ភ្នំពេញ៖ លោកឯកអគ្គរដ្ឋទូតអាមេរិក W. Patrick Murphy មានមោទកភាពធ្វើការប្រកាសជំនួយថ្មីរបស់សហរដ្ឋអាមេរិក ចំនួន ៧,៥ លានដុល្លារ ដល់ប្រទេសកម្ពុជា សម្រាប់ធ្វើការឆ្លើយតបនឹងមេរោគកូវីដ ១៩ ដែលសរុបទៅជំនួយរបស់សហរដ្ឋអាមេរិកដល់ប្រទេសកម្ពុជាមានចំនួន ១១លានដុល្លារ គិតចាប់តាំងពីការចាប់ផ្ទុះឡើងនៃជំងឺរាតត្បាតនេះ ដោយរួមទាំងជំនួយសម្រាប់ធ្វើការស្តារសេដ្ឋកិច្ចឡើងវិញ។
ឯកឧត្តមឯកអគ្គរដ្ឋទូតបានមានប្រសាសន៍ថា៖ “ខ្ញុំរីករាយដោយបានចូលរួមជាមួយលោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព័ន្ធមុនីរ័ត្ន នៅក្នុងការសម្តែងការប្តេជ្ញាចិត្តយ៉ាងរឹងមាំរបស់យើង ចំពោះសុខភាព និងសុខមាលភាពនៃប្រជាជននៃព្រះរាជាណាចក្រកម្ពុជា”។
ឯកឧត្តមឯកអគ្គរដ្ឋទូត បានថ្លែងថា រដ្ឋាភិបាលសហរដ្ឋអាមេរិក នឹងផ្តល់ហិរញ្ញប្បទានឥតសំណងមានទឹកប្រាក់ចំនួន ៧,៥លានដុល្លារអាមេរិក ដែលក្នុងនោះ ថវិកាចំនួន៥លានដុល្លារអាមេរិក សម្រាប់ស្តារសម្បទាសេដ្ឋកិច្ចកម្ពុជាឡើងវិញ បន្ទាប់ពីរងផលប៉ះពាល់ដោយសារជំងឺកូវីដ១៩ និងថវិកាចំនួន២,៥លានដុល្លារអាមេរិកទៀត ជាហិរញ្ញប្បទានបន្ថែមសម្រាប់ការឆ្លើយតបនឹងការការពារសុខុមាលភាពប្រឆាំងនឹងជំងឺកូវីដ១៩ នៅកម្ពុជា។ ចំពោះការប្រើប្រាស់ហិរញ្ញប្បទានឥតសំណងនេះ ក្នុងរយៈពេលខ្លីនឹងត្រូវប្រើក្នុងការជួយលើកកម្ពស់ជីវភាព រស់នៅប្រចាំថ្ងៃរបស់ប្រជាពលរដ្ឋកម្ពុជា ដែលរងប៉ះពាល់ខ្លាំងពីជំងឺរាតត្បាតនេះ ហើយដោយឡែកក្នុងរយៈពេលមធ្យមនឹងជួយរៀបចំកម្មវិធីបណ្តុះបណ្តាលជំនាញការងារឡើងវិញ ដល់ប្រជាពលរដ្ឋ រងគ្រោះក្នុងវិស័យឯកជន។
ក្រសួងសេដ្ឋកិច្ចនិងហិរញ្ញវត្ថុ បានចេញសេចក្តីប្រកាសព័ត៌មានស្តីពីពិធីប្រកាស
អំពីការផ្តល់ហិរញ្ញប្បទានឥតសំណង របស់រដ្ឋាភិបាលសហរដ្ឋអាមេរិក សម្រាប់ការស្តារសម្បទាសេដ្ឋកិច្ចឡើងវិញ បន្ទាប់ពីរងផលប៉ះពាល់ដោយសារជំងឺកូវីដ ១៩ ។ ពិធីនេះបានធ្វើឡើង នាព្រឹកថ្ងៃទី ១៩ ខែ ឧសភា ឆ្នាំ ២០២០ វេលាម៉ោង នៅទីស្តីការក្រសួងសេដ្ឋកិច្ច និងហិរញ្ញវត្ថុ ។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងនូវអំណរគុណជូនចំពោះរដ្ឋាភិបាល និងប្រជាជនអាមេរិក ដែលបានផ្តល់ជំនួយអន្តរាគមន៍ចំគោលដៅ និងទាន់ពេលវេលាដែលជាកាយវិការប្រកបដោយអត្ថន័យសម្រាប់ប្រជាជនកម្ពុជា។ ឯកឧត្តម បានបន្តថា ជំងឺកូវីដ១៩ មិនត្រឹមតែបង្កផលប៉ះពាល់ធ្ងន់ធ្ងរដល់សុខុមាលភាពសាធារណៈប៉ុណ្ណោះទេ ប៉ុន្តែថែមទាំងបានគំរាមកំហែងដល់ការអភិវឌ្ឍសង្គម និងសេដ្ឋកិច្ចនៅទូទាំងពិភពលោកផងដែរ ហើយកម្ពុជាក៏ដូចជាប្រទេសដទៃទៀតដែរ បានទទួលរងផលប៉ះពាល់ពីជំងឺនេះ។
ភាគីទាំងពីរ កម្ពុជានិងអាមេរិក សន្យានឹងបន្តខិតខំបន្តថែរក្សាចំណងមិត្តភាព ដែលមានជាយូរលុងណាស់មកហើយ រវាងប្រទេសទាំងពីរ និងបន្តពូនជ្រុំមូលដ្ឋានគ្រឹះនៃចំណងមិត្តភាព និងកិច្ចសហប្រតិបត្តិការ ដែលមានស្រាប់ ឲ្យកាន់តែរឹងមាំ និងជ្រាលជ្រៅថែមទៀត៕
ដោយ៖កូឡាប