ភ្នំពេញ៖ បុរសជើងខ្លាំងម្នាក់ ខឹងយុវជនជាបុគ្គលិកដឹកម្ហូបក្រុមហ៊ុនញ៉ាំ 24h ម្នាក់ ជិះម៉ូតូវ៉ាជែងម៉ូតូខ្លួនលឿន ក៏ជិះម៉ូតូដេញបំបុកពីក្រោយ បណ្តាលឲ្យដួលរួចចុះទៅវាយបែកមុខបែកមាត់ ផ្អើលប្រជាពលរដ្ឋ និងសមត្ថកិច្ចចុះអន្តរាគមន៍ កាលពីវេលាម៉ោង៩ យប់ថ្ងៃទី២៦ ខែឧសភា ឆ្នាំ២០២០ នៅចំណុចស្តុកពេទ្យចិន តាមបណ្តោយផ្លូវព្រះមុនីវង្សកែងនឹងផ្លូវព្រះសីហនុ ក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ។
តាមសម្ដីជនរងគ្រោះបានឲ្យដឹងថា មុនកើតហេតុរូបគាត់បានជិះម៉ូតូមួយគ្រឿងម៉ាកឌ្រីមសង់ស៊េរីឆ្នាំ ២០១៧ ពណ៌ខ្មៅ ពាក់ផ្លាកលេខភ្នំពេញ 1GG-1088 បានដឹកម្ហូបបក្រុមហ៊ុនឆ្ងាញ់ 24 ម៉ោងយកទៅឲ្យភ្ញៀវដោយធ្វើដំណើរ តាមបណ្តោយផ្លូវព្រះមុនីវង្ស ទិសដៅពីជើងទៅត្បូង លុះមកដល់ចំណុចស្តុបផ្លូវភ្លោះអូរឫស្សី ក៏ប្រទះនឹងបុរសម្នាក់ជាជនដៃដល់ ជិះម៉ូតូមួយគ្រឿងម៉ាកហុងដាវ៉េវ ពណ៌ខ្មៅពាក់ផ្លាកលេខភ្នំពេញ 1CS-5797 ខណៈជិះស្របទិសដៅគ្នា ហើយបានស្រែកទៅលើរូបគេថា ម៉េចបានជាជិះម៉ូតូវ៉ាជែងលឿនបម្រុងប៉ះគេប៉ះឯង បន្ទាប់មករូបគេ ក៏មិនបានតបតទៅវិញដែរ ដោយជិះម៉ូតូដំណើរទៅមុខទៀត ដោយប្រញាប់យកម្ហូបឲ្យភ្ញៀវ លុះជិះមកដល់ចំណុចស្តុបពេទ្យចិន កន្លែងកើតហេតុខាងលើ បានឈប់នៅភ្លើងស្តុប ស្រាប់តែជនបង្កក៏ជិះម៉ូតូមកបំបុកម៉ូតូរបស់គេ ពីក្រោយពេញទំហឹង បណ្ដាលឲ្យដួលទៅនឹងថ្នល់ រួចចុះមកវាយជាច្រើនដៃ បណ្ដាលឱ្យរូបគាត់រងរបួសបែកមុខបែកមាត់។
បន្ទាប់មក បង្កឲ្យមានការភ្ញាក់ផ្អើល ដល់បងប្អូនប្រជាពលរដ្ឋដែលធ្វើដំណើរតាមផ្លូវ ក៏ដូចជា សមត្ថកិច្ចមូលដ្ឋាន ចុះមកអន្តរាគមន៍ភ្លាមៗ រួចបានយកជនបង្ក និងជនរងគ្រោះ ទៅកាន់ប៉ុស្តិ៍នគរបាលរដ្ឋបាលបឹងព្រលឹតដើម្បីសួរនាំនិងដោះស្រាយតាមនីតិវិធី ៕
ដោយ ៖ ភត្រានិង សាម៉េត
