ភ្នំពេញ ៖ ក្នុងឆ្នាំ២០១៨នេះក្រសួងសាធារណការ នឹងរៀបចំអនុក្រឹត្យស្តីពីការបិទចំណាំងផ្លាតនៅលើរថយន្តដឹកទំនិញ និងកុងតេន័រដើម្បីកាត់បន្ថយគ្រោះថ្នាក់ចរាចរណ៍ពេលយប់ ការរៀបចំអនុក្រឹត្យស្តីពីការដាក់ប្រព័ន្ធGPSកំណត់ល្បឿន ទម្ងន់ និងទីតាំងរថយន្តដឹកទំនិញ ការរៀបចំដោះស្រាយកន្លែង ដែលមានគ្រោះថ្នាក់(កន្លែងជើងកប) ការដាក់ឱ្យដំណើរការផ្លូវរថភ្លើងឆ្ពោះទៅកាន់អាកាសយានដ្ឋានអន្តរជាតិពោចិតុង និងការដឹកជញ្ជូនតាមផ្លូវទឹកដើម្បីកាត់បន្ថយការកកស្ទះចរាចរណ៍មុនឆ្នាំចូលខ្មែរ។
កិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០១៧ និងទិសដៅការងារឆ្នាំ ២០១៨ នៅថ្ងៃពុធ ទី២៤ ខែមករា ឆ្នាំ២០១៨ ទីស្តីការក្រសួងមហាផ្ទៃ ក្រោមអធិបតីភាពសម្តេចក្រឡាហោម ស ខេង នាយករដ្ឋមន្ត្រីស្តីទី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក។
កិច្ចប្រជុំមានគោលបំណងបូកសរុប ដកពិសោធន៍ លទ្ធផលការងារដែលសម្រេចបាន សំដៅធ្វើការ សន្និដ្ឋាន វាយតម្លៃចំណុចវិជ្ជមាន និងបញ្ហាប្រឈម ព្រមទាំងដាក់ចេញទិសដៅការងារឆ្នាំ២០១៨ ឲ្យបានសមស្រប និងប្រកបដោយប្រសិទ្ធភាពខ្ពស់ រួមចំណែកដល់ការអនុវត្តឲ្យបានជោគជ័យនូវកម្មវិធី នយោបាយ និងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាល។
ថ្លែងនៅក្នុងកិច្ចប្រជុំនោះ លោកទេសរដ្ឋមន្ត្រី ស៊ុន ចាន់ថុល ទេសរដ្ឋមន្ត្រី និងរដ្ឋមន្ត្រីក្រសួងសាធារណការ និងដឹកជញ្ជូន និងជា អនុប្រធានអចិន្ត្រៃយ៍ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានគូសបញ្ចាក់ជូនអង្គពិធីអំពីទិសដៅ ការងារឆ្នាំ២០១៨ ដែលត្រូវសម្រេចឱ្យបាន ក្នុងនោះរួមមាន៖ ការរៀបចំអនុក្រឹត្យស្តីពីការបិទចំណាំងផ្លាតនៅលើរថយន្តដឹកទំនិញ និងកុងតេន័រដើម្បីកាត់បន្ថយគ្រោះថ្នាក់ចរាចរណ៍ពេលយប់ ការរៀបចំអនុក្រឹត្យស្តីពីការដាក់ប្រព័ន្ធGPSកំណត់ល្បឿន ទម្ងន់ និងទីតាំងរថយន្តដឹកទំនិញ ការរៀបចំដោះស្រាយកន្លែង ដែលមានគ្រោះថ្នាក់(កន្លែងជើងកប) ការដាក់ឱ្យដំណើរការផ្លូវរថភ្លើងឆ្ពោះទៅកាន់អាកាសយានដ្ឋានអន្តរជាតិពោចិតុង និងការដឹកជញ្ជូនតាមផ្លូវទឹកដើម្បីកាត់បន្ថយការកកស្ទះចរាចរណ៍មុនឆ្នាំចូលខ្មែរ។
ជាមួយគ្នានេះផងដែរលោកទេសរដ្ឋមន្ត្រី ក៏បានជម្រាបជូនអំពី ការជួសជុលផ្លូវជាតិលេខ៤ឡើងវិញ ដោយប្រើប្រាស់ថវិការដ្ឋ ការពន្លឿនការដាក់ផ្លាកសញ្ញាចរាចរណ៍នៅទូទាំងប្រទេសតាមគម្រោងរបស់ADB កំណត់ឲ្យក្រុមហ៊ុនសាងសងផ្លូវទាំងអស់ដាក់ផ្លាកសញ្ញានៅកន្លែងការដ្ឋាន និងបង្កើនការអប់រំផ្សព្វផ្សាយ អំពីសុវត្ថិភាពចរាចរណ៍ទៅដល់ប្រជាពលរដ្ឋគ្រប់ស្រទាប់ បន្តយុទ្ធនាការចែកមួកសុវត្ថិភាព បន្តយុទ្ធនា ការបិទស្ទីកឃ័រសុវត្ថិភាព១.០០០.០០០សន្លឹកថែមទៀតនៅទូទាំងប្រទេស ការដាក់កាមេរ៉ាចាប់ល្បឿន កាត់បន្ថយគ្រោះថ្នាក់ចរាចរណ៍ ការបង្កើតក្រុមការងារសិក្សាអំពីកកស្ទះចរាចរណ៍ នៅរាជធានីភ្នំពេញការដឹកជញ្ជូនទំនិញ លើសទម្ងន់កម្រិតកំណត់ ដើម្បីថែទាំផ្លូវឱ្យប្រើប្រាស់បានយូរ។
