តាកែវ៖ ឯកឧត្តម អ៊ូច ភា អភិបាលខេត្តតាកែវ រួមជាមួយ មន្ទីរជំនាញពាក់ព័ន្ធ បានចុះពិនិត្យការស្ថាបនាកែលម្អសោភ័ណភាពផ្លូវជាតិលេខ២ មានប្រវែងជិត ១គីឡូម៉ែត្រ ចាប់ពីចំណុចផ្លូវបំបែកជាពីរ ព្រះវិណ្ណុស្ហ (តោពីរ) ដល់វិមានឯករាជ្យខេត្ត ដែលកំពុងធ្វើការជួសជុល និងពង្រីកផ្លូវសម្រេចបាន៩៥ភាគរយហើយ ស្ថិតនៅសង្កាត់រកាក្នុង ក្រុងដូនកែវ ខេត្តតាកែវ នៅព្រឹកថ្ងៃទី២៦ ខែឧសភា ឆ្នាំ២០២០នេះ ។
មានប្រសាសន៍ក្នុងពេលចុះពិនិត្យមើលការពង្រីក និងជួសជុលផ្លូវជាតិលេខ២ ក្នុងក្រុងដូនកែវនេះដែរ ឯកឧត្តម អ៊ូច ភា អភិបាលខេត្ត បានធ្វើការណែនាំដល់ ក្រុមហ៊ុនទទួលសិទ្ធិស្ថាបនាផ្លូវនេះ ត្រូវសហការល្អជាមួយមន្ទីរជំនាញ ដើម្បីធ្វើការស្ថាបនាផ្លូវក្នុងក្រុងនេះ ស្របទៅតាមស្តង់ដារបច្ចេកទេសត្រឹមត្រូវ និងមានគុណភាពខ្ពស់ ព្រោះថាការកែលម្អនេះ វាបានចូលរួមកែលម្អសោភ័ណភាពក្រុងដូនកែវ ដែលជាបេះដូងនៃខេត្តតាកែវ ក៏ដូចជាអាចធ្វើការទាក់ទាញភ្ញៀវទេសចរជាតិ និងអន្តរជាតិ ចូលមកកម្សាន្តនៅខេត្តមានការកើនឡើងជាក់ជាមិនខាន ។
ក្រោយការស្ថាបនាផ្លូវក្នុងក្រុងសម្រេចបាន ៩៥ភាគរយហើយនោះ ឯកឧត្តមអភិបាលខេត្តតាកែវ បានឲ្យមន្ទីរជំនាញលើកយកប្លង់គំរូមួយបន្ថែមទៀត លើការរៀបចំរៀបការ៉ូឡា និងដាំដើមឈើ អមសងខាងផ្លូវជាតិលេខ២ ផ្លូវក្នុងក្រុងបន្ថែមទៀត ដើម្បីទាញយកសោភ័ណភាពពណ៌បៃតងឲ្យកាន់តែស្រស់បំព្រង។
សូមបញ្ជាក់ផងដែរថា នៅចុងឆ្នាំ ២០១៩ និងនៅដើមឆ្នាំ ២០២០ នេះនៅក្នុងបេះដូងនៃខេត្តតាកែវ ក្រុងដូនកែវ កាន់តែប្រែមុខមាត់ថ្មី ពីមួយឆ្នាំទៅមួយឆ្នាំ ទៅលើការស្ថាបនាហេដ្ឋារចនាសម្ព័ន្ធនៅក្នុងក្រុង កាន់តែរៀបចំបានល្អ ហើយស្រស់ស្អាត មិនថាផ្លូវថ្នល់ ក៏ដូចជាការៀបចំសួនច្បារ ពង្រីកសួនច្បារឲ្យកាន់តែមានសភាពធំទូលាយ ដើម្បីសម្រួលដល់ប្រជាពលរដ្ឋធ្វើការហាត់ប្រាណ ស្រូបយកខ្យល់អាកាសបរិសុទ្ធនៅតាមមាត់បឹងតាកែវ ព្រោះថាមួយរយៈកន្លងមកថ្មីៗនេះ ពលរដ្ឋទាំងក្មេង ទាំងចាស់ ចាប់ផ្តើមគិតពីកត្តាសុខភាពជាធំ ដោយនាំគ្នាធ្វើលំហាត់ប្រាណទាំងព្រឹក ទាំងល្ងាច មានការកើនឡើងគួរឲ្យកត់សម្គាល់ ទើបរដ្ឋបាលខេត្តតាកែវ សម្រេចលើកគម្រោងពង្រីកសួនច្បារបន្ថែមទៀត ៕
ដោយ៖ តាកែវ
