ស្ត្រីខូចចិត្តម្នាក់ បានសម្រេចចិត្តដាក់ទណ្ឌកម្មទៅលើអតីតមិត្តប្រុសរបស់នាង ដែលបានបោកប្រាស់នាង ដោយផ្ញើខ្ទឹមបារាំងមួយតោនទៅគាត់ ក្នុងបំណងដើម្បីធ្វើឱ្យគាត់យំដូចរូបនាងដែរ។
យោងតាមសារព័ត៌មានក្នុងស្រុកបានឲ្យដឹងថា នារីរូបនោះដែលត្រូវបានគេស្គាល់ឈ្មោះហៅក្រៅថា Zhao បានបន្សល់ទុកនូវអារម្មណ៍ឈឺចាប់យ៉ាងខ្លាំង បន្ទាប់ពីត្រូវបានដៃគូរបស់នាងបោះបង់ចោលអស់រយៈពេលជាងមួយឆ្នាំ។
រូបភាពមួយដែលត្រូវបានផ្សព្វផ្សាយដោយប្រព័ន្ធផ្សព្វផ្សាយចិន បានបង្ហាញឲ្យឃើញអតីតមិត្តប្រុសរបស់នាង កំពុងឈរមើលគំនរបន្លែ បន្ទាប់ពីបន្លែទាំងនោះត្រូវបានបញ្ជូនទៅដល់មុខទ្វារក្នុងផ្ទះបស់គាត់។
Zhao មានការខឹងសម្បារយ៉ាងខ្លាំង នៅពេលដែលដឹងថា អតីតគូស្នេហ៍របស់នាងមិនបានស្រក់ទឹកភ្នែកទេ បន្ទាប់ពីបែកគ្នា ខណៈពេលដែលនាងវិញ យំឆ្អែតអស់រយៈពេល ៣ ថ្ងៃ។
ហេតុនេះ នាងក៏បានគិតឃើញនូវគំនិតនេះ ដោយបានកូម្ម៉ង់ទិញខ្ទឹមបារាំងក្រហមមួយតោន និងឲ្យអ្នកលក់ដឹកជញ្ជូនទៅដល់មុខទ្វារផ្ទះរបស់អតីតមិត្តប្រុសរបស់នាង ជាមួយនឹងសំបុត្រមួយសរសេរថា “ខ្ញុំបានយំឆ្អែតបីថ្ងៃហើយ ឥឡូវនេះវាដល់វេនរបស់អ្នកវិញម្តង” ។
តាមរយៈវីដេអូនៅលើបណ្តាញសង្គម បានបង្ហាញឲ្យឃើញអ្នកបើកបរឡានដឹកទំនិញម្នាក់ ដែលបានដឹកខ្ទឹមក្រហមទាំងនៅប្ញស បានកំពុងគាត់ព្យាយាមទាក់ទងជាមួយមិត្តប្រុសរបស់នាង Zhao ស្ថិតនៅក្នុងបរិវេណផ្ទះរបស់គាត់នៅក្នុងទីក្រុង Zibo ខេត្តសានដុង ភាគខាងកើតប្រទេសចិន កាលពីថ្ងៃសៅរ៍។
ទោះយ៉ាងណា នៅក្នុងសំបុត្របង្គាប់មួយ អាចត្រូវបានឃើញនៅក្នុងឃ្លីប ជាមួយការណែនាំស្នើមិនឲ្យអ្នកដឹក ទាក់ទងទៅកាន់អ្នកទទួលឡើយ ដោយគ្រាន់តែចាក់ខ្ទឹមចោលនៅមុខទ្វារផ្ទះជាការស្រេច។
បន្ទាប់ពីខកខានមិនបានទាក់ទងទៅកាន់អតីតមិត្តប្រុសរូបនោះបាន អ្នកដឹកត្រូវបានដឹងថា បានចំណាយពេលជាង៤ម៉ោង ដើម្បីជញ្ជូនខ្ទឹមបារាំងពីលើរថយន្ត ទៅដាក់នៅមុខទ្វារផ្ទះរបស់បុរសនោះ។
ទោះយ៉ាងណា រឿងរ៉ាវដ៏ហួសចិត្តនេះ គេពុំបានដឹងថាតើអតីតមិត្តរបស់នាង ស្រែកយំដូចរូបនាង ឬ ក៏សប្បាយចិត្តយ៉ាងណានោះទេ ពេលបានឃើញគំនរខ្ទឹមបារាំងមកដល់មុខផ្ទះបែបនេះ៕
ប្រែសម្រួល៖ លឹម ហុង (ប្រភព៖ DailyMail)
