ភ្នំពេញ៖ ក្រសួងសាធារណការ និងដឹកជញ្ជូននិង ស្ថាប័នពាកព័ន្ធផ្សេងៗទៀតបានពិនិត្យពិភាក្សា និងផ្តល់យោបល់លើសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូបង្ហូរ និងពិនិត្យពិភាក្សាលើសេចក្តីព្រាងប្រកាសចុងក្រោយស្តីពីការរៀបចំ និងការប្រព្រឹត្តទៅនៃការិយាល័យចំណុះ នាយកដ្ឋាននានារបស់អគ្គនាយកដ្ឋានប្រព័ន្ធចម្រោះទឹកកខ្វក់។
កិច្ចប្រជុំនេះដឹកនាំដោយឯកឧត្តម ប៉ាល់ ចន្ទតារា រដ្ឋលេខាធិការ ការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធផងដែរ ដើម្បីរៀបចំសេចក្តីព្រាងច្បាប់ (Ad-hoc) ពិនិត្យពិភាក្សាលើសេចក្តីព្រាងប្រកាសចុងក្រោយស្តីពីការរៀបចំ និងការប្រព្រឹត្តទៅនៃការិយាល័យចំណុះ នាយកដ្ឋាននានារបស់អគ្គនាយកដ្ឋានប្រព័ន្ធចម្រោះទឹកកខ្វក់។
កិច្ចប្រជុំនេះ ធ្វើឡើងដើម្បីពិភាក្សានិងផ្តល់យោបល់លើសេចក្តីព្រាងច្បាប់ស្តីពីការគ្រប់គ្រងទឹកកខ្វក់ និងប្រព័ន្ធលូបង្ហូរ និងសេចក្តីព្រាងប្រកាសស្តីពីការរៀបចំ និងប្រព្រឹត្តទៅនៃការិយាល័យចំណុះនាយកដ្ឋាននានា របស់អគ្គនាយកដ្ឋានប្រព័ន្ធចម្រោះទឹកកខ្វក់ ដោយធ្វើការសិក្សាឱ្យស៊ីជម្រៅលើខ្លឹមសារ រចនាសម្ព័ន្ធផ្ទៃក្នុងឱ្យមានភាពច្បាស់លាស់ មុនបែងចែកតួនាទីភារកិច្ចថ្នាក់ការិយាល័យនីមួយៗ ដើម្បីធានាឱ្យការងារប្រកបដោយប្រសិទ្ធភាព និងនិរន្តរភាព។
ឯកឧត្ដមរដ្ឋលេខាធិការ បានលើកឡើងអំពីលទ្ធផលការងារសំខាន់ៗសម្រេចបាន ក្រោយសេចក្តីសម្រេចស្ដីពីការបង្កើតក្រុមការងារអន្តរក្រសួងដើម្បីពិនិត្យពិភាក្សា និងផ្ដល់យោបល់លើសេចក្តីព្រាងច្បាប់ស្ដីពីការគ្រប់គ្រងទឹកកខ្វក់ និងរចនាសម្ព័ន្ធគ្រប់គ្រង ដឹកនាំការងារគ្រប់គ្រងទឹកកខ្វក់នៅកម្ពុជា។
ឯកឧត្ដមរដ្ឋលេខាធិការ បានគូសបញ្ជាក់អំពីសារសំខាន់នៃការពិនិត្យពិភាក្សាផ្តល់ធាតុចូលឱ្យបានស៊ីជម្រៅ និងការពិនិត្យកែតម្រូវពាក្យពេចន៍ឱ្យបានត្រឹមត្រូវជៀសវាងការខុសឆ្គងនូវសេចក្តីព្រាងប្រកាសស្តីពីការរៀបចំ និងប្រព្រឹត្តទៅនៃការិយាល័យចំណុះនាយកដ្ឋានរបស់អគ្គនាយកដ្ឋានប្រព័ន្ធចម្រោះទឹកកខ្វក់ មុនដាក់ជូនឯកឧត្តមទេសរដ្ឋមន្ត្រី ពិនិត្យសម្រេច និងសេចក្តីព្រាងច្បាប់ស្តីពីការគ្រប់គ្រងទឹកកខ្វក់ និងប្រព័ន្ធលូបង្ហូរ និងមុនប្រជុំឆ្លងជាមួយអន្តរក្រសួងនាពេលខាងមុខ។
ច្បាប់នេះជួយធ្វើឱ្យប្រសើរឡើងដល់ការគ្រប់គ្រងប្រព័ន្ធលូ និងប្រព័ន្ធប្រព្រឹត្តិកម្មទឹកកខ្វក់ ដើម្បីយកមកអនុវត្តឱ្យមានប្រសិទ្ធភាពខ្ពស់ និងឆ្លើយតបទៅនឹងការអភិវឌ្ឍពេលបច្ចុប្បន្ន ក្នុងការសាងសង់ ជួសជុល និងថែទាំប្រព័ន្ធលូ ប្រព័ន្ធចម្រោះទឹកកខ្វក់ ប្រឡាយ គ្រប់គ្រងសំណល់ភក់ និងប្រព័ន្ធការពារទឹកជំនន់ ព្រមទាំងចូលរួម និងផ្តល់ការគាំទ្រក្នុងការរៀបចំគោលនយោបាយ យុទ្ធសាស្ត្រផែនការសកម្មភាពមេ និងផែនការអភិវឌ្ឍន៍ជាតិផងដែរ៕
ដោយ៖សម្ផស្ស
