បាត់ដំបង៖ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានមានប្រសាសន៍ថាបច្ចុប្បន្ន វិស័យធនាគារនិងហិរញ្ញវត្ថុនៅកម្ពុជានៅ មានបញ្ហាប្រឈមសំខាន់ៗមួយចំនួនដូចជា អត្រាការប្រាក់នៅមានកម្រិតខ្ពស់ បំណុលលើសលប់ ការផ្តល់ប្រាក់កម្ចីដោយគ្មានច្បាប់អនុញ្ញាតនិងការផ្សព្វផ្សាយព័ត៌មានដែលមិនឆ្លុះបញ្ចាំងពីតថភាពបច្ចុប្បន្នរបស់វិស័យមីក្រូហិរញ្ញវត្ថុនិងមានចេតនាបំពុលបរិយាកាសសង្គម ព្រមទាំងកេងចំណេញប្រយោជន៍ផ្ទាល់ខ្លួនទាំងផលប្រយោជន៍ហិរញ្ញវត្ថុ និងនយោបាយជាដើម ។
អតិថិជនរបស់គ្រឹះស្ថានមីក្រូហិរញ្ញវត្ថុនៅកម្ពុជាប្រមាណជាង១៧មឺននាក់ បានស្នើសុំឲ្យរៀបចំឥណទានឡើងវិញ(ក្នុងនោះអតិថិជនចំនួន ១៥២.៨០៨ នាក់ ឬជិត៩០ភាគរយ នៃអតិថិជន)ដែលបានស្នើសុំ បានទទួលការអនុញ្ញាតរៀបចំឥណទានឡើងវិញ ដែលមានទំហំឥណទានសរុបចំនួនប្រមាណជា ៦៥៦លានដុល្លារ ។
ការលើកឡើងបែបនេះ នៅក្នុងសិក្ខាសាលាផ្សព្វផ្សាយស្តីពី វិស័យធនាគារនិងហិរញ្ញវត្ថុនៅកម្ពុជា ក្រោមប្រធានបទ (កិច្ចគាំពារអតិថិជនរបស់គ្រះស្ថានធនាគារ និងហិរញ្ញវត្ថុ ក្នុងស្ថានភាពនៃការរីករាលដាលនៃជំងឺកូវីដ១៩) កាលពីថ្ងៃទី២៦ខែឧសភាឆ្នាំ២០២០នៅខេត្តបាត់ដំបង។
លោក គា បូរាណប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានមានប្រសាសន៍ឲ្យដឹងថាដោយសារបញ្ហាជំងឺកូវីដ១៩ ធ្វើឲ្យអតិថិជនរបស់គ្រឹះស្ថានមីក្រូហិរញ្ញវត្ថុ នៅកម្ពុជា ចំនួនប្រមាណ១៧៥.៣៦៤នាក់ បានស្នើសុំរៀបចំឥណទានឡើងវិញ ក្នុងនោះអតិថិជនចំនួន ១៥២.៨០៨ នាក់ ឬជិត៩០ភាគរយ នៃអតិថិជនដែលបានស្នើសុំ បានទទួលការអនុញ្ញាតរៀបចំឥណទានឡើងវិញ ដែលមានទំហំឥណទានសរុបចំនួនប្រមាណជា ៦៥៦លានដុល្លារ ។ចំពោះសំណើរបស់អតិថិជននេះ បានធ្វើឲ្យសមាគមគិតចាប់ពីខែមីនាឆ្នាំ២០២០ បានប្រមូលទិន្និន័យអំពីការរៀបចំឥណទានឡើងវិញ ជារៀងរាល់សប្តាហ៍ ពីសមាជិករបស់ខ្លួន រួមមានគ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យាហិរញ្ញវត្ថុនិងគ្រឹះស្ថានឥណទានជនបទ។ទិន្នន័យនេះ ត្រូវប្រមូលឡើងក្នុងគោលបំណង តាមដានផលប៉ះពាល់ជាក់ស្តែងនៃជំងឺកូវីដ១៩ទៅលើអតិថិជន ក៏ដូចជាការគាំពារអតិថិជនរបស់គ្រឹះស្ថានដែលជាសមាជិកនិងការវិវត្តន៍ទូទៅនៃវិស័យមីក្រូហិរញ្ញវត្ថុទាំងមូល ដើម្បីធ្វើការវាយតម្លៃនិងផ្ញើរបាយការណ៍ជូនភាគីពាក់ព័ន្ធ។
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានមានប្រសាសន៍ថាបច្ចុប្បន្ន វិស័យធនាគារនិងហិរញ្ញវត្ថុនៅកម្ពុជានៅ មានបញ្ហាប្រឈមសំខាន់ៗមួយចំនួនដូចជា អត្រាការប្រាក់នៅមានកម្រិតខ្ពស់ បំណុលលើសលប់ ការផ្តល់ប្រាក់កម្ចីដោយគ្មានច្បាប់អនុញ្ញាតនិងការផ្សព្វផ្សាយព័ត៌មានដែលមិនឆ្លុះបញ្ចាំងពីតថភាពបច្ចុប្បន្នរបស់វិស័យមីក្រូហិរញ្ញវត្ថុនិងមានចេតនាបំពុលបរិយាកាសសង្គម ព្រមទាំងកេងចំណេញប្រយោជន៍ផ្ទាល់ខ្លួនទាំងផលប្រយោជន៍ហិរញ្ញវត្ថុនិងនយោបាយជាដើម។
ជាក់ស្តែង មានជនឱកាសនិយមមួយចំនួន ពុំទទួលស្គាល់ការអភិវឌ្ឍន៍ជាវិជ្ជមានរបស់វិស័យធនាគារនិងហិរញ្ញវត្ថុឡើយ ហើយបានយកវិស័យនេះ ធ្វើជាឧបករណ៍ ដើម្បីកេងចំណេញផលប្រយោជន៍។
នៅតែបន្តរិះគន់ថាវិស័យនេះគ្រាន់តែជាអន្ទាក់ធ្វើឲ្យប្រជាពលរដ្ឋក្រីក្រ កាន់តែជំពាក់បំណុលលើសលប់បន្ថែមទៀត ដោយម្ចាស់បំណុលកំពុងកេងប្រវ័ញ្ចកូនបំណុល៕
ដោយៈអ៊ុងសារុំ
