ខេត្តព្រះសីហនុ៖ ឯកឧត្តមនាយឧត្តមសេនីយ៍គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា និងឯកឧត្តមឧត្តមសេនីយ៍ឯក យន្ត មីន អភិបាល នៃគណៈអភិបាលខេត្តព្រះសីហនុ និងជាប្រធានកិត្តិយសសមាគមអតីតយុទ្ធជនកម្ពុជា ខេត្តព្រះសីហនុ បានអញ្ជើញជាអធិបតីភាពក្នុងពិធីបំពាក់មេដាយការពារជាតិ ជូនដល់អតីតយុទ្ធជនកម្ពុជា ខេត្តព្រះសីហនុ ចំនួន 1060នាក់ កាលពីថ្ងៃពុធ ទី២៤ ខែមករា ឆ្នាំ២០១៨។
អញ្ជើញចូលរួមជាកិត្តិយសក្នុងពិធីនេះ មានឯកឧត្តម លោកជំទាវ ប្រធានអនុប្រធានសមាគមអតីតយុទ្ធជនកម្ពុជា ខេត្តព្រះសីហនុមន្ត្រីអតីតយុទ្ធជនកម្ពុជា មេបញ្ជាការមេបញ្ជាការរងអង្គភាពកងកម្លាំងប្រដាប់អាវុធ ប្រធាន អនុប្រធានមន្ទីរ អង្គភាពស្ថាប័នរដ្ឋ ក្នុងខេត្តរួមនឹងមន្ត្រីអតីតយុទ្ធជនកម្ពុជាចំនួន1060នាក់។
បន្ទាប់ពីប្រសាសន៍ ស្វាគមន៍ របស់លោក ឧត្តមសេនីយ៍ត្រី ហេង ប៊ុនទី មេបញ្ជាការនៃបញ្ជាការដ្ឋានកងរាជអាវុធហត្ថខេត្តព្រះសីហនុ និងជាប្រធាន សមាគមអតីតយុទ្ធជនកម្ពុជាខេត្តព្រះសីហនុ ចំពោះ វត្តមាន របស់ឯកឧត្ដមគណៈអធិបតី ដែលបានអញ្ជើញចូលរួមក្នុងពិធីនេះរួចមក។
ក្រោយពីទទួលបាន ភារកិច្ចថ្មីជាប្រធានសមាគមអតីតយុទ្ធជនកម្ពុជា ខេត្តព្រះសីហនុ លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថ ខេត្តព្រះសីហនុ និងជាប្រធានសមាគមអតីតយុទ្ធជនកម្ពុជា ខេត្តព្រះសីហនុ បានធ្វើរបាយការណ៍បញ្ជាក់ថា សមាគមអតីតយុទ្ធជនកម្ពុជា ខេត្តព្រះសីហនុ បានរួមសហការគ្នាជាមួយ អាជ្ញាធរខេត្តព្រះសីហនុ ស្នងការនគរបាលខេត្ត
មេបញ្ជាការតំបន់ប្រតិបត្តការសិករងខេត្ត និងមន្ទីរ សង្គមកិច្ចអតីតយុទ្ធជន និងយុវនីតិសម្បទាខេត្ត ដែលបានយកចិត្តទុកដាក់បន្តគ្រប់គ្រងនិងជំរុញយន្តការសមាគមអតីតយុទ្ធជនកម្ពុជាតាមបណ្ដា ក្រុង-ស្រុក-ឃុំ-សង្កាត់ សម្រេចបានគួរឲ្យកត់សម្គាល់ សមាគម
អតីតយុទ្ធជនកម្ពុជា ខេត្តព្រះសីហនុ មានរចនាសម្ព័ន្ធគណៈកម្មាធិការសមាគមថ្នាក់ខេត្តចំនួន 27នាក់ មានអតីតយុទ្ធជនគ្រប់ប្រភេទនៅទូទាំងខេត្ត ដែលកំពុងទទួលឧបត្ថម្ភគោលនយោបាយពីរដ្ឋចំនួន1060នាក់ មានសមាជិកសមាគមអតីតយុទ្ធជនចំនួន 653នាក់ ក្នុងនោះនៅក្រុងព្រះសីហនុចំនួន298នាក់ ស្រុកព្រៃនប់មានចំនួន 291នាក់ ស្រុកស្ទឹងហាវ មានចំនួន30នាក់ ស្រុកកំពង់សីលាចំនួន34នាក់។ បានធ្វើបច្ចុប្បន្នភាពរួមចំនួន 497នាក់ នៅសល់156នាក់ ក្នុងនោះជនពលីចំនួន 24នាក់ ជនមរណៈភាពចំនួន21នាក់ ជនពិការចំនួន123នាក់ និវត្តជនចំនួន 423នាក់ ជនបាត់បង់ចំនួន19នាក់ នាក់រស់នៅក្នុងបន្ទុក ប្រពន្ធចំនួន 483នាក់ កូនចំនួន2.196នាក់ កូនមានអាយុ 18ឆ្នាំឡើងចំនួន1.484នាក់ បានរកឃើញអតីតយុទ្ធជនក្រីក្រ ទ័លការលំបាកមានចំនួន57គ្រួសារ មានដីគ្មានផ្ទះចំនួន13គ្រួសារ គ្មានដីគ្មានផ្ទះចំនួន 25គ្រួសារ រស់នៅលើដីសាធារណៈចំនួន 19គ្រួសារ បានសាងសង់ផ្ទះជូនសមាជិក ដែលមាបផ្ទះមិនសមរម្យ នៅលើដីកម្មសិទ្ធិផ្ទាល់ចំនួន 4 គ្រួសារ ជាអំណោយ ដ៏ថ្លៃថ្លា របស់សម្ដេចតេជោនៅក្រុងព្រះសីហនុចំនួន 1ខ្នង និងនៅស្រុកព្រៃនប់ចំនួន 3 ខ្នង។
ឯកឧត្តមនាយឧត្តមសេនីយ៍ គន់ គីម និងឯកឧត្តម យន្ត មីន អភិបាលខេត្តព្រះសីហនុមានប្រសាសន៍សំណេះសំណាល ដោយថ្លែងការកោតសរសើរ ចំពោះសមាគមអតីតយុទ្ធជនកម្ពុជា ខេត្តព្រះសីហនុ រួមនឹងមន្ត្រីកងកម្លាំងប្រដាប់អាវុធអតីតយុទ្ឋជនកម្ពុជា ខេត្តទាំងអស់ ដែលបានរួមគ្នា អនុវត្តន៍នូវកម្មវិធីនយោបាយ របស់រាជរដ្ឋាភិបាល នៃព្រះរាជាណាចក្រកម្ពុជា តាមរយៈការខិតខំបំពេញភារកិច្ចការពារជាតិកន្លងមកធ្វើឱ្យប្រទេសជាតិមានការវិវត្តន៍រីកចម្រើនជាបន្តបន្ទាប់។
នៅក្នុងឱកាសដ៏ឧត្តុងឧត្តមនេះ ឯកឧត្តម នាយឧត្តមសេនីយ៍ គន់ គីម បានអញ្ជើញបំពាក់ គ្រឿងឥស្សរិយសជូនដល់មន្ត្រីអតីតយុទ្ធជនកម្ពជាខេត្តព្រះសីហនុទាំង 1060 អ្នកក្នុងការបំពេញភារកិច្ចជូនប្រទេសជាតិកន្លងមកប្រកបដោយបរិយាកាសសប្បាយរីករាយ៕ ដោយ៖ សីហា
