យោងតាមសារព័ត៌មាន China Press ហេតុការណ៍នេះបានកើតឡើងនៅ Dongguan ខេត្តក្វាងទុង។ ស្ត្រីរងគ្រោះត្រូវបានដឹងថា បានត្រាំផ្សិតខ្មៅ ឬ ត្រចៀកកណ្តុរក្នុងទឹក ដើម្បីយកមកប្រើក្នុងការចម្អិនអាហាររបស់នាង ប៉ុន្តែបានប្រើវាខ្លះប៉ុណ្ណោះ ខណៈដែលនៅសល់នៅសល់ក្នុងទឹកប៉ុន្មាន រក្សាទុកយកទៅប្រើនៅថ្ងៃបន្ទាប់។
ផ្សិតត្រចៀកកណ្តុរនេះ ជាធម្មតាត្រូវបានដាក់លក់ក្នុងទម្រង់ស្ងួត ហើយត្រូវបានយកទៅត្រាំ នៅក្នុងទឹកក្តៅ ដែលយ៉ាងហោចក៏រយៈពេល១ម៉ោង មុនពេលយកមកចម្អិនអាហារ។
ទោះយ៉ាងណា ដោយសារស្ត្រីនេះត្រាំទុកវាពេញមួយយប់ នោះបាក់តេរីក៏បានតោងជាប់លើផ្សិតត្រចៀកកណ្តុរ បណ្តាលឲ្យស្ត្រីរងគ្រោះមានអាការៈក្អួត និងលាមកខ្មៅ ក្រោយពេលបរិភោគរួច។ បន្ទាប់មក នាងត្រូវបានគេបញ្ជូនទៅមន្ទីរពេទ្យ ដើម្បីព្យាបាល។
ស្ត្រីរូបនេះត្រូវបានវិនិច្ឆ័យរកឃើញថា មានជំងឺខ្សោយថ្លើមធ្ងន់ធ្ងរ ហើយត្រូវបានគេបញ្ជូនទៅសង្គ្រោះបន្ទាន់ ប៉ុន្តែដោយសារចំណាយផ្នែកវេជ្ជសាស្ត្រខ្ពស់ ស្ត្រីរូបនេះត្រូវបានផ្ទេរទៅផ្ទះវិញ ឲ្យក្រុមគ្រួសាររបស់នាងមើលថែទៅតាមយថាកម្ម។ ដោយសារសរីរាង្គខាងក្នុងរបស់នាង រងទទួលខូចខាតកាន់តែធ្ងន់ធ្ងរទៅៗ នៅទីបំផុត នាងក៏បានស្លាប់។
ក្រោយមក គ្រូពេទ្យបានរកឃើញថា មានជាតិពុលនៅក្នុងឈាម និងទឹកនោមរបស់នាងហៅថាអាស៊ីតប៊ូរែក ដែលបណ្តាលមកពីការផលិតបាក់តេរី Pseudomonas aeruginosa ក្នុងផ្សិតខ្មៅ ឬ ត្រចៀកកណ្តុរនេះ។
អ្នកជំនាញបានចង្អុលបង្ហាញថា ផ្សិតខ្មៅ ឬ ត្រចៀកណ្តុរ វាមិនមានជាតិពុលទេ ប៉ុន្តែប្រសិនបើត្រាំក្នុងទឹកយូរពេក នោះបាក់តេរីអាចនឹងកើតឡើងមានលើវាបាន។ ពួកគេបានកត់សម្គាល់ថា ផ្សិតខ្មៅនេះគួរតែត្រូវត្រាំក្នុងទឹកត្រជាក់ ឬក្នុងទូរទឹកកកប្រហែលពី១ម៉ោងទៅ ២ម៉ោង ដោយមិនលើសពីបួនម៉ោង ហើយប្រាកដជាមិនពេញមួយយប់ទេ! នៅពេលទិញរបស់ស្រស់ៗត្រូវប្រាកដថាវាមិនស្អិតមានក្លិនស្អុយ ឬក្រៀមស្វិតខ្លាំង៕
ប្រែសម្រួល៖ លឹម ហុង (ប្រភព៖ worldofbuzz)