បន្ទាយមានជ័យ ៖ នៅថ្ងៃអាទិត្យ ទី២៤ ខែឧសភា ឆ្នាំ២០២០ នៅវេលាម៉ោង ១១និង០០នាទី កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំបញ្ជាផ្ទាល់ដោយលោកអនុសេនីឯក សរ សុភក្ត្រា មេបញ្ជាការស្តីទីមូលដ្ឋាន អាវុធហត្ថក្រុងប៉ោយប៉ែត សហការជាមួយ ការិយាល័យសេដ្ឋកិច្ច និងអភិវឌ្ឍន៍សហគមន៍ក្រុងប៉ោយប៉ែត រួមជាមួយការិយាល័យផលិតកម្ម និង បសុព្យាបាល(ពេទ្យសត្វ) ក្រុងប៉ោយប៉ែត បង្ក្រាបករណី ដឹកជញ្ជូនទំនិញខុសច្បាប់ (ត្រចៀកជ្រូក,ថ្លើមជ្រូក,ពោះវៀនជ្រូក,ក្រពោះជ្រូក,ខួរជ្រូក) នៅចំណុចភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមាជ័យ ឃាត់រថយន្តចំនួន ២គ្រឿង រួមនឹងតៃកុងរថយន្ត២នាក់។
រថយន្តចំនួន ២គ្រឿងដែលដឹកជញ្ជូនទំនិញខុសច្បាប់ គឺ១.រថយន្តម៉ាកតូយូតាស៊ីណា ពណ៌ស ពាក់ផ្លាកលេខភ្នំពេញ2AL:2355 (បើកបរដោយឈ្មោះ រិទ្ធី យ៉ា ភេទប្រុស អាយុ២៩ឆ្នាំ រស់នៅភូមិអូរឫស្សីទី១ សង្កាត់អូរឫស្សី ខណ្ឌ៧មករា រាជធានីភ្នំពេញ) ទំនិញចំនួន ១០កេះស្នោ។ ២.រថយន្តម៉ាក ហាយឡេនដឺ ពណ៌ស្ករ ពាក់ផ្លាកលេខភ្នំពេញ 2I-2728 (បើកបរដោយឈ្មោះ វង្ស សុខម៉ានីន (ហៅដារ៉ា) ភេទប្រុស អាយុ៣៣ឆ្នាំ រស់នៅភូមិសំរោង ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ ទំនិញចំនួន ៦កេះស្នោ ទំនិញសរុបមានចំនួន ១៦កេះស្នោ ស្មើនឹងចំនួន ៨៤០គីឡូក្រាម។
ក្រោយពីធ្វើកំណត់ហេតុ វត្ថុតាង និងអ្នកបើកបររថយន្ត២នាក់ ត្រូវបានកម្លាំងសមត្ថកិច្ច ប្រគល់ជូនមន្ត្រីជំនាញ អនុវត្តតាមនីតិវិធី៕
ដោយ៖បញ្ញាស័ក្តិ
