ភ្នំពេញ៖ រថយន្តដឹកសម្ភារអគ្គិសនីមួយគ្រឿង ត្រូវអគ្គិភ័យឆេះយ៉ាងសន្ធោសន្ធៅ បង្កឲ្យមានកាភ្ញាក់ផ្អើលកាលពីវេលាម៉ោង១និង៣០នាទីថ្ងៃទី២៣ ខែឧសភា ឆ្នាំ២០២០ ស្ថិតនៅចំណុចផ្ទះលេខ៣៤អឺ បុរីទ្បាយគង់ ផ្លូវលេខ២អា កែងផ្លូវលេខ៣ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឲ្យដឹងថា ម្ចាស់រថយន្ដឈ្មោះអ៊ួន រាជ ភេទប្រុស អាយុ២៩ឆ្នាំ ស្នាក់នៅផ្ទះលេខ៣៤អឺ បុរីឡាយ គង់ ផ្លូវលេខ២អា កែងផ្លូវលេខ៣ ភូមិម័ល សង្កាត់ដង្កោ ខណ្ឌដង្កោ មុខរបរលក់គ្រឿងអគ្គិសនី។
សមត្ថកិច្ចបានឲ្យដឹងថា មូលហេតុគឺបណ្តាលមកពីផ្ទុះផ្ទាំងសូឡា ដែលចាប់ជាប់នៅនឹងរថយន្ត ទើបមានផ្សែងហុយចេញ និងអណ្ដាតភ្លើងឆេះយ៉ាងសន្ធោសន្ធៅ។ រថយន្តរងកាខូចខាតរថយន្ត១គ្រឿង ម៉ាកហ៊ីយ៉ាន់ដាយ ពណ៌ស ផ្លាកលេខភ្នំពេញ 3E-9020 ចំណុះ៣,៥តោន និងសម្ភារអគ្គិសនី ក្នុងរថយន្ដគិតជាប្រាក់ប្រមាណជិត៤ម៉ឺនដុល្លារ ក្នុងករណីនេះ មិនបណ្តាលឲ្យមានអ្នករងរបួសឬស្លាប់នោះទេ។
សមត្ថកិច្ចបានបន្តទៀតថា ក្នុងហេតុការណ៍នោះ សមត្ថកិច្ចបានប្រើប្រាស់រថយន្តពន្លត់អគ្គិភ័យសរុប៣គ្រឿង គឺរថយន្ដពន្លត់អគ្គិភ័យចំណុះស្នងការដ្ឋាននគរបាលរាជធានីភ្នំពេញ ចំនួន២គ្រឿង និងរថយន្ដពន្លត់អគ្គិភ័យ ចំណុះបញ្ជាការដ្ឋានកងរាជអាវុធហត្ថរាជធានីភ្នំពេញ ចំនួន១គ្រឿង ពន្លត់ចប់នៅម៉ោង១៤និង១៧នាទី នាថ្ងៃខែឆ្នាំដដែល៕
ដោយ៖សហការីCEN