ភ្នំពេញ៖ Cambodian Center for Human Rights មជ្ឈមណ្ឌលសិទ្ធិមនុស្សកម្ពុជា បានប្រកាសព័ត៌មានថា នៅថ្ងៃទី២៧ ខែឧសភា ឆ្នាំ២០២០នេះ តុលាការកំពូល នឹងបើកសវនាការលើបណ្តឹងសាទុក្ខករណីលោក អួន ឈិន និងលោក យាង សុធារិន្ទ ស្នើសុំឱ្យប្រគល់នូវវត្ថុដែលចាប់យក។
កាលពីថ្ងៃទី៣១ ខែមីនា ឆ្នាំ២០២០ កន្លងទៅ សាលាឧទ្ធរណ៍បានតម្កល់សេចក្តីសម្រេច របស់សាលាដំបូងរាជធានីភ្នំពេញ ដែលបានច្រានចោលការស្នើសុំរបស់អ្នកទាំងពីរ ឱ្យប្រគល់វត្ថុដែលចាប់យកត្រឡប់មកវិញដោយលើកហេតុផលថា វត្ថុទាំងនោះចាំបាច់សម្រាប់ការស៊ើបអង្កេតបន្ថែម។
អ្នកទាំងពីរត្រូវបានចោទប្រកាន់ពីបទ ប្រគល់ឱ្យរដ្ឋបរទេសនូវព័ត៌មានជាអាទិ៍ ដែលអាចធ្វើឱ្យអន្តរាយការការពារជាតិ តាមមាត្រា៤៤៥ នៃក្រមព្រហ្មទណ្ឌកម្ពុជា។ កាលពីខែតុលាឆ្នាំមុន សាលាដំបូងរាជធានីភ្នំពេញ បានសម្រេចបន្តការស៊ើបអង្កេត លើករណីរបស់អ្នកទាំងពីរធ្វើឱ្យពួកគេស្ថិតនៅក្នុងភាពមិនច្បាស់លាស់ ខណៈពេលដែលការបន្តនីតិវិធីខុសប្រក្រតី ជាការរារាំងដល់ដំណោះស្រាយ ក្នុងករណីរបស់ពួកគេ។
លោក យាង សុធារិន្ទ និងលោក អួន ឈិន អតីតអ្នកសារព័ត៌មានវិទ្យុអាស៊ីសេរី ត្រូវបានចាប់ខ្លួននៅថ្ងៃទី១៤ ខែវិច្ឆិកា ឆ្នាំ២០១៧ និងឃុំខ្លួននៅពន្ធនាគារព្រៃស។ អ្នកទាំងពីរជាប់ចោទពីបទប្រគល់ឱ្យរដ្ឋបរទេសនូវព័ត៌មានជាអាទិ៍ដែលអាចធ្វើឱ្យអន្តរាយការការពារជាតិ តាមមាត្រា ៤៤៥ នៃក្រមព្រហ្មទណ្ឌនៃព្រះរាជាណាចក្រកម្ពុជា។ សំណើរសុំនៅក្រៅឃុំលើកដំបូងអ្នកទាំងពីរធ្លាប់បានធ្វើការឱ្យវិទ្យុអាស៊ីសេរីដែលបច្ចុប្បន្នបានបិទការិយាល័យរបស់ខ្លួននៅប្រទេសកម្ពុជា ត្រូវបានបដិសេធមុនពេលប្ដឹងសាទុក្ខទៅតុលាការកំពូលនៅថ្ងៃទី១៦ ខែមីនា ឆ្នាំ២០១៨ ហើយក្រោយមកមិនយូរប៉ុន្មាន សាលាដំបូងរាជធានីភ្នំពេញបានចោទប្រកាន់ពួកគេទាំងពីរពីបទ “ផលិត និងកាន់កាប់រូបភាពអាសអាភាស តាមមាត្រា ៣៩ នៃច្បាប់ស្ដីពី ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។ បើបទចោទទាំងនេះបូកបញ្ចូលគ្នា ពួកគេម្នាក់ៗប្រឈមនឹងការជាប់ពន្ធនាគាររយៈពេល ១៦ ឆ្នាំ។ នៅថ្ងៃទី២១ ខែសីហា ឆ្នាំ២០១៨ អ្នកទាំងពីរត្រូវបានដោះលែងឲ្យនៅក្រៅឃុំបន្ទាប់ពីជាប់ឃុំឃាំងរយៈពេលជាងប្រាំបួនខែ ប៉ុន្តែត្រូវដាក់ឱ្យស្ថិតនៅក្រោមការត្រួតពិនិត្យរបស់តុលាការ៕
ដោយ៖កូឡាប
