ប្រទេសចិនបានប្រកាសថា គ្មានអ្នកឆ្លងវីរុសកូរ៉ូណាថ្មីណាម្នាក់ឡើយនៅសុក្រ ដែលវាគឺជាករណី គ្មានអ្នកឆ្លងលើកដំបូង ចាប់តាំងពីមានការផ្ទុះរាតត្បាត ចេញពីទីក្រុងវូហាន កាលពីចុងឆ្នាំមុន។
គណៈកម្មការសុខាភិបាលជាតិចិន បានថ្លែងក្នុងសេចក្តីប្រកាស ថ្ងៃសៅរ៍នេះថា នៅថ្ងៃសុក្រ មិនមានអ្នកឆ្លងសូម្បីម្នាក់ ធៀបទៅនឹងថ្ងៃព្រហស្បតិ៍ ដែលមានការឆ្លងថ្មី ៤ករណី។ ទោះយ៉ាងណាក៏ដោយ ក៏មានករណីសង្ស័យចំនួន ២។
ករណីឆ្លងថ្មីនៅក្នុងប្រទេស មានការធ្លាក់ចុះយ៉ាងខ្លាំង ចាប់តាំងពីខែមីនាមក ខណៈដែលវិធានការរឹតបន្តឹង របស់រដ្ឋាភិបាល លើការដើរហើរបស់ប្រជាជន បានជួយគ្រប់គ្រងការឆ្លងរាតត្បាត នៅក្នុងប្រទេស។
ប៉ុន្តែក្នុងរយៈពេលប៉ុន្មានសប្តាហ៍ចុងក្រោយនេះ ចិនបានរកឃើញអ្នកឆ្លងថ្មីជាបន្តបន្ទាប់ ប៉ុន្តែភាគច្រើនជាករណីឆ្លងមកពីខាងក្រៅ នៅពេលដែលប្រជាជនចិន បានវិលត្រឡប់មកពីប្រទេសក្រៅវិញ។
ចិន ដែលមានប្រជាជនសរុប ១,៤ពាន់លាននាក់ មានអ្នកឆ្លងវីរុសសរុបចំនួន ៨២.៩៧១នាក់ និងស្លាប់ ៤.៦៣៤នាក់ ខណៈដែលអ្នកជាសះស្បើយមាន ៧៨.២៥៨នាក់។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងដំបូង ចេញពីប្រទេសចិន កាលពីចុងឆ្នាំ ២០១៩ ហើយរហូតមកដល់ពេលនេះ វីរុសមរណៈនេះ បានឆ្លងរាតត្បាតទៅកាន់មនុស្សជាង ៥,២១លាននាក់ និងសម្លាប់មនុស្សជាង ៣៣៨.០០០នាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters/AFP
