ភ្នំពេញ៖ គណៈសង្ឃនាយក បានចាត់ទុកទស្សនៈរបស់លោក ខាន់ សុវណ្ណ បានបង្កប់នូវអត្ថន័យខ្លឹមសារ និងការឆ្លុះបញ្ចាំងពីភាពអសីលធម៌ គំនិតលាមក និងភាពយង់ឃ្នងសាហាវឃោរឃៅព្រៃផ្សៃបំផុត, ប្រមាថមាក់ងាយមកលើព្រះសង្ឃពុទ្ធសាសនា។ លោក ខាន់ សុវណ្ណ បានចេញមុខធ្វើលិខិតសូមខមាទោសព្រះសង្ឃខ្មែរ នៅទូទាំងប្រទេស ចំពោះកំហុសឆ្គងរបស់ខ្លួន ដែលលើកជាទស្សនៈ ចង់ឱ្យមានការផ្សឹកព្រះសង្ឃព្រះជន្មក្រោម៥៦វស្សា ដើម្បីបំពេញកម្លាំងពលកម្មផ្នែកសំណង់។
លោកពេជ្រ ស្រស់ បានថ្លែងថា លោក ខាន់ សុវណ្ណ ភ្ញាក់ខ្លួនដូចខ្មោចងាប់បាន៧ថ្ងៃ ក្រោយត្រូវព្រនង់យ៉ាងធ្ងន់ក្បែរជាប់គុក ទើបចេញលិខិតសុំទោសផ្លូវការ ប៉ុន្តែលិខិតសុំទោសនេះគឺគ្មានលក្ខណៈបែបបទរដ្ឋបាលបន្តិចសោះ ហើយជារឿយៗតានេះ
អួតខ្លួនជាអ្នកជ្រៅជ្រះលើកិច្ចការងារណាស់ ហើយលិខិតសុំទោសនេះធ្វើដូចកូនក្មេងលេង។
ក្នុងលិខិតសូមខមាទោស ប្រគេនទៅគណៈសង្ឃនាយក នៅថ្ងៃទី២៣ ខែឧសភា ឆ្នាំ២០២០នេះ លោក ខាន់ សុវណ្ណ បានថ្លែងថា ខ្ញុំព្រះករុណាសូមទទួលយកកំហុសនេះ និងសូមសម្តែងការសោកស្ដាយ ចំពោះអ្វីដែលបានកើតឡើង ដោយខ្វះការពិចារណា និងសុំព្រះរាជទានទោសពីសំណាក់គណៈសង្ឃនាយក នៃព្រះរាជាណាចក្រកម្ពុជា។
សូមបញ្ជាក់ថា ការចេញមកសុំទោសនេះ បានកើតមានឡើង ក្រោយពេលមានការប្រតិកម្មជាខ្លាំង ពីគណៈសង្ឃនាយក នៃព្រះរាជាណាចក្រកម្ពុជា ចំពោះការលើកឡើងជាទស្សនៈ របស់លោក ខាន់ សុវណ្ណ ចង់ឱ្យមានការផ្សឹកព្រះសង្ឃ មានព្រះជន្មក្រោម ៥៦ព្រះវស្សា ដើម្បីបំពេញកម្លាំងពលកម្មក្នុងវិស័យសំណង់ និងវិស័យផ្សេងៗទៀត។
ក្នុងសេចក្តីថ្លែងការណ៍ របស់គណៈសង្ឃនាយក កាលពីថ្ងៃទី២០ ខែឧសភា កន្លងទៅនេះ គណៈសង្ឃនាយក បានចាត់ទុកទស្សនៈរបស់លោក ខាន់ សុវណ្ណ បានបង្កប់នូវអត្ថន័យខ្លឹមសារ និងការឆ្លុះបញ្ចាំងពីភាពអសីលធម៌ គំនិតលាមក និងភាពយង់ឃ្នងសាហាវឃោរឃៅព្រៃផ្សៃបំផុត, ប្រមាថមាក់ងាយមកលើព្រះសង្ឃពុទ្ធសាសនា គ្រប់លំដាប់ថ្នាក់ទូទាំងប្រទេស, បង្វែរគំនិតមហាជនឱ្យដើរជាន់ដានប្រវត្តិសាស្ត្រ ល្វីងជូរចត់(បីឆ្នាំប្រាំបីខែម្ដែថ្ងៃ) ជារបប ខ្មៅងងឹតទមិឡឥតសាសនា ដែលពិភពលោក និងមនុស្សជាតិស្អប់ខ្ពើមជាទីបំផុត។
គណៈសង្ឃនាយក ក៏បានចាត់ទុកទស្សនៈលោក ខាន់ សុវណ្ណ ជាគំនិតខ្វះការគិតគូរវែងឆ្ងាយ ខ្វះពិសោធន៍ ខ្វះចំណេះដឹងប្រវត្តិសាស្ត្រ គ្មានសុចរិតភាព គ្មាន ភាពយុត្តិធម៌ និងគ្មានសេចក្ដីថ្លៃថ្នូរ ក្នុងការប្រើប្រាស់សំណេរ និងការបញ្ចេញមតិ ហើយបង្កើតនូវភាពឈឺចាប់ និងការចងកម្មពៀរវេរាដល់យុវសង្ឃ និងពុទ្ធបរិស័ទ៕ដោយ៖កូឡាប
