កំពង់ធំ៖ នៅរសៀលថ្ងៃទី ២២ ខែ ឧសភា ឆ្នាំ២០២០ លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានចូលរួមដុតកម្ទេចផលិតផលមានដើមកំណើតពីសត្វ គ្មានលិខិតអនុញ្ញាត នៅបរិវេណក្រោយការិយាល័យបសុព្យាបាល នៃមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ធំ ។
ផលិតផលដែលសមត្ថកិច្ចពាក់ព័ន្ធដុតកម្ទេចចោលរួមមាន ស្លឹកត្រចៀកជ្រូក ឆ្អឹងជំនីរ ជ្រូក ពោះវៀនជ្រូក គ្រឿងក្នុងគោ ជាដើម ដែលទម្ងន់ប្រមាណចំនួន ៩២៨ គីឡូក្រាម ពុំមានប្រភពច្បាស់លាស់ និងគ្មានលិខិតអនុញ្ញាត ដែលសមត្ថកិច្ចបង្ក្រាបបានកាលពីវេលាម៉ោង ២១ និង ៤០ នាទី នាថ្ងៃទី ១៩ ខែ ឧសភា ឆ្នាំ២០២០ ក្រោមការដឹកនាំបញ្ជាផ្ទាល់ ពីលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ និងដោយមានការសម្របសម្រួលនីតិវិធីពីលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកំពង់ធំ សហការជាមួយមន្ត្រីជំនាញ នៃមន្ទីរ កសិកម្ម រុក្ខាប្រម៉ាញ់ និងនេសាទ ខេត្តកំពង់ធំ បង្ក្រាបករណី ដឹកជញ្ជូនផលិតផល មានដើមកំណើតពីសត្វ គ្មានលិខិតអនុញ្ញាត ស្ថិតនៅភូមិ កកោះ ស្រុក សន្ទុក ខេត្តកំពង់ធំ ដកហូតបានវត្ថុតាង រថយន្ត សាំងយ៉ុង ពណ៌ ស ចំនួន ១ គ្រឿង ពាក់ផ្លាកលេខ ភ្នំពេញ 2AN-1029 ដឹកជញ្ផូនផលិតផល មានដើមកំណើតពីសត្វ គ្មានលិខិតអនុញ្ញាតចំនួន ១៦ ឡាំងស្នោ ស្មើនឹងចំនួន ៩២៨ គីឡូក្រាម ៕
ដោយ៖កូឡាប
