ភ្នំពេញ៖ យុវជនម្នាក់ស្រវឹងស្រាជិះម៉ូតូទៅបុកជាមួយនឹងម៉ូតូកង់បីឥណ្ឌាបណ្ដាលឲ្យក្រឡាបផ្ងារជើងមួយចំហៀង ។ ហេតុការណ៍គ្រោះថ្នាក់ចរាចរណ៍ខាងលើនេះបង្កឲ្យមានការភ្ញាក់ផ្អើលកាលពីវេលាម៉ោង១២ និង៣០រំលងអធ្រាត្រ ឈានចូលថ្ងៃទី២២ ខែឧសភា ឆ្នាំ២០២០ ដែលស្ថិតតាមបណ្ដោយផ្លូវ២០១១ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
យោងបានប្រភពព័ត៌មានពីម្ចាស់ម៉ូតូដែលបង្កបានប្រាប់ឲ្យដឹងថា គាត់បានចេញពីកន្លែងផឹកសុីមួយកន្លែងដោយស្ថានភាពស្រវឹងស្រាជិះម៉ូតូម៉ាកហុងដាសង់ឌ្រីមស៊េរី២០១៧ ពណ៌ខ្មៅ ពាក់ផ្លាកលេខភ្នំពេញ1GL-0254 ក្នុងល្បឿនលឿនក្នុងទិសដៅពីត្បូងមកជើង ខណៈពេលនោះក៏មានម៉ូតូកង់បីឥណ្ឌាមួយពណ៌សពាក់ផ្លាកលេខព្រៃវែង1P-8431 ធ្វើដំណើរស្របទិសគ្នានៅខាងមុខក៏បានបុកពេញទំហឹងបណ្ដាលឲ្យក្រឡាប់ម៉ូតូកង់បីឥណ្ឌាតែម្ដង ចំណែកឯម៉ូតូរងការខូចខាតផ្នែកពីមុខយ៉ាងដំណំ។ ក្នុងហេតុការណ៍នេះគ្មានអ្នករងរបួសឡើយ។
ក្រោយពេលកើតហេតុសមត្ថកិច្ចបានចុះមកដល់ចំណុចកើតហេតុ បានឲ្យភាគីទាំងពីរសម្រួលគ្នា ដោយភាគីខាងម៉ូតូគ្មានលុយនៅក្នុងខ្លួនក៏បានប្រាប់ឲ្យភាគីខាងម៉ូតូកង់បីឥណ្ឌារង់ចាំដោះស្រាយទៅថ្លៃខូចខាតនិងទុកអត្ដសញ្ញាណប័ណ្ណជាសម្គាល់ដើម្បីដោះស្រាយគ្នា៕
ដោយ៖សហការី CEN
