ខេត្តស្វាយរៀងៈ ក្រុមការងារសាខាកាកបាទក្រហមកម្ពុជាខេត្តស្វាយរៀង ដឹកនាំដោយលោកស្រី ដួង វណ្ណា ប្រធានកិត្តិយសសាខា និងសហការី នៅរសៀលថ្ងៃទី ២៧ ខែ ឧសភា ឆ្នាំ ២០២០ បាននាំយកអំណោយមនុស្សធម៌របស់សាខា ចុះសួរសុខទុក្ខ និងផ្តល់ជូនគ្រួសាររងគ្រោះដោយសារអគ្គីភ័យ ១ គ្រួសារ ឈ្មោះ រាម យ៉ាត អាយុ ៦៦ ឆ្នាំ រស់នៅភូមិជៀសឫស្សី ឃុំកំពង់ចំឡង មូលហេតុដោយសាររាលភ្លើងចង្ក្រានពេលដាំបាយនៅលើផ្ទះ បណ្តាលឲ្យឆេះផ្ទះទំហំផ្ទះ ៤គុណ៦ម៉ែត្រ ដំបូលស័ង្កសី ជញ្ជាំងស្លឹក ខូចខាតទាំងស្រុងរួមនឹងសម្ភារប្រើប្រាស់ ។
មានប្រសាសន៍សំណេះសំណាលនាឱកាសនោះ លោកស្រី ដួង វណ្ណា បានចូលរួមសោកស្តាយនូការបាត់បង់ផ្ទះសម្បែង សម្ភារប្រើប្រាស់នាពេលនេះ និងបាននាំមកនូវការផ្តាំផ្ញើសួរសុខទុក្ខ ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះគ្រួសាររងគ្រោះទាំងអស់ដោយក្តីនឹករលឹក ។
ជាមួយគ្នានេះលោកស្រីក៏បានបញ្ជាក់ថាៈ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានតែងតែយកចិត្តទុកដាក់យ៉ាងខ្លាំង ដល់សុខទុក្ខប្រជាពលរដ្ឋទូទៅ ទោះបីស្ថិតនៅក្នុងស្ថានភាពលំបាកយ៉ាងណាក៏ដោយ ហើយការចុះជួយសង្គ្រោះទៀតសោត គឺធ្វើឡើងដោយមិនប្រកាន់វណ្ណៈ ពូជសាសន៍ សាសនា ពណ៌សម្បុរ ឬនិន្នាការនយោបាយអ្វីឡើយ ។
ជាមួយគ្នានេះផងដែរ លោកស្រី ដួង វណ្ណា ក៏បានលើកទឹកចិត្តដល់គ្រួសាររងគ្រោះសូមកុំអស់សង្ឃឹម ត្រូវមានការសាមគ្គីភាពក្នុងគ្រួសារ ត្រូវពង្រឹងជីវភាពបន្ថែមទៀត ដោយខិតខំធ្វើការរកប្រាក់ចំណូលតាមជំនាញរៀងៗខ្លួន ព្រោះអំណោយដែលបានផ្តល់ជូនពេលនេះ អាចជួយសម្រាលការលំបាកបានមួយគ្រាតែប៉ុណ្ណោះ លោកជំទាវក៏បានអំពាវនាវដល់ប្រជាពលរដ្ឋទាំងអស់សូម មានការប្រុងប្រយ័ត្នចំពោះការប្រើប្រាស់ភ្លើង ទៀន ធូប ចង្ក្រាន និងចរន្តអគ្គិសនី ដែលជាប្រភពនៃគ្រោះថ្នាក់ និងត្រូវត្រៀមឧបករណ៍ពន្លត់អគ្គិភ័យ និងទឹកនៅក្នុងពាងជាប់ជាប្រចាំ ។
លោកស្រីក៏បានផ្តាំផ្ញើដល់អាជ្ញាធរភូមិ ឃុំ ត្រូវសហការគ្នាជួយរៀបចំសាងសង់ផ្ទះគាត់ដើម្បីជាជម្រកសម្រាប់ស្នាក់នៅបន្ត ។ អំណោយដែលបានផ្តល់ជូនរួមមាន៖ អង្ករ ៥០ គ.ក្រ កៅស៊ូតង់ ១ ធុងទឹកជ័រ ១ ឆ្នាំងបាយ សម្លរ ២ កន្ទេលបត់ ១ មី ១ កេស ត្រីខ ១០ កំប៉ុង ទឹកស៊ីអ៊ីវ ៦ ដប មុង ១ ភួយ ១ ក្រម៉ា ១ សារុង ១ និងថវិកា ៤០០,០០០ រៀល លោកជំទាវក៏បាននាំយកថវិការបស់លោកជំទាវកិត្តិសង្គហបណ្ឌិត ម៉ែន សំអន ឧបត្ថម្ភ បន្ថែមដល់គ្រួសាររងគ្រោះចំនួន ៥០០,០០០ រៀល ផងដែរ៕
ដោយ៖ វ៉ៃកូ