«ទទា» គឺជាសត្វបក្សីកម្រមួយប្រភេទ នៅក្នុងប្រទេសកម្ពុជា វាមានសម្បុរពណ៌ចម្រុះស្រដៀងនឹងសត្វក្ងោកអ៊ីចឹងដែរ ហើយមីញីវាយំឮសូរស្រដៀងបែបនេះថា តុកកាតត ក្តតា! តុកកាតតក្តតា!។ ពួកវាត្រូវបានដឹងថា ចូលចិត្តរស់នៅតាមព្រៃរនាម ក្បែរមាត់បឹង ស្ទឹង ទន្លេ ដើម្បីចាប់ស៊ីត្រីជាអាហារ។
និយាយអំពីសត្វទទា នោះយើងក៏នឹកដល់ដៃគូរបស់វា គឺសត្វត្រយ៉ង ដែលជាបក្សីមួយប្រភេទ មានសម្បុរខ្មៅប្រផេះ ចំពុះខុបស្រួច វាចូលចិត្តយំថ្ងូរឮសូរគ្រលួចគួរឲ្យស្រងេះស្រងោច ហើយវាក៏រស់នៅលាយឡំជាមួយនឹងសត្វទទាផងដែរ។ សត្វត្រយង ត្រូវបានចាស់ចាស់ៗជំនាន់ដើមនិយាយថា បើកាលណាឮទទាយំឆ្លងពីព្រៃឯកើត នោះត្រយងក៏យំឆ្លើយពីព្រៃឯលិច គួរឱ្យចាប់អារម្មណ៍។
តាមរយៈដំណើររឿងនេះ ជាហេតុនាំឱ្យកវីនិពន្ធចាប់អារម្មណ៍ និងតាក់តែងជាបទចម្រៀង “ទទាយំឆ្លង ត្រយងបងអើយយំឆ្លើយ សង្សារបងអើយ ភ្លេចបងហើយឬនៅ? ទឹកហូរកាត់ខ្សាច់ ចិត្តបងមិនដាច់អំពីស្រីពៅ ស្ពានក៏បាក់ ទឹកក៏ជ្រៅ ធ្វើម្តេចបានទៅជួបគូសង្សារ…” ទុកជាមរតកវិប្បធម៌មកទល់ពេលនេះ។
តាមរយៈបទចម្រៀងខាងលើនេះ គឺបង្ហាញពីជីវិតស្នេហារបស់មនុស្សផង និងបន្យល់ទុកនូវឈ្មោះសត្វផង។ តួយ៉ាង ដូចសត្វស្ទើរតែផុតពូជទាំងពីរនេះ ត្រូវបានកំណត់ជាសត្វជាតិដែលតំណាងឲ្យបក្សីនៅប្រទេសកម្ពុជាយើងផងដែរ។
ហេតុនេះ សូមនាំគ្នាចូលរួមថែរក្សាសត្វទាំងពីរនេះផង ពីព្រោះថាកូនខ្មែរតិចណាស់ដែលស្គាល់សត្វនេះ និងក៏ដើម្បីសម្រាប់កូនខ្មែរជំនាន់ក្រោយផងដែរ៕
ដោយ៖ លឹម ហុង