យុវតីម្នាក់ដែលមានរូបឆោមស្រស់ស្រស់ភា ជាមួយស្នាមញញឹមយ៉ាងស្រស់ស្រាយជានិច្ច ក្រឡេកមួយភ្លែតស្រម៉ៃស្មានថាជាកូនខ្មែរ តែតាមពិតជាជនជាតិម៉ាឡេស៊ី បាននិងកំពុងល្បីល្បាញយ៉ាងខ្លាំង នៅលើបណ្តាញសង្គមជាពិសេស Youtube តាមរយៈវីដេអូយ៉ាងច្រើន បង្ហាញពីជំនាញវាយស្គតន្ត្រីអកកេះដ៏ស្ទាត់ជំនាញបំផុតរបស់នាង ដែលគ្រប់គ្នានឹកស្មានពុំដល់។
Nur Amira Syahira ឆ្នាំនេះនាងមានអាយុ ១៧ ឆ្នាំ ហើយ។ នាងមានឆាណែលផ្ទាល់ខ្លួនមួយ ដោយដាក់ឈ្មោះរបស់នាងផ្ទាល់ ដែលបច្ចុប្បន្ននេះ ឆាណែល Youtube របស់នាង មានអ្នក Subcribe រហូតដល់ 2.13M (ជាង២លាននាក់)។
Nur Amira Syahira មានអាយុទើបតែ ៨ ឆ្នាំប៉ុណ្ណោះ នៅពេលដែលនាងចាប់យកស្គរដំបូងរបស់នាង។ ក្នុងចំណោមឧបករណ៍ភ្លេងទាំងអស់ដែលនាងបានឃើញ គឺស្គបានទាក់ទាញចំណាប់អារម្មណ៍របស់នាងជាខ្លាំង។ ព្រោះនាងគិតថាវាចម្លែក និងគួរឱ្យចាប់អារម្មណ៍ដែលវាមានរាង និងទំហំខុសៗគ្នាជាច្រើន ហើយនាងពិតជាចង់សាកល្បងវាណាស់។ បន្ទាប់មក នាងក៏បានបញ្ចុះបញ្ចូលឪពុកម្តាយរបស់នាង ផ្តល់ស្គជាន់១ឈុតសម្រាប់នាង។ ហើយនៅទីបំផុត នាងក៏បានក្លាយជាអ្នកវាយស្គស្រីវ័យដែលគេស្វែងរកច្រើនបំផុតនៅក្នុងប្រទេស។
ក្នុងរយៈពេលតែ ៥ ឆ្នាំ ប៉ុណ្ណោះ ឆាណែល Youtube របស់នាង មានវីដេអូ Cover ស្គជាង ២០០ វីដេអូ ទទួលបានការបើកមើល (View) ជាង ៤៣ លានដង។ ទន្ទឹមនោះផងដែរ នាងក៏ទទួលបានប៊ូតុង Silver Play ពីក្រុមហ៊ុន Youtube សម្រាប់ឆាណែលរបស់នាងដែលបានឡើងដល់ 100,000 subcribes ដែលធ្វើឲ្យនាងមានមោទនភាពយ៉ាងខ្លាំងតែម្តង។
ពិតមែនហើយ អ្វីដែលធ្វើឲ្យនាងទទួលបានការគាំទ្រលើសលប់បែបនេះ គឺដោយសារតែនាងពុំត្រឹមតែអាចមានសមត្ថភាពវាយស្គដ៏ល្អប៉ុណ្ណោះ ប៉ុន្តែ ការចេះលេងកាយវិការ និងទឹកមុខម្ញិកម្ញក់ ទៅតាមចង្វាក់ភ្លេងផងនោះ បានធ្វើឲ្យអ្នកទស្សនាពេញចិត្តជាខ្លាំង៕
ប្រែសម្រួល៖ លឹម ហុង (ប្រភព៖ rojakdaily)
