ប្រទេសប្រេស៊ីលបានប្រកាសថា មានអ្នកស្លាប់ដោយសារវីរុស COVID-19 ប្រចាំថ្ងៃខ្ពស់បំផុតក្នុងពិភពលោក ដោយមានអ្នកស្លាប់ថ្មីចំនួន ១.០៣៩នាក់ ដែលវាគឺជាការស្លាប់លើស ១.០០០នាក់ក្នុងរយៈពេល ៥ថ្ងៃជាប់គ្នា។
ប្រេស៊ីល ដែលកំពុងតែរងការវាយប្រហារខ្លាំងពីការរាតត្បាត មានអ្នកស្លាប់ប្រចាំថ្ងៃច្រើនជាងអាមេរិច។ អាមេរិចគឺជាប្រទេសដែលមានអ្នកឆ្លង និងស្លាប់ច្រើនជាងគេបំផុតរហូតមកដល់ពេលនេះ។
ក្នុងរយៈពេល ២៤ម៉ោងចុងក្រោយ អាមេរិចមានអ្នកស្លាប់ចំនួន ៦៥៧នាក់ ហើយក្នុងរយៈពេល ៣ថ្ងៃចុងក្រោយនេះ អាមេរិចមានអ្នកស្លាប់ក្រោម ៧០០នាក់។ ចំនួនអ្នកស្លាប់សរុបនៅអាមេរិចកើនដល់ ៩៨.៨៧៥នាក់។ នេះបើតាមទិន្នន័យរបស់សកលវិទ្យាល័យ Johns Hopkins។
នៅពេលជាមួយគ្នានេះដែរ ចំនួនអ្នកស្លាប់ប្រចាំថ្ងៃរបស់ប្រេស៊ីលលើស ១.០០០នាក់ចំនួន ៤ដង ចាប់តាំងពីមានការផ្ទុះរាតត្បាតខ្លាំងក្នុងរយៈពេលប៉ុន្មានសប្តាហ៍ចុងក្រោយនេះ។
បច្ចុប្បន្ន ប្រេស៊ីលមានអ្នកស្លាប់សរុបចំនួន ២៤.៥១២នាក់។ អ្នកជំនាញថាចំនួនអ្នកឆ្លងអាចនឹងមានច្រើន ខណៈកំពុងមានការធ្វើតេស្ត។
ប្រេស៊ីលមានប្រជាជនសរុប ២១០លាននាក់ ហើយបច្ចុប្បន្ន ប្រទេសនេះមានប្រជាជនចំនួន ៣៩១.២២២នាក់ឆ្លងវីរុសកូរ៉ូណា ដែលស្ថិតនៅតំណែងលេខ ២តាមពីក្រោយអាមេរិចដែលមានអ្នកឆ្លងជិត ១,៧លាននាក់។
សូមបញ្ជាក់ថា វីរុសកូរ៉ូណា បានផ្ទុះឡើងដំបូងចេញពីទីក្រុងវូហាន ប្រទេសកាលពីចុងឆ្នាំ ២០១៩។ រហូតមកដល់ពេលនេះ វីរុសដ៏កាចសាហាវនេះ បានសម្លាប់ជីវិតមនុស្សជាង ៣៥០.០០០នាក់ និងឆ្លងទៅកាន់មនុស្សជិត ៥.៥៨០.០០០នាក់។ អ្នកជំងឺប្រមាណ ២,២៨លាននាក់បានជាសះស្បើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP