ប្រទេសកូរ៉េខាងត្បូងបានរកឃើញអ្នកផ្ទុកវីរុសកូរ៉ូណាថ្មីចំនួន ៧៩នាក់នៅថ្ងៃព្រហស្បតិ៍នេះ ដែលជាចំនួនច្រើនបំផុតចាប់តាំងពីថ្ងៃទី ៥ ខែមេសាមក និងជាការកើនឡើងក្នុងរយៈពេល ៣ថ្ងៃជាប់គ្នា។ ការរឃើញថ្មីជិត ៨០ករណីនេះធ្វើឲ្យមានការព្រួយបារម្ភពីការផ្ទុះរាតត្បាតលើកទី ២។
រដ្ឋមន្ត្រីសុខាភិបាល លោក Park Neung-hoo បាននិយាយថា មានយា់ងតិច ៦៩ករណីក្នុងសប្តាហ៍នេះ ជាប់ពាក់ព័ន្ធនឹងការឆ្លងនៅកន្លែងដឹកជញ្ជូនរបស់ក្រុមហ៊ុន Coupang ដែលជាក្រុមហ៊ុនលក់ទំនិញអនឡាញដ៏ធំមួយក្នុងប្រទេស។
បើតាមមជ្ឈមណ្ឌលគ្រប់គ្រង និងបង្ការជំងឺ ការរកឃើញករណីថ្មីជិត ៨០នេះ បណ្តាលឲ្យចំនួនអ្នកឆ្លងសរុប ក្នុងប្រទេសកើនឡើងដល់ ១១.៣៤៤នាក់ និងមានអ្នកស្លាប់ ២៦៩នាក់។
ប្រទេសកូរ៉េខាងត្បូងត្រូវបានគេសរសើរខ្លាំង ចំពោះវិធានការទប់ស្កាត់ការរាតត្បាតរបស់វីរុសកូរ៉ូណា បណ្តាលឲ្យអត្រាឆ្លងថ្មីមានការកើនឡើងយឺតបំផុត ធៀបទៅនឹងប្រទេសមួយចំនួននៅក្នុងតំបន់អឺរ៉ុប។ កូរ៉េខាងត្បូងជាប្រទេសទី ២បន្ទាប់ពីចិន ដែលមានការរាតត្បាតខ្លាំង ប៉ុន្តែប្រទេសនេះបានទប់ស្កាត់វាបានយ៉ាងល្អ។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះចេញដំបូងពីទីក្រុងវូហាន ប្រទេសចិន កាលពីចុងឆ្នាំ ២០១៩ ហើយរហូតមកដល់ពេលនេះ វីរុសនេះបានសម្លាប់ជីវិតមនុស្សជាង ៣៥៦.០០០នាក់ និងឆ្លងទៅកាន់មនុស្សជិត ៥.៦៩០.០០០នាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
