បាត់ដំបងៈ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស៣នាក់ ជួញដូររក្សាទុកនិងថ្នាំម៉ាទឹកកក១៤ថង់ សម្ភារពាក់ព័ន្ធប្រើប្រាស់មួយចំនួន នៅកន្លែងផ្សេងគ្នា កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់នៅថ្ងៃទី២៦ ខែឧសភា ឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ៣នាក់នេះ បានធ្វើឡើងកាលពី ថ្ងៃទី២៥ ខែឧសភា ឆ្នាំ២០២០ នៅចំណុចស្រុកថ្មគោល និងក្រុងបាត់ដំបង ខេត្តបាត់ដំបង។
លោកសុខ និមល នាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៣នាក់ ដែលចាប់ឃាត់ខ្លួន ករណីទី១ ឈ្មោះហួ ហៃ ភេទប្រុស អាយុ១៨ឆ្នាំ រស់នៅក្រុមទី៥ ភូមិគោកត្រប់ ឃុំតាមឺន ស្រុកថ្មគោល ខេត្តបាត់ដំបង និងឈ្មោះហួ ហ៊ុយ ភេទប្រុស អាយុ២០ឆ្នាំ រស់នៅក្រុមទី៥ ភូមិគោកត្រប់ ឃុំតាមឺន ស្រុកថ្មគោល ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក១១ថង់ សម្ភារមួយចំនួនទៀត ហើយចាប់ឃាត់ខ្លួន កាលពីម៉ោង១៥និង០០នាទី ថ្ងៃទី២៥ ខែឧសភា ឆ្នាំ២០២០ នៅចំណុចក្រុមទី៥ ភូមិគោកត្រប់ ឃុំតាមឺន ស្រុកថ្មគោល ខេត្តបាត់ដំបង។ ករណីទី២ ឈ្មោះស៊ុន វ៉ាន់ឆៃ ភេទប្រុស អាយុ៣៥ឆ្នាំ រស់នៅភូមិអណ្ដូងចេញ សង្កាត់អូរចារ ក្រុងបាត់ដំបង ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក០៣ថង់ សម្ភារប្រើប្រាស់ថ្នាំញៀនមួយចំនួនទៀត ហើយចាប់ឃាត់ខ្លួន កាលពីម៉ោង២១និង៤៥នាទី ថ្ងៃទី២៥ ខែឧសភា ឆ្នាំ២០២០ នៅចំណុចភូមិអណ្ដូងចេញ សង្កាត់អូរចារ ក្រុងបាត់ដំបង ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយកម្លាំងប៉ូលិសស្រុក ក្រុង ចុះបង្ក្រាបបានករណីរទាំង២នេះ ហើយចាប់ឃាត់ខ្លួនជនសង្ស័យ៣នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿង បញ្ជូនជនសង្ស័យ និងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី២៦ ខែឧសភា ឆ្នាំ២០២០ហើយ៕
ដោយៈអ៊ុងសារុំ