កំពត ៖ រាជរដ្ឋាភិបាល មានគម្រោងសាងសង់សារមន្ទីរថាមពលកើតឡើងវិញ និងឧទ្យានជាតិសម្ដេចហ៊ុន សែនកំពតនេះ គឺជាគម្រោងមួយអនុវត្ត ផ្អែកតាមអនុក្រិត្យរបស់រាជរដ្ឋាភិបាល ផ្ដល់ជូន អគ្គិសនីកម្ពុជា ដើម្បីអនុវត្តដំណើរការគម្រោងសាងសង់ លើផ្ទៃដីកោះទំហំ៨,៦០ហិកតា។ ទោះបីយ៉ាងណាគម្រោងនេះ នៅមិនទាន់ ឲ្យដឹងពីទំហំនៃការប្រើប្រាក់ ថវិកានៅឡើយ។
នៅព្រឹកថ្ងៃទី២១ ខែឧសភា ឆ្នាំ២០២០ រដ្ឋបាលខេត្តកំពត បានបើកកិច្ចប្រជុំពិគ្រោះយោបល់ ស្ដីពីកិច្ចសហការ និង សិក្សាផលបះពាល់ ក្នុងការអនុវត្តគម្រោងសាងសង់ សារមន្ទីរថាមពលកើតឡើងវិញ និងឧទ្យាជាតិ សម្ដេចហ៊ុនសែនកំពត ។
កិច្ចប្រជុំនេះស្ថិតក្រោមអធិបតីភាព ឯកឧត្តម កែវ រតនៈរដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា ឯកឧត្តម ជាវ តាយ អភិបាលនៃគណៈអភិបាលខេត្ត និងមានការចូលរួមពីមន្ត្រី ដែលជាតំណាងក្រសួង មន្ទីរ អង្គភាព និងអាជ្ញាធរមូលដ្ឋានពាក់ព័ន្ធសរុប២៨នាក់។
គោលបំណងកិច្ចប្រជុំនេះផ្ដោតសំខាន់លើការចូលរួមពិគ្រោះយោបល់ពីអ្នកពាក់ព័ន្ធ សិក្សាពីផលបះពាល់ និងជំរុញឲ្យមានកិច្ចសហការគាំទ្របន្ថែមពីអាជ្ញាធរដែនដី ដើម្បីឈានដល់ការបើកផ្លូវឲ្យគម្រោងជាតិមួយនេះអាចអនុវត្តការសាងសង់ សម្រាប់ជាវិភាគទាននៃសមិទ្ធផលថ្មីមួយបន្ថែមទៀតរបស់ខេត្តកំពត។
គម្រោងសាងសង់សារមន្ទីរថាមពលកើតឡើងវិញ និងឧទ្យានជាតិសម្ដេចហ៊ុន សែនកំពតនេះ គឺជាគម្រោងមួយអនុវត្ត ផ្អែកតាមអនុក្រិត្យរបស់រាជរដ្ឋាភិបាល ផ្ដល់ជូន អគ្គិសនីកម្ពុជា ដើម្បីអនុវត្តដំណើរការគម្រោងសាងសង់ នៅក្នុងឆ្នាំ២០២០នេះ នឹងអាចត្រូវបញ្ចប់នៅឆ្នាំ២០២២ខាងមុខ ដែលមានទីតាំងស្ថិតនៅ តំបន់សហគមន៍ នៃឧទ្យានជាតិព្រះមុន្នីវង្ស”បូកគោ” លើផ្ទៃដីកោះទំហំ៨,៦០ហិកតា នៅក្នុងភូមិសាស្ត្រភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូខេត្តកំពត។ ទោះបីយ៉ាងណាគម្រោងនេះ នៅមិនទាន់ ឲ្យដឹងពីទំហំនៃការប្រើប្រាក់ ថវិកានៅឡើយ ប៉ុន្តែទំហំការកសាងនូវហេដ្ឋារចនាសម្ព័ន្ធ មានច្រើនគួរសមបម្រើឱ្យទាំងការសិក្សាស្រាវជ្រាវបទពិសោធន៍ និងចង់ដឹងពីបច្ចេកវិទ្យាវិស័យវារីអគ្គិសនីនៅកម្ពុជា និងបំរើឲ្យវិស័យទេចរណ៍ក្នុងតំបន់នៃខេត្តកំពតនេះផងដែរ។
