ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៧ ខែឧសភា ឆ្នាំ២០២០នេះ បានណែនាំស្ថានទូតកម្ពុជាប្រចាំនៅក្រៅប្រទេសទាំងអស់ អំពីការសម្រេចរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា លើកលែងវិញ្ញាបនបត្របញ្ជាក់សុខភាព សម្រាប់ប្រជាពលរដ្ឋកម្ពុជា ដែលធ្វើដំណើរត្រឡប់ចូលប្រទេសវិញ និងការបន្តអនុវត្តវិធានការរឹតបន្តឹងការធ្វើដំណើរចំពោះជនបរទេស។
បើតាមក្រសួងការប្រទេសចេញលិខិតមួយច្បាប់ជម្រាបជូនដល់ឯកអគ្គរាជទូត ភារធារីស្តីទី អគ្គកុងស៊ុល និងកុងស៊ុលកិត្តិយសនៃព្រះរាជាណាចក្រកម្ពុជាប្រចាំនៅបរទេសក្នុងកម្មវត្ថុការលើកលែងវិញ្ញាបនបត្របញ្ជាក់សុខភាពសម្រាប់អ្នកដំណើរជាជនជាតិខ្មែរចូលមកប្រទេសកម្ពុជា និងការបន្តអនុវត្តវិធានការរឹតបន្តឹងការធ្វើដំណើរ។
យោងតាមអនុសាសន៍ដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រីកាលពីថ្ងៃទី 27 ខែឧសភាឆ្នាំ 2020 ស្ដីពីការកែសម្រួលវិធានការការពារទប់ស្កាត់និងឆ្លើយតបការរីករាលដាលនៃជំងឺកូវីដ១៩ ដែលមានចែងក្នុងសេចក្តីប្រកាសរបស់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ថ្ងៃទី 20 ខែឧសភាឆ្នាំ 2020 ពាក្យ 4 និងជនជាតិខ្មែរដែលធ្វើដំណើរចូលមកប្រទេសកម្ពុជាវិញដែលមានខ្លឹមសារដូចតទៅ៖
១)លើកលែងវិញ្ញាបនបត្របញ្ជាក់សុខភាពបញ្ជាក់ថាគ្មានមេរោគកូវីដ១៩ សម្រាប់អ្នកដំណើរជាជនជាតិខ្មែរកាន់លិខិតឆ្លងដែននៃព្រះរាជាណាចក្រកម្ពុជាដែលធ្វើដំណើរចូលមកព្រះរាជាណាចក្រកម្ពុជា។
២)រាល់វិធានការផ្សេងទៀតដែលមានចែងក្នុងសេចក្តីប្រកាសលេខ 101សខលចុះថ្ងៃទី 20 ខែឧសភាឆ្នាំ 2020 របស់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ត្រូវស្ថិតនៅជាធរមានដដែល។
នៅថ្ងៃទី ២៧ ខែ ឧសភា ឆ្នាំ ២០២០ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចវិធានការដោះស្រាយជាផ្លូវការចំពោះពលរដ្ឋខ្មែរដែលកាន់លិខិតឆ្លងដែនកម្ពុជាហេីយដែលកំពុងធ្វេីដំណេីរឬមានបំណងធ្វេីដំណេីរពីក្រៅប្រទេសវិលត្រឡប់ចូលមកកម្ពុជាវិញ គឺមិនតម្រូវអោយមានវិញ្ញាបនបត្របញ្ជាក់សុខភាពថាគ្មានជំងឺឆ្លងកូវីដ-១៩ ទេ។ វិធានការនេះគឺនឹងជួយសម្រួលដល់ពលរដ្ឋនៅក្រៅប្រទេសឆាប់បានវិលត្រឡប់មកជួបជុំក្រុមគ្រួសារនៅក្នុងប្រទេសខ្លួនវិញ។
ប៉ុន្តែពេលវិលត្រឡប់មកដល់ប្រទេសវិញគឺតម្រូវអោយចូលពិនិត្យសុខភាព និងពិនិត្យសំណាក ហេីយដាក់ឲ្យស្នាក់នៅដាច់ដោយឡែកចំនួន១៤ថ្ងៃរង់ចាំលទ្ធផលសំណាកថាតេីមានរោគឆ្លងឬអត់រោគឆ្លង ទេីបអនុញ្ញាតឲ្យទៅលំនៅដ្ឋានវិញ៕
ដោយ៖កូឡាប
