ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍វាយតម្លៃខ្ពស់ចំពោះកិច្ច សហប្រតិបត្តការនៃទំនាក់ទំនងដ៏ល្អរវាងកម្ពុជា និងសហរដ្ឋអាមេរិក ជាពិសេសចាប់តាំងពីការ ចាប់ផ្តើម អាណត្តិការងាររបស់ ឯកឧត្តម Patrick Murphyនៅកម្ពុជា។
នារសៀលថ្ងៃអង្គារ ទី២៦ ខែឧសភា ឆ្នាំ២០២០ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឲ្យ ឯកឧត្តម Patrick Murphy ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា ព្រមទាំងសហការី ចូលជួបពិភាក្សាការងារ នៅទីស្ដីការក្រសួងមហាផ្ទៃ។
សម្តេចក៏បង្ហាញក្តីសង្ឃឹមថា ទំនាក់ទំនងរវាងប្រទេសទាំងពីរ ក្នុងអាណត្តិការងាររបស់ឯកឧត្តម នឹងនៅតែបន្តរីកចម្រើនបន្ថែមទៀត។ សម្តេចមាន ប្រសាសន៍ បែប នេះនារសៀលថ្ងៃអង្គារ ទី២៦ ខែឧសភា ឆ្នាំ២០២០ ក្នុងជំនួបពិភា ក្សាការ ងារ ជាមួយឯកឧត្តម Patrick Murphy ឯកអគ្គរដ្ឋទូតសហរ ដ្ឋអាមេរិកប្រចាំព្រះរាជាណាចក្រកម្ពុជា ព្រមទាំងសហការីនៅទីស្ដីការក្រសួងមហាផ្ទៃ។
ជាការឆ្លើយតបទៅនឹងប្រសាសន៍ស្វាគមន៍របស់សម្តេចក្រឡាហោម ចំពោះទំនាក់ទំនងជារួមរបស់ប្រទេសទាំងពីរ ឯកឧត្តម Patrick Murphy ក៏បានកត់សម្គាល់នូវកិច្ចសហប្រតិបត្តិការល្អទៅលើចំណុចពីរគឺទី១ទៅលើស្ថាប័នអនុវត្តច្បាប់ និងទី២ទៅលើវិស័យសុខភាពសាធារណៈ។
ទន្ទឹមនឹងនេះឯកឧត្តម ក៏បានលើកឡើងផងដែរថា ឆ្នាំនេះគឺជាឆ្នាំនៃខួប៧០ឆ្នាំនៃទំនាក់ទំនងការទូត រវាងប្រទេសទាំងពីរ ក្នុងនោះស្ថានទូតអាមេរិកក៏នឹងរៀបចំនូវព្រឹត្តការណ៍ផ្សេងៗដើម្បីបន្តជំរុញនឹងលើកកម្ពស់ទំនាក់ទំនង កិច្ចសហប្រតិបត្តការ រវាងប្រទេសទាំងពីរផងដែរ។
ឯកឧត្តម Patrick Murphy បានលើក ឡើងថា វាជាកិច្ចសហប្រតិបត្តិការដ៏ល្អរវាងមន្ត្រីអនុវត្តច្បាប់របស់កម្ពុជា និងមន្ត្រីFBIរបស់សហរដ្ឋអាមេរិក ក្នុងកិច្ចការបង្ក្រាប់ការជួញដូរមនុស្ស និងរំលោភផ្លូវភេទលើកុមារនាពេលកន្លងមកនេះ ។
ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានសម្តែងពីវឌ្ឍនភាពជាមួយកម្ពុជា ទាក់ទងនឹងកិច្ចសហប្រតិបត្តិការទ្វេភាគីលើគ្រប់វិស័យ ជាពិសេសលើផ្នែកការបង្ក្រាបការជួញដូរមនុស្ស ខណៈប្រតិបត្តិការនេះបានឈានដល់ចាប់ជនល្មើសបានរហូតដល់បញ្ជូនទៅកាន់សហរដ្ឋអាមេរិកវិញនោះ។
ឯកអគ្គរដ្ឋទូតបានលើកឡើងទៀតថា “ឯកឧត្តមបានសង្កត់សម្គាល់ថា ស្ថាប័នអនុវត្តច្បាប់នៅកម្ពុ ជា ជាមួយអង្គភាព FBI របស់សហរដ្ឋអាមេរិក ដែលបានសហការគ្នាទប់ស្កាត់ បង្ក្រាប និងចាប់ខ្លួនជនល្មើស មួយចំនួនពាក់ព័ន្ឋនឹងការរំលោភផ្លូវភេទលើកុមារមួយចំនួន ហើយបានបញ្ជូនទៅកាន់សហរដ្ឋអាមេរិកវិញ ដែលករណីនេះឯកឧត្តមបានកោតសរសើរកិច្ចខិតខំប្រឹងប្រែងថែរក្សាដល់សុវត្ថិភាពសាធារណទាំងកម្ពុជា ក៏ដូចជានៅអាមេរិកនោះ”។
ជាមួយគ្នានោះដែរឯកឧត្តម Patrick Murphy ក៏បានលើកឡើងផងដែរថា អាមេរិកនៅតែបន្តជួយដល់ ប្រទេសកម្ពុជាជានិច្ចបើទោះបីជាអាមេរិកកំពុងរងគ្រោះ ដោយសារបញ្ហានៃការរីករាលដាលមេរោកកូវីដ១៩ ក៏ដោយនោះ។ ជាងនេះទៅទៀតអាមេរិកក៏នៅតែបន្តជួយដល់កម្ពុជាផ្នែកប្រឆាំងនឹងបទល្មើសបច្ចេកវិទ្យាផងដែរ ដែលករណីនេះអាមេរិកបានផ្តល់វគ្គបណ្តុះបណ្តាលជាច្រើនដល់កម្ពុជាហើយនោះ។
សម្តេចក្រឡាហោម ក៏បានលើកឡើងអំពីកិច្ចសន្ទនារវាងសម្តេចតេជោ ហ៊ុន សែន នាយករដ្ឋមន្ត្រី ជាមួយ និងលោករដ្ឋមន្ត្រីក្រសួងការបរទេសអាមេរិកនាពេលកន្លងមកផងដែរ ដែលកិច្ចសន្ទនានេះបញ្ជាក់ឲ្យឃើញនូវភាពរីកចំរើនរវាងកិច្ចសហប្រតិបត្តិទ្វេភាគីរវាងកម្ពុជា និងអាមេរិក ។
ថ្លែងនៅក្នុងកិច្ចជំនួបនោះដែរ សម្តេចក្រឡាហោម ស ខេង ក៏បានថ្លែងអំណរអគុណចំពោះអាមេរិក ដែលបានជួយដល់កម្ពុជានាពេលកន្លងមក ហើយសម្តេចសូមសម្តែងការគាំទ្រទាំងស្រុងចំពោះការលើកឡើងរបស់លោក Patrick Murphy ទាក់ទងនឹងកិច្ចសហប្រតិបត្តិការទ្វេភាគីរវាងកម្ពុជានិងអាមេរិក៕
ដោយ៖កូឡាប
