ភ្នំពេញ៖ ពាក់ព័ន្ធនឹងករណីប្រជាពលរដ្ឋមួយចំនួនដែលកំពុងរស់នៅរាជធានីភ្នំពេញ ដែលមិនទាន់បង់ថ្លៃសេវាប្រមូលសំរាម និងសំណល់រឹង រដ្ឋបាលរាជធានីភ្នំពេញ បានព្រមាន បញ្ចេញបញ្ជីឈ្មោះអ្នកមិនទាន់បានបង់ថ្លៃសេវាប្រមូលសំរាម និងសំណល់រឹង ជាសាធារណៈតាមបណ្ដាញសង្គម ឬប្រព័ន្ធផ្សព្វផ្សាយនានា និងកត់ត្រាជាបំណុល ហើយអនុវត្តវិធានការរដ្ឋបាល។
រដ្ឋបាលរាជធានីភ្នំពេញ នៅថ្ងៃទី២៥ ខែឧសភា ឆ្នាំ២០២០នេះ បានចេញសេចក្ដីជូនដំណឹង ស្តីពីការជំរុញការបង់ថ្លៃសេវាប្រមូលសំរាម និងសំណល់រឹង នៅរាជធានីភ្នំពេញ ក្នុងដំណាក់កាលអន្តរកាល។
រដ្ឋបាលរាជធានីភ្នំពេញ បានជូនសេចក្ដីជូនដំណឹង ដល់ប្រជាពលរដ្ឋ ម្ចាស់អាជីវកម្ម សេវាកម្ម និងស្ថាប័នឯកជន ដែលប្រើប្រាស់សេវាប្រមូលសំរាម និងសំណល់រឹង ទាំងក្នុងរាជធានីភ្នំពេញ ឲ្យបានជ្រាបថា ក្រោយពីបានចាប់ផ្តើមអនុវត្តទទួលការបង់ថ្លៃសេវាប្រមូលសំរាម និងសំណង់រឹង នៅរាជធានីភ្នំពេញ ក្នុងដំណាក់កាលអន្តរកាល តាមប្រព័ន្ធអេឡិចត្រូនិក រហូតមកដល់ពេលនេះ រដ្ឋបាលរាជធានីភ្នំពេញ បានកត់សម្គាល់ឃើញថា មានបងប្អូនប្រជាពលរដ្ឋភាគច្រើន បង់ថ្លៃសេវាប្រមូលសំរាមរួចហើយ។ ប៉ុន្ដែនៅមានមួយចំនួនទៀត មិនទាន់បានបំពេញកាតព្វកិច្ចបង់ថ្លៃសេវាប្រមូលសំរាម និងសំណល់រឹងនេះនៅឡើយ។
រដ្ឋបាលរាជធានីភ្នំពេញ បានស្នើឲ្យបងប្អូនប្រជាពលរដ្ឋដែលពុំទាន់បានបង់ថ្លែសេវាប្រមូលសំរាម និងសំណង់រឹង សូមរួសរាន់មកបង់ថ្លៃសេវាប្រមូលសំរាមឲ្យបានទាន់ពេលវេលា បើពុំដូច្នេះទេ រដ្ឋបាលរាជធានី នឹងអនុវត្តនូវវិធានការមួយចំនួនដូចជា ៖
១) បញ្ចេញបញ្ជីឈ្មោះអ្នកមិនទាន់បានបង់ថ្លៃសេវាប្រមូលសំរាម និងសំណល់រឹង ជាសាធារណៈតាមបណ្ដាញសង្គម ឬប្រព័ន្ធផ្សព្វផ្សាយនានា
២) កត់ត្រាជាបំណុល ហើយអនុវត្តវិធានការរដ្ឋបាល ដោយបិទអាជីវកម្ម ឬសេវាកម្មជាបណ្ដោះអាសន្ន
៣) អនុវត្តវិធានការផ្សេងៗទៀតតាមការចាំបាច់។
គួរជម្រាបថា រាជរដ្ឋាភិបាលសម្រេចបង្វែរថ្លៃសេវាប្រមូលសំរាម និងសំណល់រឹង នៅរាជធានីភ្នំពេញ ពីក្រុមហ៊ុនស៊ីនទ្រី មកជូនរដ្ឋាករស្វយ័តគ្រប់គ្រងសំរាម និងសំណង់រឹងរាជធានីភ្នំពេញវិញ ដើម្បីជំរុញនូវប្រសិទ្ធភាពនៃការប្រមូលសំរាម៕
ដោយ៖កូឡាប