អញ្ជើញថ្លែងសុន្ទរកថាបិទកម្មវិធីនាឱកាសនោះ សម្តេចក្រឡាហោម បានស្នើឱ្យយន្តការដឹកនាំថ្នាក់ជាតិ និងថ្នាក់រាជធានីខេត្តបន្តជំរុញអនុវត្តឲ្យបានសម្រេចតាមទិសដៅដែលបានដាក់ចេញ និងខិតខំដោះ ស្រាយបញ្ហាប្រឈមនានាប្រកបដោយនិរន្តភាព តម្លាភាព ប្រសិទ្ធភាព និងគណនេយ្យភាព ក្នុងស្មារតី ប្តេជ្ញាចិត្ត និងមានការទទួលខុសត្រូវខ្ពស់ ដើម្បីធ្វើឱ្យការងាររបស់គណៈកម្មាធិការជាតិសុវត្ថិភាពចរា ចរណ៍ផ្លូវគោកនៅឆ្នាំ២០១៨សម្រេចបានល្អប្រសើរថែមទៀត។
សម្ដេចក្រឡាហោម ស ខេង បានលើកឡើងថា ប្រសិនបើអ្នកបើកបរតាមដងផ្លូវសាធារណៈគ្មានស្មារតីគោរពច្បាប់ចរាចរណ៍ទេនោះ បើទោះបីមានការរឹតបន្ដឹងច្បាប់យ៉ាងណាក៏ដោយ ក៏គ្រោះថ្នាក់ចរាចរណ៍នៅតែបន្ដកើតមាន។ សម្ដេចក្រឡាហោម ស ខេង ក៏បន្ថែមថា ក្រៅពីបញ្ហាទាំងអស់នេះ ក៏នៅមានបញ្ហារួមផ្សំផ្សេងទៀតផងដែរ ដែលនាំឲ្យមានគ្រោះថ្នាក់ចរាចរណ៍ ដូចជាការផ្សព្វផ្សាយអប់រំមិនទាន់បានទូលំទូលាយ ការរឹតបន្ដឹងច្បាប់មិនទាន់មាននិរន្ដភាព មិនទាន់ម៉ឺងម៉ាត់ មិនទាន់ព្រមៗគ្នា ឬនៅខ្លាចប៉ះពាល់អារម្មណ៍របស់ប្រជាជន ការរក្សាសណ្ដាប់ធ្នាប់តាមដងផ្លូវមិនទាន់បានល្អប្រសើរ និងការផ្លាកសញ្ញាតាមដងផ្លូវ មិនទាន់បានគ្រប់គ្រាន់។ល។ មន្ដ្រីអនុវត្តច្បាប់ ត្រូវតែបង្កើនប្រតិបត្តិការត្រួតពិនិត្យអនុវត្តច្បាប់ចរាចរណ៍ផ្លូវគោក ឲ្យបានសកម្ម និងម៉ឺងម៉ាត់ និងមាននិរន្ដភាព ដើម្បីបង្ខំឲ្យអ្នកប្រើប្រាស់ផ្លូវទាំងអស់ កែប្រែឥរិយាបថ គោរពប្រតិបត្តិច្បាប់គ្រប់ៗគ្នា។
គួរកត់សម្គាល់ផងដែរថា៖ យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោគឱ្យដឹងថា៖ បើបប្រៀបធៀបមុនពេលរឹតបន្តឹងច្បាប់ស្តីពីចរាចរណ៍ផ្លូវគោកឆ្នាំ២០១៥ កម្ពុជាបាន កាត់បន្ថយគ្រោះថ្នាក់ចរាចរណ៍ចំនួន១០៦៤លើក ស្មើ២៣% បានកាត់បន្ថយអ្នកស្លាប់ចំនួន៤៨៨នាក់ ស្មើ២១% និងបានកាត់បន្ថយអ្នករបួសចំនួន ១.៩៧១នាក់ ស្មើ ២៦%។ គ្រោះថ្នាក់ចរាចរណ៍ទូទាំងប្រទេសកម្ពុជា ឆ្នាំ២០១៧ កើតឡើង៣.៥៣១ករណី បើធៀបនឹងឆ្នាំ២០១៦ធ្លាក់ចុះ១៦៩ករណី បណ្តាលឲ្យស្លាប់មនុស្ស១.៧៨០នាក់ កើនឡើង៦៣នាក់ និងអ្នករបួសចំនួន៥.៥៣៩នាក់ ធ្លាក់ចុះ១.០៦៨នាក់ បើធៀបនឹងឆ្នាំ២០១៦៕ ដោយ៖បញ្ញាស័ក្តិ