សហរដ្ឋអាមេរិច កាលពីថ្ងៃព្រហស្បតិ៍ បានជំរុញឲ្យមហាយក្សចិន គោរពស្វ័យភាព របស់ទីក្រុងហុងកុង ដោយធ្វើការព្រមានថា សំណើរច្បាប់សន្តិសុខជាតិ របស់ខ្លួនសម្រាប់ទីក្រុងហុងកុង នឹងធ្វើឲ្យមានអស្ថេរភាពខ្ពស់ និងប្រឈមនឹងការប្រឆាំងជាសកល។
អ្នកនាំពាក្យក្រសួងការបរទេសអាមេរិច អ្នកស្រី Morgan Ortagus បានថ្លែងថា “រាល់ការប្រឹងប្រែង ក្នុងការដាក់ចេញច្បាប់ សន្តិសុខជាតិ ដែលមិនឆ្លុះបញ្ជាក់ពីឆន្ទៈរបស់ប្រជាជនហុងកុង នឹងធ្វើឲ្យមានអស្ថេរភាពខ្ពស់ និងត្រូវរងការថ្កោលទោសខ្លាំង ពីសហរដ្ឋអាមេរិច និងសហគមន៍អន្តរជាតិ”។
អ្នកស្រីថ្លែងទៀតថា សេចក្តីប្រកាស និងសំណើរច្បាប់របស់ចិន បានបំផ្លាញចោលនូវការសន្យា របស់ចិនដែលខ្លួនបានធ្វើ មុនពេលទទួលបានការគ្រប់គ្រងទីក្រុងហុងកុង ពីអង់គ្លេសវិញក្នុងឆ្នាំ ១៩៩៧។
អ្នកនាំពាក្យដដែលបន្តទៀតថា “យើងសូមជំរុញទីក្រុងប៉េកាំង ឲ្យគោរពតាមការប្តេជ្ញា និងកាតព្វកិច្ចរបស់ខ្លួន ដែលមានចែងក្នុងសេចក្តីប្រកាសរួម Sino-British ដោយក្នុងសេចក្តីប្រកាសនោះ មានចែងថា ទីក្រុងហុងកុងនឹងទទួលបានស្វ័យភាពខ្ពស់ ហើយប្រជាជនហុងកុង នឹងទទួលបានសិទ្ធិ និងសេរីភាពជាមូលដ្ឋាន”។
លោកប្រធានាធិបតីដូណាល់ ត្រាំ កាលពីថ្ងៃព្រហស្បតិ៍ បានធ្វើការសន្យាផងដែរថា នឹងមានការឆ្លើយតប នៅពេលគេប្រាប់ គាត់ពីស្ថានភាពនៅទីក្រុងហុងកុង។
“ខ្ញុំមិនដឹងថាវាជាអ្វីទេ ពីព្រោះគ្មាននរណាម្នាក់ បានដឹងនៅឡើយទេ។ ប្រសិនជាវាកើតឡើង ពួកយើងនឹងដោះស្រាយបញ្ហានោះឲ្យខ្លាំង”។
សូមបញ្ជាក់ថា នៅថ្ងៃសុក្រនេះ ចិនបានណែនាំនូវច្បាប់ថ្មីនៅក្នុងថ្ងៃទី ១ នៃកិច្ចប្រជុំសភារបស់ខ្លួន ដែលច្បាប់នោះនឹងពង្រឹងដល់ ការអនុវត្តច្បាប់នៅក្នុងទីក្រុងហុងកុង ដែលហាមឃាត់ “ការធ្វើវិទ្ធង្សនា”។ “វិទ្ធង្សនា” គឺសំដៅដល់សកម្មភាពណាមួយ ដែលបង្កផលមិនល្អ ឬបង្កើតភាពវឹកវរ ដល់ក្រុមមនុស្ស ឬក៏សង្គមទាំងមូល៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP