ខេត្តរតនគិរី ៖ ស្ត្រីអ្នកទោសម្នាក់ឈ្មោះ បិន យាង អាយុ ៥៥ឆ្នាំ ដែលត្រូវឃុំខ្លួនក្នុងពន្ធនាគារខេត្តរតនគិរី បានស្លាប់ ពេលបញ្ជូនចេញ ពីពន្ធនាគារ ទៅមន្ទីរពេទ្យ បន្ទាប់ពីអ្នកទោសរូបនោះ មានអាការមិនស្រួលខ្លួន។
ស្ត្រីអ្នកទោសនោះ បានស្លាប់ក្រោយពេលបញ្ជូនពីពន្ធនាគារ ទៅមន្ទីរពេទ្យបង្អែកខេត្តរតនគិរី ថ្ងៃទី២១ ខែឧសភា ឆ្នា២០២០។
ក្រុមគ្រួសារសពសកម្មជនដីធ្លី អំពាវនាវឱ្យស្ថាប័នពាក់ព័ន្ធ បើកការស៊ើបអង្កេតដ៏ជាក់លាក់មួយ ដោយសង្ស័យថា សាច់ញាតិពួកគេ ដែលស្លាប់ក្នុងពន្ធនាគារក្នុងខេត្តរតនគិរី អាចជាឃាតកម្ម ។
អ្នកទោស បិន យាង អាយុ ៥៥ឆ្នាំ រស់នៅភូមិអុល ឃុំប៉ាតាង ស្រុកលំផាត់ ខេត្តរតនគិរី ត្រូវមន្ត្រីបរិស្ថានចាប់ខ្លួន កាលពីខែកុម្ភៈ ដោយចោទថា ទន្ទ្រានដីរដ្ឋ។
អាជ្ញាធរអះអាងថា អ្នកទោសរូបនោះ ស្លាប់ដោយជំងឺទឹកនោមផ្អែមធ្ងន់ធ្ងរ និងលើសឈាម បន្ទាប់ពីគាត់បានដួលក្នុងបន្ទប់ទឹក។
ពាក់ព័ន្ធនឹងស្ត្រីអ្នកទោសម្នាក់នេះ ស្លាប់ក្នុងពន្ធនាគារខេត្តរតនគិរី ត្រូវបាន អ្នកនាំពាក្យនៃអយ្យការអមសាលាដំបូងខេត្តរតនគិរី នៅថ្ងៃទី២២ខែឧសភាឆ្នាំ២០២០ បានឲ្យដឹងថា ក្នុងរយៈពេលប៉ុន្មានថ្ងៃនេះមានបណ្តាញទំនាក់ទំនងសង្គម ហ្វេសប៊ុក បានផ្សព្វផ្សាយ និងចែកចាយតៗគ្នា អំពីករណីស្លាប់របស់ជនជាប់ឃុំ ឈ្មោះ ប៊ិន យាង ភេទស្រី អាយុ៥៥ ឆ្នាំ ត្រូវបានជាប់ចោទពីបទកាប់គាស់ រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកធ្វើជាកម្មសិទ្ធិ ហើយត្រូវបានឃុំខ្លួនបណ្តោះអាសន្ននៅក្នុងពន្ធនាគារខេត្តរតនគិរីដោយចោទប្រកាន់ថា មន្ត្រីអនុរក្សពន្ធនាគារខេត្តរតនគិរី បានប្រើទារុណកម្ម វាយធ្វើបាប និងបង្ខំឲ្យសារភាពរហូតដល់ស្លាប់បាត់បង់ជីវិត។
ជនជាប់ចោទ ត្រូវបានចៅក្រមស៊ើបសួរសម្រេចឃុំខ្លួនបណ្តោះអាសន្នតាមដីការសម្រេចឃុំខ្លួនជាបណ្តោះអាសន្ន លេខ ៤៩ ចុះថ្ងៃទី២៨ ខែកុម្ភៈ ឆ្នាំ២០២០ ដោយចោទប្រកាន់ពីបទ កាប់គាស់ រុករានដីព្រៃ ឆ្ការ ដុត និងឈូសឆាយដីព្រៃដើម្បីយកធ្វើជាកម្មសិទ្ធិ ប្រព្រឹត្តនៅចំណុចព្រៃសាផុយ ស្ថិតនៅក្នុងភូមិកែងសាន់ ឃុំសេដា ស្រុកលំផាត់ ខេត្តរតនគិរី កាលពីថ្ងៃទី២៧ ខែកុម្ភៈ ឆ្នាំ២០២០។ បន្ទាប់ពីជនជាប់ឃុំបានចូលទៅក្នុងពន្ធនាគារ មន្ត្រីពេទ្យនៃពន្ធនាគារ បានធ្វើការពិនិត្យសុខភាពទៅលើជនជាប់ឃុំឃើញថា មានផ្ទុកជំងឺទឹកនោមផ្អែម និងលើសឈាមប្រចាំកាយ។
លុះដល់ថ្ងៃទី២០ ខែឧសភា ឆ្នាំ២០២០ វេលាម៉ោង ប្រហែល ១២និង៥៣នាទី យប់ អ្នកជាប់ឃុំនៅក្នុងបន្ទប់ជាមួយឈ្មោះ ប៊ិន យាង បានស្រែកឆោឡោថា ជនជាប់ឃុំឈ្មោះ ប៊ិន យាង បានចូលទៅបត់ជើងក្នុងបន្ទប់ទឹក ហើយក៏រអិលជើងដួលនៅក្នុងបន្ទប់ទឹកតែម្តង។ បន្ទាប់ពីដឹងរឿងនេះ មន្ត្រីពេទ្យនៃពន្ធនាគារក៏បានចុះទៅពិនិត្យអការ របស់ឈ្មោះ ប៊ិន យាង នោះភ្លាមៗ ឃើញថា ឈ្មោះប៊ិន យាង គឺមានអាការ និងមានសម្ពាធឈាមធម្មតា ។ លុះដល់ម៉ោងប្រហែល៥ទៀបភ្លឺ ទើបអ្នកជាប់ឃុំដូចគ្នាស្រែកប្រាប់ថា ឈ្មោះប៊ិន យាង មានអាការបម្រាសចុះបម្រាសឡើង បន្ទាប់មកបាត់មាត់បាត់ក។ ទើបមន្ត្រីពន្ធនាគារបានបញ្ជូនឈ្មោះ ប៊ិន យាង ទៅកាន់មន្ទីរពេទ្យបង្អែកខេត្តរតនគិតី ដើម្បីធ្វើការសង្គ្រោះបន្ទាន់ ប៉ុន្តែនៅពេលទៅដល់មន្ទីរពេទ្យ គឺគាត់បានស្លាប់បាត់ហើយ។
ក្រោយកើតហេតុ តំណាងអយ្យការអមសាលាដំបូងខេត្តរតនគិរី បានដឹកនាំមន្ត្រីនគរបាលបច្ចេកទេសនិងវិទ្យាសាស្ត្រចុះទៅពិនិត្យសពបានបង្ហាញថា ជនជាប់ឃុំនោះ បានស្លាប់ដោយសារជំងឺប្រចាំកាយ សម្ពាធឈាមបុកឡើងខ្លាំង ធ្វើឲ្យដាច់សរសៃឈាមក្នុងខួរក្បាល៕
ដោយ៖កូឡាប
