ភ្នំពេញ៖ បើមិនមានអ្វីប្រែប្រួល តាមសេចក្តីជូនដំណឹងរបស់រដ្ឋបាលខេត្តកែបនៅថ្ងៃទី ២៧ ខែឧសភា ឆ្នាំ២០២០នេះថា អភិបាលខេត្តកែបនឹងត្រូវផ្លាស់ប្ដូរតំណែងដោយ លោក សោម ពិសិដ្ឋ អភិបាលរងខេត្តកែប ត្រូវបានប្រកាសតែងតាំងជាអភិបាលខេត្តជំនួសលោក កែន សត្ថា។
ពិធីប្រកាសឲ្យចូលកាន់តំណែងអភិបាលខេត្តកែប នឹងធ្វើឡើងនៅព្រឹកថ្ងៃទី២៩ ខែឧសភា ឆ្នាំ២០២០ក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។
ក្នុងសេចក្តីប្រកាសព័ត៌មានរបស់រដ្ឋបាលខេត្តកែប លោក អ៊ឹង វុទ្ធី នាយករដ្ឋបាលសាលាខេត្តកែប បានបញ្ជាក់ថា រដ្ឋបាលខេត្ត បានធ្វើលិខិតអញ្ជើញថ្នាក់ដឹកនាំខេត្ត តាមមន្ទីរ អង្គភាព និងកងកម្លាំងប្រដាប់អាវុធដើម្បី ចូលរួមក្នុងពិធីប្រកាសចូលកាន់តំណែងនេះ ដែលប្រព្រឹត្តទៅនៅវេលាម៉ោង ៨ព្រឹកនៅសាលាខេត្ត៕
ដោយ៖កូឡាប
