សហរដ្ឋអាមេរិច កាលពីថ្ងៃពុធបានធ្វើការដកហូត ឋានៈពិសេសចេញពីទីក្រុងហុងកុង ដើម្បីត្រួសត្រាយផ្លូវ ឲ្យមានការដកសិទ្ធិពាណិជ្ជកម្មពិសេសពីក្រុងហុង ខណៈដែលទីក្រុងវ៉ាស៊ីនចោនបានចោទប្រកាន់ចិនថា ជាន់ឈ្លីស្វ័យភាពរបស់ទីក្រុងហុងកុង។
ប៉ុន្មានម៉ោងមុនពេលសភាចិនកំណត់បោះឆ្នោតលើច្បាប់សន្តិសុខហុងកុង ដែលបណ្តាលឲ្យមានការផ្ទុះការតវ៉ាយ៉ាងខ្លាំងក្នុងទីក្រុង លោក Mike Pompeo រដ្ឋមន្ត្រីការរបរទេសអាមេរិច បានធ្វើការបញ្ជាក់ទៅកាន់សភាថា ហុងកុងមិនបន្តទទួលបានស្វ័យភាពទៀតឡើយ ក្រោមច្បាប់អាមេរិច ដែលខ្លួនទទួលបាន ក្រោយពេលទីក្រុងត្រូវបានប្រគល់ទៅអោយចិនវិញកាលពីឆ្នាំ ១៩៩៧។
ក្រោមច្បាប់អាមេរិចមួយដែលត្រូវបានអនុម័យកាលពីឆ្នាំមុន ដើម្បីគាំទ្រដល់អ្នកតវ៉ា រដ្ឋបាលអាមេរិចត្រូវធ្វើការបញ្ជាក់ថា ហុងកុងនៅតែទទួលបានសេរីភាពដែលជាការសន្យារបស់ទីក្រុងប៉េកាំង នៅពេលធ្វើការចរចារជាមួយនឹងអង់គ្លេស ដើម្បីទទួលបានការគ្រប់គ្រងហុងកុងវិញ។
លោក Mike Pompeo ថ្លែងក្នុងសេចក្តីប្រកាសថា “គ្មាននរណាម្នាក់អាចអះអាងនៅថ្ងៃនេះថា ហុងកុងនៅតែទទួលបានស្វ័យភាពខ្ពស់ពីចិនឡើយ”។
ការកំណត់ថាហុងកុងមិនទទួលបានស្វ័យភាព មានន័យថា ហុងកុងអាចនឹងបាត់បង់សិទ្ធិពាណិជ្ជកម្ម រួមមានការយកពន្ធទាបពីសហរដ្ឋអាមេរិច។
ចំពោះបញ្ហានេះដែរ លោក David Stilwell មន្ត្រីជាន់ខ្ពស់ក្រសួងការបរទេសសម្រាប់កិច្ចការអាស៊ីខាងកើតបានថ្លែងថា ប្រធានាធិបតី ដូណាល់ ត្រាំ នឹងធ្វើការសម្រេចចិត្តថានឹងចាត់វិធានការអ្វី។
លោកបានថ្លែងប្រាប់អ្នកសារពត៌មានថា “ជំហានដំបូងនឹងត្រូវពិចារណា ហើយវានឹងជាគោលដៅ សម្រាប់ឲ្យចិនធ្វើការផ្លាស់ប្តូរអាកប្បកិរិយា”។ នៅពេលជាមួយគ្នានេះដែរ លោកទទួលស្គាល់ថា វាមិនទំនងសោះដែលទីក្រុងប៉េកាំងនឹងផ្លាស់ប្តូរឥរិយាបទ។
លោកថ្លែងថា អាមេរិចមិនចង់ធ្វើបាបប្រជាជនហុងកុងឡើយ។ “វាជាការសម្រេចចិត្តរបស់រដ្ឋាភិបាលក្នុងទីក្រុងប៉េកាំង មិនមែនការសម្រេចចិត្តរបស់អាមេរិចឡើយ”។
ទីក្រុងហុងកុង ត្រូវបានអង់គ្លេសប្រគល់ទៅឲ្យចិនវិញក្នុងឆ្នាំ ១៩៩៧ ក្រោមកិច្ចព្រមព្រៀងផ្តល់ស្វ័យភាព និងសិទ្ធិសេរីភាពដល់ទីក្រុងនេះសម្រាប់រយៈពេល ៥០ឆ្នាំ៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP