ភ្នំពេញ៖ កម្ពុជា បានសម្រេចកាត់បន្ថយការនាំចូលជ្រូករស់ ពីក្រៅប្រទេស រហូតដល់ទៅជាង ៧០ភាគរយ ដើម្បីលើកស្ទួយផលិតកម្មចិញ្ចឹមជ្រូកក្នុងស្រុក ធានាសន្តិសុខស្បៀង ដោយរំពឹងថា នឹងអាចផ្គត់ផ្គង់គ្រប់គ្រាន់ ដោយខ្លួនឯងនៅរយៈពេល ២ទៅ ៣ឆ្នាំខាងមុខទៀត បើគ្មានជំងឺអ្វីរាតត្បាត។
ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានសុខភាព និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ បានលើកឡើងនៅក្នុងសន្និសីទសារព័ត៌មាន កាលពីម្សិលមិញថា បច្ចុប្បន្នកម្ពុជា បាននាំចូលជ្រូករស់តែពីប្រទេសថៃប៉ុណ្ណោះ ខណៈប្រទេសវៀតណាម បានផ្អាកការនាំចូលចាប់តាំងពីឆ្នាំមុនមកម្លេះ បន្ទាប់ពីមានករណីផ្ទូះជំងឺប៉េស្តជ្រូកអាហ្វ្រិក ហើយពេលនេះប្រទេសវៀតណាម ក៏កំពុងខ្វះជ្រូកសម្រាប់ផ្គត់ផ្គង់ ក្នុងប្រទេសរបស់ខ្លួនផងដែរ។
សូមជម្រាបថា សត្វជ្រូក ដែលកំពុងចិញ្ចឹមទាំងអស់នៅកម្ពុជា មានចំនួន ២,៣លានក្បាល។ បើតាម សមាគមអ្នកចិញ្ចឹមសត្វកម្ពុជា ក្នុងមួយឆ្នាំ កម្ពុជា បានចំណាយ នាំចូលជ្រូកពីបរទេសប្រមាណ ៤០០លានដុល្លារ ហើយបើគិតទាំងមាន់ ទា និងបន្លែ កម្ពុជាត្រូវចំណាយជិត ១ពាន់លានដុល្លារ។ លោកស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា រូបនេះ បានអះអាងថា បច្ចុប្បន្នតម្លៃជ្រូករស់លក់បានពី ១១០០០រៀល ទៅ ១២០០០រៀល ក្នុងមួយគីឡូក្រាម ដែលតម្លៃនេះ គឺសមរម្យសម្រាប់អ្នកចិញ្ចឹមជ្រូកទាំងអស់ អាចរកប្រាក់ចំណេញបាន។
ឯកឧត្តម តាន់ ផាន់ណារ៉ា បានថ្លែងថា ក្នុងឆ្នាំ ២០១៩កន្លងទៅ កម្ពុជា បាននាំចូលកូនជ្រូកពូជប្រមាណ ២ម៉ឺនក្បាល សម្រាប់បម្រើដល់ការចិញ្ចឹមក្នុងស្រុក ប៉ុន្តែនៅឆ្នាំ ២០២០នេះ ការនាំចូលកូនជ្រូកពូជ មានកំណើនដល់ទៅ ៦ម៉ឺនក្បាល ដែលនេះបង្ហាញថា ផលិតកម្មចិញ្ចឹមជ្រូកកំពុងងើបឡើងវិញ ដែលរំពឹងថា ក្នុងរយៈពេល ២ទៅ ៣ឆ្នាំទៀត កម្ពុជា នឹងអាចផ្គត់ផ្គង់ជ្រូកគ្រប់គ្រាន់ ហើយមិនចាំបាច់ពឹងផ្អែកលើការនាំចូលពីក្រៅប្រទេសទៀតនោះទេ។
ឯកឧត្តម បានមានប្រសាសន៍ថា នៅអំឡុងពេលមានវិបត្តិជំងឺកូវីដ១៩ កម្ពុជាអាចផ្គត់ផ្គង់ជ្រូកបានប្រមាណ ៨២ភាគរយ និងខ្វះប្រហែ ល ១៨ភាគរយ។ ប៉ុន្តែរយៈពេលប៉ុន្មានខែមកនេះ ក្នុងពេលមានជំងឺរាតត្បាតកូវីដ១៩ តម្រូវការសាច់ជ្រូកបានធ្លាក់ចុះគួរឲ្យកត់សម្គាល់ ចំណែកការចិញ្ចឹមក្នុងស្រុកវិញមានសន្ទុះកើនឡើងយ៉ាងខ្លាំង ដូច្នេះទាមទារឲ្យយើងកាត់បន្ថយការនាំចូលពីក្រៅប្រទេស ដើម្បីលើកកម្ពស់ដល់អ្នកចិញ្ចឹមក្នុងស្រុក ឲ្យមានប្រសិទ្ធភាព។
ជាមួយគ្នានេះ ប្រធានសមាគមអ្នកចិញ្ចឹមសត្វកម្ពុជា បានគាំទ្រចំពោះចំណាត់ការ របស់ក្រសួងកសិកម្ម ដែលសម្រេចកាត់បន្ថយ ការនាំចូលជ្រូកនាពេលនេះ ដោយលោកអះអាងថា វានឹងធ្វើឲ្យការចិញ្ចឹមក្នុងស្រុក ទាំងលក្ខណៈពាណិជ្ជកម្ម និងគ្រួសារ នឹងផុសផុលឡើង ស្របពេលនេះ មានពលករខ្មែរជាច្រើន បានវិលមកពីក្រៅប្រទេសវិញ ក្នុងពិភពលោកជួបវិបត្តិជំងឺ កូវីដ១៩៕
ដោយ៖សម្ផស្ស
