តាកែវ៖ កាន់តែសង្វេកក្រោយនារីវ័យ៣១ឆ្នាំម្នាក់ ជាអ្នកលក់គ្រឿងក្រអូបបោះដុំនៅក្នុងផ្សារតាកែវ សម្រេចចិត្តគិតខ្លីធ្វើអត្តឃាត ដោយចងកសម្លាប់ខ្លួនឯង បន្សល់ទុកដោយការស្រណោះស្រណោកពីក្រុមគ្រួសារ និងឳពុកម្តាយ ក្រោយបណ្តោយខ្លួនឲ្យធ្លាក់ដល់ចំណុច Depression ដែលជាចំណុចវិបត្តិផ្លូវចិត្តធ្ងន់ធ្ងរមួយខ្លាំងជាងជំងឺស្ត្រេស ងាយនិងធ្វើឲ្យមនុស្សមានចិត្តគំនិតគិតខ្លី មិនបានគិតវែងឆ្ងាយឡើយ ។
ហេតុការណ៍ផ្អើលឆោឡោដោយការធ្វើអត្តឃាតរបស់នារីរងគ្រោះ ជាអ្នកលក់គ្រឿងក្រអូបក្នុងផ្សារតាកែវនេះ គឺបានកើតឡើងនៅផ្ទះក្នុងបន្ទប់គេងរបស់ខ្លួន កាលពីព្រឹកថ្ងៃទី ២៦ ខែឧសភា ឆ្នាំ២០២០ ស្ថិតនៅចំណុចខាងមុខបេនរ៉ឺម៉កម៉ូតូផ្សារតាកែវ នៅក្នុងភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ ។
បើតាមរបាយការណ៍កំណត់ហេតុរបស់សមត្ថកិច្ចនគរបាល បានឲ្យដឹងថា នារីរងគ្រោះខាងលើមានឈ្មោះ ឃឿន ចន្ធា អាយុ៣១ឆ្នាំ នៅលីវ ស្រុកកំណើតភូមិត្រពាំងឫស្សី សង្កាត់បារាយណ៍ ក្រុងដូនកែវ ខេត្តតាកែវ ។
តាមការសន្និដ្ឋានដោយធ្វើកោសល្យវិច័យរួចរបស់នគរបាល បានសន្និដ្ឋានថា នារីរងគ្រោះពិតជាបាន ចងកសម្លាប់ខ្លួនដោយខ្លួនឯងពិតប្រាកដមែន ដោយមូលហេតុមានវិបត្តិផ្លូវចិត្តធ្ងន់ធ្ងរ ។
តាមសម្តីបងស្រីរបស់នារីរងគ្រោះ បានឲ្យដឹងថា រយៈពេល២ទៅ៣ថ្ងៃមុនពេលកើតហេតុ គាត់សង្កេតឃើញប្អូនស្រីគាត់ចេះតែត្អូញត្អែរថា ពិបាកចិត្តណាស់ មិនបានគិតដល់ថា ប្អូនស្រីរបស់ខ្លួនគិតខ្លីបែបនេះទេ លុះដល់ព្រឹកថ្ងៃកើតហេតុ គាត់ឆ្ងល់ព្រោះអត់ឃើញប្អូនរៀបអីវ៉ាន់លក់ដូរ ដោយមានការសង្ស័យក៏ឡើងទៅមើល នៅលើផ្ទះក៏ឃើញប្អូនស្រីចងកស្លាប់បាត់ទៅហើយ ៕
ដោយ៖ តាកែវ
