ខេត្តស្វាយរៀងៈ បុរសម្នាក់ និងស្ត្រីម្នាក់ ជាមន្ត្រីនគរបាល បានរងរបួសធ្ងន់ ដោយសារគ្រោះថ្នាក់ចរាចរណ៍ រវាងរថយន្តកុងតឺន័រ និងម៉ូតូ២គ្រឿង ក្នុងទិសដីស្របគ្នា ដែលហេតុការណ៍ខាងលើនេះ បានកើតឡើងកាលពីវេលាម៉ោង៧និង១៥នាទីព្រឹក ថ្ងៃទី២៦ ខែ ឧសភា ឆ្នាំ ២០២០ លើផ្លូវជាតិលេខ១ ចន្លោះគីឡូម៉ែត្រលេខ ១២៩/១៣០ ស្ថិតក្នុងភូមិ ឃោសាង សង្កាត់ ស្វាយតឿ ក្រុង ស្វាយរៀង ខេត្តស្វាយរៀង។
សមត្ថកិច្ចបានឱ្យដឹងថាៈ រថយន្ដកុងតឺន័រម៉ាក STERLING ពណ៌ ស ពាក់ផ្លាកលេខ ភ្នំពេញ ៣D ១៣៨៧ សឺមីរ៉ឺម៉ក ពាក់ផ្លាកលេខ ភ្នំពេញ ៤A ១៦០៦ បើកបរដោយឈ្មោះ ប្រាំង កុសល ភេទ ប្រុស អាយុ ២៧ ឆ្នាំ មុខរបរ បើកបរ រស់នៅភូមិ អង្គសេរី ឃុំ ជើង ស្រុក ឧដុង្គ ខេត្ត កំពង់ស្ពឺ បើកបរពីលិចទៅកើត គ្មានរបួស រថយន្ដគ្មានខូចខាត ។
ប្រភពដដែលបានបន្តថាៈ ម៉ូតូទី១ ម៉ាក ហុងដាសេ១២៥ ពណ៌ ខ្មៅ ពាក់ផ្លាកលេខ ស្វាយរៀង ១A ៧០១១ បើកបរដោយឈ្មោះ ចាន់ រដ្ឋា ភេទ ស្រី អាយុ ២៥ ឆ្នាំ មុខរបរ នគរបាល រស់នៅភូមិ បាយ៉ាប ឃុំ បាសាក់ ស្រុក ស្វាយជ្រំ ខេត្ត ស្វាយរៀង បើកបរពីលិចទៅកើត រងរបួសធ្ងន់ ពាក់មួកសុវត្ថិភាព ម៉ូតូខូចខាតធ្ងន់។ ចំណែកម៉ូតូទី២ម៉ាក ហុងដាសេ ១២៥ ពណ៌ ខ្មៅ ពាក់ផ្លាកលេខ ស្វាយរៀង ១L ៥៣៣៦ អ្នកបើកបរមិនស្គាល់អត្តសញ្ញាណ ភេទ ប្រុស ពាក់មួកសុវត្ថិភាព រងរបួសធ្ងន់ ម៉ូតូខូចខាតធ្ងន់ ។
បច្ចុប្បន្នមធ្យោបាយរក្សាទុកនៅ ការិយាល័យចរាចរណ៍ ខេត្តស្វាយរៀង។ ចំណែកអ្នករបួស សម្រាកព្យាបាលនៅមន្ទីរពេទ្យខេត្តស្វាយរៀង ហើយ មូលហេតុគឺ អ្នកបើកបររថយន្ដប្រើប្រាស់ល្បឿនលឿន កៀរម៉ូតូបណ្ដាលឲ្យដួល ៕
ដោយ៖ វ៉ៃកូ