ភ្នំពេញ៖ នៅក្នុងអំឡុងពេលនៃការរីករាលដាលវីរ៉ុសកូវីដ១៩នេះ អ្នកស្ម័គ្រចិត្តទៅបរិច្ចាគឈាម មានការធ្លាក់ចុះច្រើន ស្របពេលដែលអ្នកទៅបរិច្ចាគឈាម សម្រាប់ផ្តល់ឲ្យក្រុមគ្រួសារសាច់ញាត្តិ នៅរក្សាចំនួនដដែល។ នេះបើយោងតាមប្រសាសន៍របស់លោកវេជ្ជបណ្ឌិត លី សុវទ្យ អនុប្រធានមជ្ឈមណ្ឌលជាតិផ្តល់ឈាម។
ពាក់ព័ន្ធនឹងកិច្ចការផ្តល់ឈាមនេះ លោកវេជ្ជបណ្ឌិត លី សុវទ្យ បានបន្តថា មជ្ឈមណ្ឌលជាតិផ្តល់ឈាម ត្រូវការឈាមប្រមាណ ២៥០ប្លោកក្នុងមួយថ្ងៃ ដើម្បីឆ្លើយតបទៅនឹងតម្រូវការឈាម។ លោកវេជ្ជបណ្ឌិត អះអាងថា ការបរិច្ចាគឈាម មិនធ្វើឲ្យប៉ះពាល់ ឬគ្រោះថ្នាក់ដល់សុខភាព ឡើយ។ ឈាម ដែលបាត់បង់នោះ វានឹងបំពេញវិញយ៉ាងឆាប់រហ័ស។ ម្យ៉ាងវិញទៀត បើប្រៀបធៀបចំនួនឈាម ដែលបានបរិច្ចាគ ( ចំនួន មួយប្លោក ចំណុះ ៣៥០ មិលី្លលីត្រ) ទៅនឹងឈាម ដែលនៅក្នុងខ្លួន គឺជាចំនួនដ៏តិចតួចបំផុត។
ការចូលរួមក្នុងសកម្មភាពបរិច្ចាគឈាម ជារឿងដ៏ល្អបំផុត និងបានបង្ហាញឲ្យឃើញពីការយល់ដឹងកិច្ចការមនុស្សធម៌ក្នុងសង្គម ដោយការបរិច្ចាគឈាម ដើម្បីជួយសង្គ្រោះជីវិតមនុស្ស។ មជ្ឈមណ្ឌលជាតិផ្តល់ឈាម ជាកន្លែងចែកចាយឈាមដល់មន្ទីរពេទ្យរដ្ឋនៅទូទាំងប្រទេស បានប្រកាសពីការទទួលបានឈាម តាមរយៈការបរិច្ចាគស្ម័គ្រចិត្ត។ បច្ចុប្បន្នក្នុងមួយថ្ងៃ គ្រាន់តែរាជធានីភ្នំពេញ ត្រូវការឈាមប្រមាណ១៥០-២០០ប្លោក សម្រាប់ជួយសង្គ្រោះជនរងគ្រោះ អ្នកជំងឺ ហើយនៅទូទាំងប្រទេស ត្រូវការឈាមប្រមាណ២០០-២៥០ប្លោក ជារៀងរាល់ថ្ងៃ ដូចនេះ មជ្ឈមណ្ឌលជាតិផ្ដល់ឈាម កំពុងត្រូវការឈាមអ្នកស្ម័គ្រចិត្តបន្ថែមទៀត ដើម្បីសង្គ្រោះជីវិតជនរងគ្រោះឲ្យបានទាន់ពេលវេលា។
ក្នុងឆ្នាំ២០១៩កន្លងទៅ មជ្ឈមណ្ឌលជាតិផ្ដល់ឈាម បានផ្គត់ផ្គង់ឈាមប្រមាណ ៦៩,៧៩៦ ប្លោក ប៉ុន្ដែសព្វថ្ងៃ ឈាមដែលមានប្រភពមកពីអ្នកស្ម័គ្រចិត្តបរិច្ចាគ មានត្រឹមតែ ២៧ភាគរយប៉ុណ្ណោះ។
គួរបញ្ជាក់ថា ឆ្នាំ២០១៩ មជ្ឈមណ្ឌលជាតិផ្ដល់ឈាម ត្រូវការឈាមប្រមាណជាង ៩ម៉ឺនប្លោក សម្រាប់យកទៅសង្គ្រោះអាយុជីវិតជនរងគ្រោះ ដែលត្រូវការឈាមជាចាំបាច់ ខណៈនៅរាជធានីភ្នំពេញ មានការប្រើប្រាស់ឈាមជិត ៦ម៉ឺនប្លោក៕
ដោយ៖សម្ផស្ស