ភ្នំពេញ៖ កូនខ្មែរនៅក្នុងបណ្តាញសង្គមជាច្រើន បានសម្តែងនូវទុក្ខក្រៀមក្រំ និងសោកស្តាយជាខ្លាំង ខណៈទទួលដំណឹងបាត់បង់ធនធានផ្នែកល្ខោនខោលដ៏មានតម្លៃម្នាក់ គឺលោកគ្រូ ទិត្យ សែន ដែលលោកបានខិតខំជួយលើកស្ទួយសិល្បៈបុរាណខ្មែរល្ខោនខោលនេះ តាំងពីពេលកន្លងមកសម្រាប់កូនខ្មែរជំនាន់ក្រោយ។ លោកគ្រូ ទិត្យ សែន បានទទួលមោរណភាពកាលពីវេលាម៉ោង ១០និង១៥នាទី យប់ថ្ងៃសៅរ៍ ទី២៣ ខែឧសភា ឆ្នាំ២០២០ ដោយរោគាពាធ។
ប៉ុន្តែ អ្វីដែលយើងគ្រប់គ្នាធ្លាប់បានឃើញ ទាក់ទងនឹងអបិយជំនឿព្រលឹងខ្មោចតែងតែសណ្ឋិតមកលើបុគ្គលជាកូនចៅ ឬ សាច់ញាតិ គឺយើងពិតជាព្រឺក្បាលខ្លាំងមែនទែន ព្រោះថា រឿងនេះបានកើតឡើងនៅក្នុងពិធីបុណ្យសពរបស់លោកគ្រូ ទិត្យ សែន ស្តែងៗតែម្តង។
ក្នុងនោះរឿងទី១ ត្រូវបានគេសន្មត់ថា វិញ្ញាណរបស់លោកគ្រូ ទិត្យ សែន បានចូលសណ្ឋិតធ្វើឲ្យចៅប្រុសរបស់គាត់ រាំជាទម្រង់ល្ខោនខោលយ៉ាងល្វត់ល្វន់ និងបានល្អជាទីបំផុត ស្ថិតនៅពីមុខមឈូសរបស់លោកគ្រូផ្ទាល់តែម្តង ខណៈដែលគេបានដឹងច្បាស់ថា ចៅប្រុសរបស់គាត់មិនមែនជាអ្នកជំនាញផ្នែករបាំនេះ និងសូម្បីចេះរាំល្ខោនខោលពីមុនោះឡើយ។
អ្វីដែលអស្ចារ្យទី២ទៀតនោះ គឺគេបានចាប់អារម្មណ៍ទៅលើផ្សែងធូប ដែលកូនសិស្សៗរបស់លោកគ្រូអុជ ស្រាប់តែបង្ហាញចេញជារូបរាងហនុមាន និងទម្រង់មួយទៀត គឺជាតួអង្គយក្ស ដែលធ្វើឲ្យគ្រប់គ្នានៅក្នុងពិធីបុណ្យសព នាំគ្នាភ្ញាក់ផ្អើលជាខ្លាំងតែម្តង។
តាមរយៈករណីទាំងពីរខាងលើនេះ មនុស្សជាច្រើនបានលើកឡើងតាមការយល់ឃើញថា លោកគ្រូ ទិត្យ សែន ហាក់នៅវិលវល់មិនចង់ឃ្លាតពីសិល្បៈបុរាណមួយនេះទេ ហើយប្រហែលលោកចង់រម្លឹកដល់កូនខ្មែរជំនាន់ក្រោយបន្តចាប់អារម្មណ៍ និងនាំគ្នាអភិរក្សល្ខោនខោលកុំឲ្យបាត់បង់។ ថ្ងៃនេះក៏ជាថ្ងៃចុងក្រោយផងដែរ ដែលពួកយើងលែងបានឃើញលោកគ្រូជារៀងរហូត៕
ដោយ៖ លឹម ហុង
