អ្នកភូមិប៉ាគីស្ថានម្នាក់បានទទួលដល់នាយករដ្ឋមន្ត្រីឥណ្ឌា លោក Narendra Modi ប្រគល់ព្រាបមួយក្បាលដល់គាត់វិញ ដែលបច្ចុប្បន្ន ព្រាបនោះកំពុងត្រូវគេឃុំខ្លួនក្នុងប្រទេសឥណ្ឌា ដោយរងការចោទប្រកាន់ថាជាព្រាបស៊ើបការណ៍។
បុរសម្នាក់ ដែលរស់នៅចំងាយប្រមាណ ៤គីឡូម៉ែត្រពីព្រំដែន បាននិយាយថា គាត់បង្ហោះព្រាបគាត់មួយក្បាលដើម្បីអប់អរពិធីបុណ្យ Eid។ Eid festival ជាពិធីបុណ្យសាសនារបស់អ្នកកាន់សាសនាអ៊ីស្លាម។
ប៉ូលីសឥណ្ឌាបញ្ជាក់ថា ព្រាបនោះមានជញ្ជៀននៅជើងរបស់វា ដែលមានឆ្លាក់ជាកូដ ដែលពួកគេប្រើវាជាអក្សរសម្ងាត់។
ប៉ុន្តែអ្នកភូមិប៉ាគីស្ថាន ដែលអះអាងថា ព្រាបត្រូវចាប់ខ្លួនជាព្រាបរបស់គាត់ បាននិយាយថាកូដនៅគឺជាលេខទូរស័ព្ទរបស់គាត់។
កាសែតប៉ាគីស្ថាន Dawn បានបញ្ជាក់ថា បុរសប៉ាគីស្ថាននោះមានឈ្មោះថា Habibullah និងបានធ្វើការចុះផ្សាយថា គាត់មានចិញ្ជឹមព្រាបយ៉ាងច្រើន។
លោក Habibullah បានប្រាប់សារព័ត៌មានដូច្នេះថា ព្រាបរបស់គាត់ជានិមិត្តរូបនៃសន្តិភាព ហើយឥណ្ឌាគួរតែកុំធ្វើបាបដល់ព្រាបគ្មានទោសកំហុស។
អ្នកភូមិជាច្រើនចាប់បានព្រាបនៅកាលពីថ្ងៃចន្ទ នៅតាមបណ្តោព្រំដែនអន្តរជាតិ នៅក្នុងតំបន់ Kashsmir ដែលគ្រប់គ្រងដោយឥណ្ឌា និងបានប្រគល់វាឲ្យប៉ូលីស។
Kashmir ជាតំបន់ដែលឥណ្ឌា និងប៉ាគីស្ថានចង់គ្រប់គ្រងផ្តាច់មុខ ប៉ុន្តែប្រទេសទាំងពីរនេះគ្រប់គ្រងបានតែមួយផ្នែកម្នាក់ប៉ុណ្ណោះ ហើយវាគឺជាទីតាំងដែលមានការបាញ់ប្រហារគ្នារវាងប្រទេសមហាអំណាចនុយក្លេអ៊ែរទាំងពីរ។
នេះមិនមែនជាលើកទី១ឡើយ ដែលព្រាបបានហោះពីប៉ាគីស្ថានមកចូលទឹកដីឥណ្ឌា និងមានបញ្ហាជាមួយមន្ត្រីឥណ្ឌា។
កាលពីខែឧសភា ឆ្នាំ ២០១៥ ព្រាបសមួយក្បាលត្រូវបានចាប់ខ្លួន ក្រោយវាត្រូវបានប្រទះឃើញដោយក្មេងប្រុសអាយុ ១៤ឆ្នាំម្នាក់នៅក្នុងភូមិជិតព្រំដែន។
ចំណែកក្នុងខែតុលា ឆ្នាំ ២០១៦ ព្រាបមួយក្បាលទៀតត្រូវបានចាប់ឃុំខ្លួន ក្រោយពេលគេរកសារព្រមាន នាយករដ្ឋមន្ត្រីឥណ្ឌានៅលើខ្លួនរបស់វា៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
