ភ្នំពេញ៖ ដូចដែលប្រិយមិត្តបានជ្រាបរួចហើយ ក្នុងរយៈពេលប៉ុន្មានថ្ងៃនេះ ហ្គេមអនឡាញឈ្មោះ Jumpy Jumpy បានបង្កការអុកឡុករំខានដល់អ្នកប្រើប្រាស់ហ្វេសប៊ុកយ៉ាងច្រើន ដែលធ្វើឲ្យមានការយល់ច្រឡំ និងចោទប្រកាន់គ្នា រហូតធ្វើឲ្យមានការក្តៅក្រហាយដាក់គ្នាយ៉ាងខ្លាំង ព្រោះថា ហ្គេមនេះបានភ្ជាប់រូប Profile អ្នកនេះអ្នកនោះ (ទាំងដែលមិនចេះ ឬ មិនបានចូលលេងផង ) ដោយអ្នកលេងហ្គេមនេះមួយចំនួនបានសរសេរ Caption នូវពាក្យដ៏អសុរសដូចជា ជំពាក់លុយមិនសងជាដើម។
ជាក់ស្តែង បងស្រីជាអាជីវករម្នាក់ដែលមានគណនីហ្វេសប៊ុកឈ្មោះ Kim Nay Cheang បានប្រតិកម្មយ៉ាងខ្លាំង ដោយបានព្រមានទៅដល់អ្នកបង្កើតហ្គេមមួយនេះ ឲ្យប្រញាប់លុបរូប Profile របស់គាត់ចេញភ្លាមៗ កុំចេះតែដើរដាក់ចោទប្រកាន់ថារូបគាត់ជំពាក់លុយគេមិនព្រមសងបែបនេះ ទាំងដែលគាត់ពុំដឹងខ្យល់អីសោះ។ បងស្រីក៏បានបញ្ជាក់ឲ្យបងប្អូនសាធារណជនបានជ្រាបថា គាត់ពុំដែលជំពាក់លុយអ្នកណានោះទេ តែផ្ទុយទៅវិញ គឺមានតែគេទេដែលកំពុងជំពាក់លុយគាត់រាល់ថ្ងៃនេះ។
ទោះយ៉ាងណា អ្នកជំនាញបានបញ្ជាក់ថា សូមបងប្អូនឈប់ព្រួយបារម្ភទៀតទៅ ព្រោះមានវិធីសាស្ត្រទប់ស្កាត់ មិនឲ្យហ្គេម Jumpy Jumpy ឬ ហ្គេមមួយចំនួនទៀត អាចបន្តអុកឡុករំខានលោក-អ្នកទៀតឡើយ ។
នេះបើយោងតាមទំព័រហ្វេសប៊ុក នាយកដ្ឋានព័ត៌មានវិទ្យា ក្រសួងមហាផ្ទៃ Depatment of IT, Ministry of Interior បានធ្វើការពន្យល់ និងក៏ដូចណែនាំអំពីវិធីសាស្ត្រទប់ស្កាត់ចំពោះហ្គេមនេះដូចខាងក្រោម៖ នាយកដ្ឋានព័ត៌មានវិទ្យា៖ នៅពេលថ្មីៗនេះមានហ្គេមមួយប្រភេទដែលជា Instant Game ឈ្មោះ Jumpy Jumpy និងហ្គេមផ្សេងៗមួយចំនួនទៀត បានកំពុងអុកឡុកអ្នកប្រើប្រាស់បណ្តាញសង្គម Facebook មួយចំនួនធំនៅក្នុងព្រះរាជាណាចក្រកម្ពុជា ដែលអាចទាយរករូប Profile របស់គណនី Facebook មកបង្ហាញលើអត្ថបទហ្គេម និងមានការចែករំលែកបន្ត ដោយអ្នកលេងហ្គេមនេះបានប្រើពាក្យអសីលធម៌លើចំណងជើងអត្ថបទ ដែលធ្វើឱ្យអ្នកប្រើប្រាស់មានការយល់ច្រឡំថា បុគ្គលនោះយករូបខ្លួនទៅផុស និងធ្វើឱ្យប៉ះពាល់ដល់កិត្តិយសអ្នកប្រើប្រាស់យ៉ាងធ្ងន់ធ្ងរ។
គួរបញ្ជាក់ផងដែរថា៖ ហ្គេមនេះបង្កើតឡើងក្នុងគោលបំណងសម្រាប់បងប្អូនដែលមានគណនី Facebook លេងកម្សាន្ត ហើយអ្នកបង្កើតហ្គេមប្រភេទ Instant Game ដើម្បីរកប្រាក់ចំណូលតាមរយៈការទិញ Items ឬបានមកពីការផ្សាយពាណិជ្ជកម្មផ្សេងៗ។ ដើម្បីរក្សាបាននូវសេចក្ដីថ្លៃថ្នូរ សីលធម៌សង្គម អ្នកលេងហ្គេមទាំងអស់ គួរបញ្ឈប់នូវសកម្មភាពខាងលើជាបន្ទាន់។
ប្រសិនបងប្អូនអ្នកប្រើប្រាស់បណ្តាញសង្គម ជួបនូវបញ្ហាដូចរៀបរាប់ខាងលើ អាចធ្វើការ R e port អត្ថបទហ្គេមនេះបាន ដោយអនុវត្តវិធីសាស្ត្រ ដូចខាងក្រោម៖ នៅផ្នែកខាងស្តាំលើអត្ថបទ ចុចលើសញ្ញា “…”។ ជ្រើសរើសយក “Find Support or R e port Post”។ ជ្រើសរើសយក “Spam” -> “Next” -> “Done”។ បើអ្នកបានលេងហ្គេមនេះ អាចចូលទៅលុបវាបាន តាមរយៈ៖ ក្នុងគណនី Facebook ជ្រើសរើសយក Settings -> Instant Games ។ ធ្វើការ Remove ប្រភេទហ្គេមដូចរៀបរាប់ខាងលើ (ឧទាហរណ៍៖ Jumpy Jumpy ជាដើម)”៕
ដោយ៖ លឹម ហុង
