យោងតាមសារព័ត៌មាន Xinhua បានចេញព័ត៌មានទាន់ហេតុការណ៍ នៅថ្ងៃទី២៣ ខែឧសភា ឲ្យដឹងថា ក្រុមអ្នកជួយសង្គ្រោះបានរកឃើញសាកសពចំនួន ៩៧ នាក់ ពីកម្ទេចកម្ទីនៃយន្ដហោះមួយគ្រឿង ដែលបានធ្លាក់នៅតំបន់ផ្ទះប្រជាពលរដ្ឋ នៃកំពង់ផែ Karachi ភាគខាងត្បូងរបស់ប៉ាគីស្ថាន កាលពីថ្ងៃទី២២ ខែឧសភា។
ជុំវិញហេតុការណ៍សោកនាដកម្មដ៏រន្ធត់នេះ បើតាម apnews បានផ្សាយឲ្យកាលពីយប់មិញ (២២ ឧសភា) ថា យន្តហោះ១គ្រឿង ដឹកអ្នកដំណើរចំនួន ៩៨ នាក់ បានធ្លាក់កាលពីថ្ងៃសុក្រ នៅក្នុងតំបន់ផ្ទះប្រជាពលរដ្ឋ រស់នៅកុះករ ក្បែរព្រលានយន្តហោះ នៃទីក្រុងកំពង់ផែ Karachi ប្រទេសប៉ាគីស្ថាន បន្ទាប់ពីមានបញ្ហាម៉ាស៊ីន មិនដំណើរការអំឡុងពេលចុះចត។
មន្ត្រីបាននិយាយថា មានអ្នកនៅរស់រានមានជីវិតពីរនាក់ ដែលជិះលើយន្តហោះនេះ ប៉ុន្តែពួកគេក៏បានរកឃើញសាកសព យ៉ាងហោចណាស់ ៥៧ នាក់ នៅក្នុងបំណែកយន្តហោះ បន្ទាប់ហេតុការណ៍បានកើតឡើងភ្លាមៗ។
គេមិនទាន់ដឹងថា តើមានមនុស្សប៉ុន្មាននាក់ នៅលើដី បានរងរបួស ដោយសារគ្រោះថ្នាក់ធ្លាក់យន្តហោះ របស់ក្រុមហ៊ុនអាកាសចរណ៍អន្ដរជាតិប៉ាគីស្ថាន ប្រភេទ Airbus A320 នេះ ដែលបានធ្លាក់ចូលទៅក្នុងផ្លូវមួយ ហើយបានបំផ្លាញផ្ទះយ៉ាងតិច ៥ ខ្នង។
អាកាសយានិកបានបញ្ជូនសញ្ញា “ជួយផង យន្តហោះកំពុងមានបញ្ហាហើយ!” ទៅកាន់ប៉មព្រលានយន្តហោះភ្លាមៗ មុនពេលធ្លាក់យន្តហោះ ដែលមានលេខជើងហោះហើរ 8303 ដែលកំពុងហោះចេញពី Lahore ទៅកាន់ Karachi ហើយក៏កំពុងដឹកមនុស្សជាច្រើន សម្រាប់ចូលរួមថ្ងៃបុណ្យអ៊ីស្លាម Eid al-Fitr ផងដែរ។
វីដេអូនៅលើបណ្តាញសង្គម បានបង្ហាញឲ្យឃើញយន្តហោះនេះ បានបន្ទាបខ្លួន ចុះជាមួយអណ្តើតភ្លើង ចេញពីម៉ាស៊ីនម្ខាងរបស់វា។ យន្តហោះនេះ បានធ្លាក់ចុះនៅវេលាម៉ោង ២និង៣៩នាទីរសៀលថ្ងៃទី២២ខែឧសភា ស្ថិតនៅភាគឦសាន នៃព្រលានយន្តហោះអន្តរជាតិ Jinnah៕
ប្រែសម្រួល៖ លឹម ហុង (ប្រភព៖ xinhuanet/ apnews)
