ប្រធានាធិបតីអាមេរិច ដូណាល់ ត្រាំ កាលពីថ្ងៃអង្គារ បានធ្វើការព្រមានថា ទីក្រុងហុងកុង អាចនឹងបាត់បង់ឋានៈជាមជ្ឈមណ្ឌលហិរញ្ញវត្ថុ ប្រសិនជាសេចក្តីស្នើច្បាប់ សន្តិសុខរបស់ចិនដំណើរការ ហើយលោកសន្យាថាអាមេរិច នឹងមានការឆ្លើយតបគួរឲ្យចាប់អារម្មណ៍ ក្នុងរយៈពេលប៉ុន្មានថ្ងៃទៀត។
មេដឹកនាំហុងកុង អ្នកស្រី Carrie Lam បានថ្លែងកាលពីថ្ងៃអង្គារម្សិលមិញថា ច្បាប់សន្តិសុខនឹងមិនប៉ះពាល់ដល់សិទ្ធិ និងសេរីភាពរបស់ទីក្រុងឡើយ ហើយច្បាប់នោះនឹងធ្វើការហាមការធ្វើអបគមន៍ ការបះបោរ សកម្មភាពភេរវកម្ម និងការជ្រៀតជ្រែករបស់បរទេស ចូលក្នុងកិច្ចការរបស់ហុងកុង។
ប៉ុន្តែ “វាពិបាកណាស់ដែលមើលឃើញថា ហុងកុងនៅតែជាមជ្ឈមណ្ឌលហិរញ្ញវត្ថុ ប្រសិនជាចិនគ្រប់គ្រង។” នេះជាការបញ្ជាក់របស់លេខាធិការសារព័ត៌មាន របស់សេតវិមានអាមេរិច ដែលការថ្លែងនេះ ជាការព្រមានផ្ទាល់ចេញពីប្រធានាធិបតីដូណាល់ ត្រាំ។
លោកត្រាំ ត្រូវបានអ្នកសារព័ត៌មានសាកសួរថា ថាតើគាត់កំពុងពិចារណា ពីទណ្ឌកម្មប្រឆាំងចិន ឬរឹតបន្តឹងទិដ្ឋការសម្រាប់និស្សិតចិនឬយ៉ាងណា។ គាត់បានឆ្លើយថា “វាគឺជាសំនួរដ៏មានសារសំខាន់” ហើយលោកបាននិយាយថា លោកនឹងធ្វើអ្វីៗដែលគួរឲ្យចាប់អារម្មណ៍។
“វាគឺជាអ្វីដែលអ្នកនឹងបានលឺនៅក្នុងរយៈពេលប្រហែល ១សប្តាហ៍។ ខ្ញុំគិតថា វាមានឥទ្ធិពលខ្លាំងណាស់”។ ទោះយ៉ាងណា លោក ត្រាំមិនបានផ្តល់សេចក្តីលម្អិតឡើយពីវិធានការរបស់គាត់ចំពោះចិន។
សូមបញ្ជាក់ថា ទីក្រុងប៉េកាំង បានស្នើច្បាប់សន្តិសុខជាតិ កាលពីសប្តាហ៍មុន ដើម្បីគ្រប់គ្រងទីក្រុងហុងកុង ដែលច្បាប់នោះ ត្រូវបានអ្នករិះគន់មានការព្រួយបារម្ភថា អាចជាសេចក្តីសម្លាប់ដល់សេរីភាព ដ៏មានតម្លៃរបស់ទីក្រុង។
ទីក្រុងហុងកុង ត្រូវបានអង់គ្លេស ប្រគល់ទៅឲ្យចិនវិញក្នុងឆ្នាំ ១៩៩៧ ក្រោមកិច្ចព្រមព្រៀងផ្តល់ស្វ័យភាព និងសិទ្ធិសេរីភាពដល់ទីក្រុងនេះ សម្រាប់រយៈពេល ៥០ឆ្នាំ។ ការទទួលបានសិទ្ធិស្វ័យភាព ពិសេសរបស់ទីក្រុងហុងកុង ក៏មានចែងក្នុងច្បាប់អាមេរិចដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP