ប្រធានាធិបតីអាហ្វហ្គានីស្ថានលោក Ashraf Ghani បានប្រកាសដោះលែងអ្នកទោសតាលីបង់រហូតដល់ ២.០០០នាក់ ក្រោយពេលក្រុមអ៊ីស្លាមនេះ បានស្នើឲ្យមានបទឈប់បាញ់គ្នា។
ការប្រកាសនោះកើតឡើងភ្លាមៗក្រោយពេលក្រុមតាលីបង់ បានយល់ព្រមផ្អាកបាញ់គ្នារយៈពេល ៣ថ្ងៃជាមួយនឹងរដ្ឋាភិបាលអាហ្វហ្គានីស្ថានដើម្បីឲ្យមានការប្រារព្ធពិធីបុណ្យអ៊ីស្លាម Eid Al-Fitr។
លោកប្រធានាធិបតីបាននិយាយថា ការដោះលែងអ្នកទោសទាំងនោះ គឺជាកាយវិការសប្បុរសដែលធ្វើឡើង ដើម្បីធានាបាននូវដំណើរការសន្តិភាព។
លោក ក៏បាននិយាយទៀតផងដែរថា រដ្ឋាភិបាលរបស់លោកបានត្រៀមខ្លួនរួចរាល់ហើយ សម្រាប់ការចរចារសន្តិភាពទៀត។
អ្នកនាំពាក្យប្រធានាធិបតីបានសរសេរនៅលើ Twitter ដូច្នេះថា “លោកប្រធានាធិបតី Ghani នៅថ្ងៃនេះបានផ្តួចផ្តើមដំណើរការ ដើម្បីដោះលែងអ្នកទោសតាលីបង់រហូតដល់ ២.០០០នាក់ ដើម្បីឆ្លើយតបទទៅនឹងការប្រកាស ពីបទឈប់បាញ់របស់ក្រុមតាលីបង់”។
សូមបញ្ជាក់ថា កាលពីខែមុន កិច្ចចរចាទល់មុខគ្នាជាប្រវត្តិសាស្ត្របានបែកបាក់ ដោយសារមិនចុះសម្រុងគ្នាលើបញ្ហាដោះដូរអ្នកទោស ដែលវាគឺជាផ្នែកមួយនៃកិច្ចព្រមព្រៀងរវាងអាមេរិច និងក្រុមតាលីបង់ ដែលត្រូវបានចុះហត្ថលេខា ដោយគ្មានការចូលរួមពីរដ្ឋាភិបាល។
ការមិនចុះសម្រុងគ្នាជុំវិញការដោះដូរអ្នកទោស និងកងកម្លាំងគាំទ្ររដ្ឋាភិបាលរាប់ពាន់នាក់ ជាហេតុធ្វើឲ្យមានការពន្យារពេល នៃការចាប់ផ្តើមចរចាសន្តិភាព។
ប៉ុន្តែការប្រកាសចុងក្រោយនេះ ទំនងជាផ្តល់ក្តីសង្ឃឹមឡើងវិញ ក្នុងចំណោមអ្នកសង្កេតការអាហ្គានីស្ថាន និងអន្តរជាតិពីការកាត់បន្ថយអំពើហឹង្សារយៈពេលវែង ព្រមទាំងការរីកចម្រើនចំពោះការចរចានៅថ្ងៃអនាគត៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
