ទោះបីយើងរស់នៅក្នុងពិភពសម័យទំនើប ដែលវ័យរបស់មនុស្សម្នាក់ៗត្រូវបានចាត់ទុកថាគ្រាន់តែជាតួលេខក៏ដោយ តែមិនមែនគ្រប់ឪពុកម្តាយទាំងអស់ សុទ្ធតែពេញចិត្តនឹងកូនៗរបស់ពួកគេ រៀបការជាមួយនឹងនរណាម្នាក់ ដែលមានអាយុចាស់ជាងច្រើនខ្លាំងនោះទេ ។ ទោះយ៉ាងណា កូនក្រមុំម្នាក់នេះបានរកឃើញវិធីមួយ ដើម្បីដោះស្រាយជាមួយអនាគតឪពុកម្តាយក្មេករបស់នាង ។
កាលពីដើមខែនេះ (មករា) វីដេអូមួយបង្ហាញឲ្យឃើញកូនកំលោះអាយុ ២៣ ឆ្នាំ រៀបការជាមួយកូនក្រមុំអាយុ ៣៨ បានរីករាលទទួលការចាប់អារម្មណ៍ជាខ្លាំង នៅលើបណ្តាញសង្គម ។ អ្នកនិយមលេងអ៊ីនធើរណេត បាននាំគ្នាភ្ញាក់ផ្អើលព្រោះតែអាយុរវាងពួកគេ«បងប្អូន»គ្នារហូតទៅ ១៥ ឆ្នាំ ។ ហើយអ្វីដែលធ្វើឲ្យកាន់តែហួសចិត្តទៀតនោះ គឺត្រង់ថា អាយុកូនក្រមុំប្អូនម្តាយរបស់កូនកំលោះ១ឆ្នាំប៉ុណ្ណោះ ។
យោងតាម China Press ពិធីមង្គលការបង្កការភ្ញាក់ផ្អើលនេះ បានកើតឡើងនៅខេត្ត Hainan ប្រទេសចិន ។ ដំបូងឡើយ ឪពុកម្តាយកូនកំលោះដែលមានអាយុ ៤១ ឆ្នាំ និង ៣៩ ឆ្នាំ ពុំយល់ព្រមឲ្យមានពិធីមង្គលការនេះទេ ព្រោះតែហេតុផលអាយុបងប្អូនគ្នាដាច់ស្រឡះយ៉ាងនេះ ។
ទោះយ៉ាងណា កូនកំមុំជាសេដ្ឋីម្នាក់នេះ បានគ្របដណ្តប់ពួកគេ ជាមួយអំណាចទឹកប្រាក់របស់នាង ។ បើតាមដឹង ស្ត្រីជាកូនក្រមុំបានចំណាយទឹកប្រាក់ទៅលើឪពុកម្តាយកូនកំលោះចំនួន ៥ លានយន់ (ស្មើនឹង ៧៨៨០០០ ដុល្លារអាមេរិក) ដើម្បីទទួលការយល់ព្រមឲ្យមានពិធីមង្គលនេះឡើង ៕ ចន្ទី