បន្ទាយមានជ័យ ៖ អនុប្រធានគណបក្សប្រជាជនកម្ពុជាថ្លែងចំអកត្បកស្អំផង ណែនាំផងថា សូមអ្នកតំណាងរាស្ត្រម្នាក់(របស់គណបក្សប្រជាជនកម្ពុជាប្រចាំមណ្ឌលខេត្តបាត់ដំបង) ឈប់ទៅទាក់កញ្ញាស៊ីនចាន់ ពៅរ៉ូហ្ស៊េត ជាអតីតចៅសង្កាត់អូរចារ ក្រុងខេត្តបាត់ដំបងនៃអតីតគណបក្សប្រឆាំង(សង្គ្រោះជាតិ) ដែលយើងបានរំលាយហើយនោះអោយមកចុះចូលនឹងគណបក្សប្រជាជនយើងទៀតអី។
សម្តេចក្រឡាហោម និយាយបែបកំប្លែងក្នុងពីធីបិទសន្និបាតការងាររបស់រដ្ឋបាលខេត្តបន្ទាយមានជ័យ កាលពីថ្ងៃទី២៣ ខែមករា ម្សិលមិញថា៖ “ដល់ខ្ញុំសួរថា ទៅភោជនីយដ្ឋានរបស់រ៉ូហ្ស៊េតនោះធ្វើអី ក៏ញឹកម្លេះ? គាត់ឆ្លើយប្រាប់ខ្ញុំថា ទៅទាក់អូសទាញគេអោយចូលយើង។ តែខ្ញុំប្រាប់វិញថា ទៅដល់ក្នុងភោជនីដ្ឋានគេរាល់ថ្ងៃ តិចមិនគេមកយើង បែរជាគេទាញចូលគេទាញទៅគេវិញ ។
សម្តេចបន្តថា ៖ ” (លោកតំណាងរាស្ត្រអើយ) ចាំបាច់ធ្វើធ្វើចឹងខ្លួនឯងធ្វើអី យើងមានវិធីម៉ាគគោកហ្នឹង ។អោយអ្នកផ្សេងធ្វើក៏បាន”។
ហើយទៅញឹកៗ ចង់មិនចង់ ភ្នែកពលរដ្ឋនិងមនុស្សគេ យល់ច្រឡំថា ហ្ន! សូម្បីតំណាងរាស្ត្របក្សកាន់អំណាចក៏គាំទ្រភោជនីយដ្ឋាន(កញ្ញារ៉ូហ្ស៊េត)នោះដែរ។
ទោះបីជាអ្នកតំណាងរាស្ត្រនោះ ជានរណានោះ ក៏អ្នកតាមដានយល់ថា សម្តេចទំនងជារិះគន់ធ្ងន់ៗទៅលោក ឈាង វុន អ្នកតំណាងរាស្ត្រមណ្ឌលបាត់ដំបង ដែលកន្លងមក លោកសឹងតែចេញចូលតែភូមិសាស្ត្រសង្កាត់អូរចារនិងឌឺដង ទាក់ទាញកញ្ញាស៊ិនចាន់ ពៅរ៉ូហ្ស៊េត តាំងពីនាងនៅជាបេក្ខនារី រហូតនាងត្រូវរាស្ត្របោះឆ្នោតអោយធ្វើជាចៅសង្កាត់អូរចារ និងដល់នាងអស់តួនាទីវិញ ក្រោយតុលាការរយើងរំលាយគណបក្សប្រឆាំងនោះ។
សូមរំលឹកថា ក្រោយបក្សប្រឆាំងត្រូវបានរំលាយកាលពីថ្ងៃទី១៦វិច្ឆិកា ឆ្នាំ២០១៧ ហើយក្រោយមក នាងអតីតចៅសង្កាត់អូចារនោះ កីដូចមេឃុំ ចៅសង្កាត់អតីតគណបក្សសង្គ្រោះជាតិនៃឃុំ សង្កាត់ជាង៥០០ និងមេឃុំចៅសង្កាត់ សមាជិកក្រុមប្រឹក្សាឃុំ សង្កាត់ចំនួនជិត៦.០០០រូប បានបាត់បង់តួនាទី មុខតំណៃងទៅវិញ ។
សម្រាប់នាង ពៅរ៉ូហ្ស៊េត ក៏បានបើកភោជនីយដ្ឋានតូចមួយលក់ម្ហូបអាហារមួយនៅក្រុងបាត់ដំបង ដើម្បីរក កម្រៃចិញ្ចឹមជីវិតនិងជួយកសាង និងដោះស្រាយគារងារមនុស្សធម៍នានា៕ ដោយ ៖ បន្ទាយ