ប្រិយមិត្ត និងមិត្តៗយុវវ័យជាច្រើន ប្រាកដណាស់បានស្គាល់ និងធ្លាប់ស្តាប់រួចហើយ នូវបទចម្រៀងពិរោះៗជាច្រើនរបស់កញ្ញា វី ឌីណែត តាមរយៈបណ្តាញសង្គម Youtube។
កញ្ញា ឌីណែត ត្រូវបានចាត់ទុកថា ជាតារាចម្រៀងមួយដួងមានទឹកដមសំឡេងល្អ (ធ្ងន់) ។ បើទោះបីជារូបនាងទើបបានចូលប្រឡូកក្នុងវិស័យសិល្បៈយ៉ាងណាក្តី តែគិតមកទល់ពេលនេះ ប្រជាប្រិយភាពរបស់នាង ត្រូវបានគេសង្កេតឃើញថា ហាក់លោតឡើងខ្លាំង ព្រោះមានកម្មវិធីនានា ឬបណ្តាខោនសឺតធំៗ បានអញ្ជើញរូបនាងឲ្យទៅច្រៀងជាតារាកិត្តិយសជាហូរហែផងដែរ។
ពិតណាស់ ជឿជាក់ថា ប្រិយមិត្ត និងមិត្តយុវវ័យមួយចំនួនធំ មិនបានចាប់អារម្មណ៍ថា កញ្ញា វី ឌីណែត គឺជាកូនស្រីបង្កើតរបស់តារាចម្រៀងជើងចាស់ លោក ហួរ ឡាវី នោះទេ។ ហើយក៏មិននឹកស្មានថា តារាចម្រៀងជើងចាស់រហស្សនាមសំឡេងស្អករូបនេះ មានកូនស្រីស្រស់ស្អាត និងមានទឹកដមសំឡេងក្រអួនក្រអៅ ដែលកំពុងតែអង្រួនវិស័យសិល្បៈយ៉ាងនេះនោះដែរ។
តារាចម្រៀងស្រីប្រចាំផលិតកម្ម រស្មីហង្សមាស កញ្ញា វី ឌីណែត ប្រឡូកក្នុងវិស័យសិល្បៈ អស់រយៈពេលជាង៥ឆ្នាំមកនេះ គេសង្កេតឃើញថា វី ឌីណែត ពិតជាមានភាពល្បីល្បាញ និងមមាញឹកជាមួយនឹងការងារសឹងរកពេលសម្រាកគ្មាន៕
ដោយ៖ លឹម ហុង