល់អាសយដ្ឋានក្រុមហ៊ុនដែលបានចុះបញ្ជីនៅរដ្ឋបាលសារពើពន្ធ ប៉ុន្តែឧកញ៉ានាយកមិនបានមកតាមការអញ្ជើញ និងមិនបានទូទាត់បំណុលពន្ធឡើយ។ លោកឧកញ៉ា ត្រូវមកទូទាត់បំណុល តាមកាលបរិច្ឆេទ មិនឲ្យលើសពី១៥ថ្ងៃ។
ឯកឧត្តមអគ្គនាយកពន្ធដារ បានបញ្ជាក់ថា ក្នុងករណី មិនបានអញ្ជើញមកតាមកាលកំណត់នោះទេ ឧកញ៉ានាយក ត្រូវចាត់ទុកថាបានប្រព្រឹត្តបទល្មើសព្រហ្មទណ្ឌលើបទប្បញ្ញត្តិស្តីពីពន្ធដារ ដូចមានចែងក្នុងមាត្រា ១២៧ , ១៣៥ និង១៣៦ នៃច្បាប់ស្តីពីសារពើពន្ធ ហើយអគ្គនាយកដ្ឋានពន្ធដារ នឹងចាត់វិធានការតាមផ្លូវច្បាប់ ប្តឹងទៅតុលាការ ដើម្បីផ្តន្ទាទោសតាមច្បាប់ ជាធរមាន ដោយរាល់ការចំណាយជាបន្ទុករបស់ឧកញ៉ាជាម្ចាស់ក្រុមហ៊ុន។
អគ្គនាយកដ្ឋានពន្ធដារ សង្ឃឹមជឿជាក់ថា លើស្មារតីទទួលខុសត្រូវ របស់ឧកញ៉ា ស៊ី គង់ទ្រីវ នាយកក្រុមហ៊ុន ក្នុងការបំពេញកាតព្វកិច្ចសារពើពន្ធ៕
ដោយ៖កូឡាប