ករណីគ្រោះធម្មជាតិរន្ទះបាញ់ដើមឈើ ជាពិសេសដើមឆ្នោត ជឿជាក់ថាមនុស្សជាច្រើនធ្លាប់តែបានឃើញផ្នែកនៃកំពូលរបស់វាឆេះខ្លោច និងកម្របានឃើញណាស់ករណីមានអណ្តាតភ្លើងឆេះសន្ធោសន្ធៅបែបនេះ ។ ជាក់ស្តែងករណីមួយនេះ បានធ្វើឲ្យយើងគ្រប់គ្នាស្លុតរន្ធត់គួរឲ្យខ្លាចខ្លាំងបំផុត ខណៈឃើញដើមឆ្នោត១ដើមត្រូវរន្ទះបាញ់ឆេះរហូត២កន្លែង ជាមួយអណ្តាតភ្លើងឆេះយ៉ាងសាហាវជាងទុស្សេខ្សែភ្លើងទៅទៀត។
យោងតាមអ្នកប្រើប្រាស់បណ្តាញបណ្តាញសង្គម ហេតុការណ៍ដ៏សាហាវកម្របានឃើញនេះ បានកើតឡើងនៅក្នុងភូមិគោក សង្កាត់ព្រះព្រៃ ក្រុងពោធិ៍សាត់ ខេត្តពោធិ៍សាត់ កាលពីរសៀលថ្ងៃទី២៤ ខែឧសភា ឆ្នាំ២០២០ ខណៈមេឃកំពុងរលឹមស្រិចៗ។
តាមរយៈវីដេអូ បានបង្ហាញឲ្យឃើញផ្នែកខាងចុងនៃដើមឆ្នោតនោះ ត្រូវបានភ្លើងឆេះយ៉ាងសន្ធោសន្ធៅ រីឯពាក់កណ្តាលដើមរបស់វាក៏ឆេះដូចគ្នាផងដែរ។ ដោយសារតែឃើញស្ថានភាពភ្លើងឆេះកាន់តែខ្លាំង ហើយកម្ទេចភ្លើងក៏បានជ្រុះមកពីលើ បណ្តាលឲ្យឆេះផ្នែកនៅលើដី ដែលអាចរាលដាលដល់ផ្ទះរបស់ពួកគាត់ បងប្អូនអ្នកភូមិក៏បាននាំគ្នាយកទឹកមកពន្លត់ផងដែរ៕ ដោយ៖ លឹម ហុង
ចង់ដឹងថា រន្ទះបាញ់ដើមឆ្នោតឆេះសាហាវយ៉ាងណា សូមទស្សនាវីដេអូខាងក្រោមទាំងអស់គ្នា៖