មានប្រសាសន៍ក្នុងកិច្ចប្រជុំ ឯកឧត្តម ជាវ តាយ អភិបាលខេត្ត បានសំដែងការគាំទ្រដល់ការអនុវត្តនូវគម្រោងជាតិ ដ៏មានសារសំខាន់មួយនេះឡើង ក្នុងស្មារតីឆន្ទៈ សហការ ដើម្បីធ្វើយ៉ាងណាឱ្យការអនុវត្តគម្រោង សម្រេចបានជាសមិទ្ធផលរបស់ប្រទេសជាតិ ជាប្រវត្តិសាស្ត្រ សម្រាប់បម្រើប្រយោជន៍សាធារណៈ ពិសេសក្នុងវិស័យទេចរណ៍ នៅតំបន់រមណីយដ្ឋានទឹកឈូខេត្តកំពត។
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា បានបញ្ជាក់ឲ្យដឹងថា ដោយសារកម្ពុជាយើងបច្ចុប្បន្នមានវារីអគ្គិសនីច្រើនគួរសម ហើយការប្រមូលផ្ដុំចំណេះដឹងបទពិសោធន៍នៅនឹងកន្លែងដូចស្រុកគេ ដើម្បីជាការស្រាវជ្រាវរៀនសូត្រឈ្វេងយល់ជាសាធារណជនទូទៅ នៅពុំទាន់មាននៅឡើយទេ។
ដូច្នេះគោលដៅនៃគម្រោងនេះដែរ គឺផ្តោតសំខាន់លើបញ្ហាពីរ គឺទី១ សំដៅការបង្កើតឲ្យមានជាបណ្ដុំវ៉ារីអគ្គិសនីនៅ តាមបណ្ដាខេត្តទាំងឡាយមួយចំនួន ដែលមានក្នុងប្រទេសកម្ពុជាសម្រាប់ ផ្ដល់ការចង់ដឹងរបស់អ្នកទេសចរណ៍ជាតិ អន្តរជាតិ ឬប្រជាពលរដ្ឋខ្មែរ ទាំងអស់មកកម្សាន្តនៅទីនេះ ដោយគ្រាន់តែចូលមកមើលក្នុងសារមន្ទីរនេះ អំពីប្រព័ន្ធវ៉ារីអគ្គិសនីនៅកម្ពុជា គឺអាចដឹងបានដោយមិនចាំបាច់ទៅមើលដល់ទីកន្លែងឡើយ។
ទី២ ការដាក់ឧទ្យានជាតិនេះ គឺសំដៅ ចង់ឲ្យមានការទាក់ទាញទេសចរណ៍ជាតិ អន្តរជាតិ ឬក៏ឲ្យប្រជាពលរដ្ឋមកកំសាន្តនៅតំបន់នេះ កាន់តែច្រើននិងក៏ជាសមិទ្ធផលថ្មីរបស់ជាតិ ក៏ដូចជាសមិទ្ធផលសម្រាប់ខេត្តកំពតផងដែរ។
ឯកឧត្តមកែវ រតនៈក៏បានបញ្ជាក់ឲ្យដឹងពីឈ្មោះ គម្រោងសារមន្ទីរថាមពលកើតឡើងវិញ និងឧទ្យានជាតិសម្ដេចហ៊ុន សែនកំពត ដែលបានដាក់បង្ហាញក្នុងកិច្ចប្រជុំពេលនេះ ថាគឺជាឈ្មោះគម្រោងបណ្ដោះអាសន្នមួយប៉ុណ្ណោះ បើថ្ងៃក្រោយយើងមានថាមពលខ្យល់ ឬព្រះអាទិត្យបន្ថែមទៀតយើងនឹងអាចកែប្រែឡើងវិញ៕
ដោយ៖កូឡាប
