ភ្នំពេញ៖ ជាមួយនឹងការបន្តទប់ស្កាត់ការរីករាលដាលជំងឺរាតត្បាតកូវីដ១៩ រាជរដ្ឋាភិបាល បានរៀបចំនិងបានអនុវត្តវិធានការមួយចំនួន ដើម្បីផ្តល់កិច្ចអន្តរាគមន៍បន្ទាន់ ដល់ប្រជាជនកម្ពុជា ទាំងអស់ ដែលរងនូវផលប៉ះពាល់ដល់ជីវភាពរស់នៅ ជាពិសេសគ្រួសារក្រីក្រ និងគ្រួសារទទួលរងប៉ះពាល់ខ្លាំងជាងគេ ដើម្បីទទួលការឧបត្ថម្ភ។
នៅថ្ងៃទី២៥ ខែឧសភា ឆ្នាំ២០២០នេះ រាជរដ្ឋាភិបាលកម្ពុជាបានចេញសេចក្តីជូនដំណឹងលេខ៖ ១៧ សជណ ដោយណែនាំដល់ក្រុមការងាររាជរដ្ឋាភិបាល ចុះមូលដ្ឋានរាជធានី ខេត្ត ក្រុងទាំងអស់ ចូលរួមសហការជាមួយអាជ្ញាធរមូលដ្ឋាន ចាត់តាំងតាមដាន គាំទ្រ និងជំរុញសកម្មភាពកំណត់អត្តសញ្ញាណកម្មគ្រួសារក្រីក្រ ក្នុងអំឡុងពេលនៃការរីករាលដាលជំងឺកូវីដ-១៩ ដែលដឹកនាំដោយក្រសួងផែនការ ឱ្យមានភាពច្បាស់លាស់ បំបាត់ភាពមិនប្រក្រតី និងសម្រេចឱ្យបានចប់សព្វគ្រប់នៅដំណាច់ខែឧសភា ឆ្នាំ២០២០ ចំពោះតំបន់ជនបទ និងតំបន់ទីប្រជុំជនឱ្យបានមុនដំណាច់ខែមិថុនា ឆ្នាំ២០២០៕
ដោយ៖កូឡាប